CUINTRISTORIE DAL NÛFCENT 1980-1990. Imigrazions, Chernobyl, la muart di pre Checo Placerean: ma il Friûl nol mole la rinassite culturâl daspò dai agns dal taramot

E je inmò une identitât furlane fuarte intun periodi di scjas politic e ambientâl
Il Friûl al rispuint fin dal prin moment al taramot che ai 23 di Novembar dal 1980 al scjasse la Irpinie, fuart di un model eficient e ben colaudât, dimostrant ae Italie e al Mont che chi di nô lis disgraciis a insegnin a jevâ sù plui fuarts di prime. Cussì fuarts di podê judâ chei altris. L’Ospedâl di Udin al vuide la organizazion logjistiche di une colone di oms, tecnics, struments che si dimostraran indispensabii tai prins dîs di emergjence. In mancul di cuatri agns, di taramotâts o deventin i plui impuartants e cualificâts esperts par intervignî, tal zîr di 24 oris, in câs di taramot. Un ribaltament epocâl, che si sparnice a ducj i setôrs de nestre societât.
IMIGRAZION_ Tiere di migrants, il Friûl al cerce pe prime volte la migrazion di chei altris: i prins a rivâ, di une lungje e dolorose schirie che in dì di vuê no je ancjemò finide, a son i polacs. Tal 1981 il gjenerâl Jaruzelski al veve promulgade la leç marziâl, bandît il plui grant sindacât dal Paîs, Solidarnosc, imponût cu la fuarce un guvier militâr. E magari, cussì al veve ancje salvade la Polonie di une invasion Sovietiche, ma chest nissun al vûl ametilu cun serenitât! Tancj a son chei che a scjampin di chel paîs, massime atirâts in Italie dal fat che a Rome un lôr paisan, Karol Woytila, al è di pôc deventât Pape (1978). E seguitant i trois milenaris che par secui a àn unît il Patriarcjât di Aquilee a Cracovie, Varsavie e Danziche, a rivin in Friûl. La statistiche e stime che, tra il 1981 e il 1989, il 5,7% dai migrants polacs al sielzi la Italie. Une cifre grandissime, enorme. Centenârs di lôr si fermin tai nestris pais, i prins che a cjatin sul lôr cjaminâ. Si vuadagnin di vivi ai semafars, netant i veris des machinis: une modalitât che e je deventade cuasi l'”archetip” de gnove migrazion. Dignitât e miserie si confrontin a ogni crosere di Udin.
Tal stes an, il sindic Agnul Candolin, democristian, al sburte par vê in citât un Conservatori musicâl statâl, il Tomadini. In pôcs agns al deventarà une istituzion prestigjose e preseade in dute Europe, buine di formâ une rose di grancj musiciscj inte tiere dai Candotti, Candonio, Perosa e Perusini. Avocat, industriâl, passionât om di poltiche e di culture, discutût o amât, favorît o ferocementri scombatût (al murarà tal 1985, dopo dîs agns di sindic, ae vee di un altri insediament tant che prin citadin), al crodeve che la Capitâl dal Friûl, Udin, e varès vût di sei une citât moderne, vierte ae culture e al bon vivi: Universitât e Stadion a nassin sot il so mandât.
IL MILENARI DE CAPITÂL DAL FRIÛL_ E cussì, e sarà grandiose tal 1982 la celebrazion dal Milenari de Citât, nomenade insieme cun Buie, Feagne, Sante Margarite dal Gruagn e Braçà tal famôs diplome firmât dal Imperadôr Oton di Gjermanie. E al sarà come se in chê fieste, popolâr e sintude, i Furlans e scuvierzessin l’inzirli di une Storie grandonone, che mai in nissune aule di scuele taliane ur jere stade insegnade. E di Friûl in chescj agns si fevele tant, vie pe Italie e tal  Mont, oviementri dome in virtût dal “Diu Balon”, come se nuie altri al esistès su pe tiere: e cussì si visin che i furlans a esistin parcè che doi furlanats tant che Bearzot e il so portîr Dino Zoff a vuidin vitoriose la nazionâl taliane a vinci i campionâts mondiâi in Spagne, chei dal 1982! Cuntun stîl dut furlan, fat di miezis peraulis e di tancj fats. E l’an dopo, la Udinese e compre Zico: i tifôs par vêlu a zighin pes stradis “O Zico o la Austrie”, inmaneant une vere e proprie “manifestazion popolâr”, no savint che il dileme a è ben antîc di chestis bandis, e par nuie scontât. Che cuant che tal 1923 a àn dade la pussibilitât di sielzi, in Valcjanâl, la valade si è dispopolade! E, ironie dal destin, tal 1984 propit un furlan dal Lusinç, un di chei teritoris che a son stâts Austrie fin tal 1916, ven a stâi Gurize, e che al à frecuentât il Marinelli di Udin, Carlo Rubbia, al vinç il premi Nobel studiant la interazion eletromagnetiche fra lis parteselis elementârs.
CHERNOBYL_ Parteselis cetant difarentis di chês che a colarin jù su monts e plane fra i 29 e i 30 di Avrîl dal 1986… Une perturbazion maligne, une ploiate come tantis che a vegnin su la stagjon de vierte. Ma cheste e je radioative, stant che cualchi zornade prime, ai 26 di Avrîl, a Chernobyl un reatôr nucleâr al fâs scjampâ fûr cualchi velen di plui. Al pâr che ancje il cesio al ledi pai trois antîcs des migrazions, e come tancj altris si sedi cjatât ben in Friûl, depositantsi un pôc pardut. Metafore apocalitiche di un mont là che mûrs, confins, fîl spinât no varessin vude plui nissune impuartance pal destin dai oms. Come che ancje la cronache recentissime dal Gjapon nus à ricuardât. E, di fat, il deceni si siere propite cu la colade de Tendine di Fier, sdrumade insieme cul Mûr di Berlin. E intant, vie a lassâ che il lidric e la salate a vadin in semence, parcè che lis sfueis largjis a son invelenadis des scoriis, e divuardi a mangjâ foncs o a puartâ scarpis in cjase! Un cont salât che ancjemò vuê o paìn, nô furlans plui di ducj chei altris, stant che o sin la regjon cu la plui alte incidence di tumôrs.
MANDI PRE CHECO_ Tal Novembar di chel stes an, al murive a Sant Denêl pre Checo Placerean, rôl di Montenars, vôs di sapience, buine di reclamâ ancje cun rabiose viamence la particolaritât di Aquilee rispiet a Rome. Ma il Polac, che tai stes mês al vierzeve il dialic cui Ebreus di Rome e al visitave la Sinagoghe insieme cul Rabin Toaff, nol sintive ben di chê orele. Une sorditât persistente e seriose no dome sô, ma dai siei antecessôrs e dai siei sucessôrs fin al dì di vuê. Che e seti une malatie ereditarie dai Papis Romans?
Angelo Floramo
___________________________________________
La globalizazion e la rinassite culturâl daspò dai agns dal taramot
In Italie a son i agns che a celebrin la Milano da bere, la vite glotude e gjoldude intun bot di ligrie, sul conviciment che dut al varès di sei lizêr, disimpegnât, cuasi un zûc dome di ridi e po vonde. Craxisim e Reaganisim a somein lis peraulis di ordin di une politiche simpri plui spandone e mangjone, indifarente aes necessitâts dai popui ma une vore golose dal lustri plastificât dai rifletôrs, dai zûcs in Borse e des partizions de “grepie”, là che si pues mangjâ intune concezion personalistiche de politiche che, magari cussì no, e sarès deventade chê vincente. E ancje cierts nestris “sorestants” furlans a àn mostrât di preseâle une vore, imbastint chel disastri istituzionâl che al varès screât il deceni sucessîf, sdrumant i partîts e copant tai scandui chê che e je stade clamade la “Prime Republiche”.
I modei vincents a son difondûts des televisions comerciâls, che a tachin a proponi ancje chi di nô une vere colonizazion culturâl, come che al veve dit Pasolini, la base par chê globalizazion e omologazion che tancj dams e varès fat, scancelant memoriis, identitâts e lidrîs jenfri un pastum colorât ma cence anime ni valôrs, che Elio Bartolini al veve bielzà cjantât tal so magjistrâl e mai dismenteât “Intal Friûl dai Coltivatori Diretti”, almancul vincj agns prime.
E pûr, il paradigme di une specialitât dute furlan al ten dûr, sostignût di une resistence di base fuarte, sclete e braurose, une rispueste di popul, buine di digjerî e di metabolizâ i cambiaments, di arzinâju, par no pierdi, dal dut, la sô anime, in gracie ancje dal insegnament di cierts profetis nostrans che purtrop tal zîr di chescj agns nus varessin lassâts a scombati di bessôi, ma cul lôr insegnament simpri presint a savoltânus.
Angelo Floramo