CUINTRISTORIE DAL TARAMOT. None pontade. E ‘po al rive l’Autun.

I antropolics nus contin che il taramot al è un “aceleradôr sociâl”. Nol fâs mudâ un svilup di direzion, ma dome al distile agns in pôcs moments, e in agns, decenis. In pôcs mês il Friûl al à vivût il Risorziment, il boom economic, il ’68 e il post ’68. Lis feminis cul façolet neri a son ladis a Triest a manifestâ dongje des zovinis cu la cotulute curte, tes assembleis i furlans a àn tacât a no vergognâsi di jessi furlans, e tes tendis e je rivade la liberazion sessuâl. Int gnove e je rivade e tancj di lôr a son restâts culì inamorâts de tiere e de int.
Di un pont di viste economic, la riprese e jere bielzà partide e i furlans a son stâts ben atents a no pierdi par colpe dal taramot chest tren tant spietât. L’edilizie e je stade il volan par dute la riprese e pe prime volte i furlans a son stâs “libars di podê restâ”. Forsit ce che al è mancjât e je stade une vuide in grât di dâi une direzion resonade a dut chest svilup, ma si sa che la programazion no je mai stade tas cuardis da DC.
Di un pont di viste sociâl, al ven tal cjâf che Pasolini al cjantave de muart da societât contadine za dai agns ’50, e forsit il Friûl al jere restât fûr di cheste tragjedie fintremai al taramot. Ma ancje chi, l’aceleradôr sociâl al à fat il so. Dopo secui passats a jessi sotans dai siôrs nostrans o forescj, invezit di scombati par liberâsi dai parons, i furlans a an crodût di deventâ ducj siôrs, ducj borghesuts cul biliet di prime classe in te sachete, invezit de «pipe cence un fregul di tabac». Tal Istât dal ’76 la int si è dade dongje tirant fûr lis viciniis, la solidarietât di cort e borc, la cussience dal interès comun. Dal Istât dal ’77 cheste biele plante le vin lassade murî. Le vin taiade par fâ su lis nestris maledetis vilutis cun doi metris di cente atôr atôr, dulà che si vîf mâl e di bessôi, plens di pôre di dut ce che al è di fûr, cu la tavernute che e je un bunker travistît di ostarie.
Ma se l’arbul des viciniis al somee muart, puedino jessi muartis ancje lis sôs lidrîs? Lidrîs vecjis di agnorums, che a son cussì in sot e in dentri inte nestre tiere? I storics a dividin i fenomenots di lunc periodi di chei di curt: e chestis lidrîs a son di lunc, lungjon periodi. Sperâ che a tegnin dûr sot la tiere furlane, e che un doman a puedin tornâ a menâ, e je forsit une forme, o la uniche forme, di otimisim chi si podìn permeti in chest Autun dulà che dut al somee murî.
Chest an a son passâts 40 agns dal taramot e e sarès ore di tacâ a domandâsi ce che al vûl dî il slogan «il Friûl al ringracie e nol dismentee». Interogâsi sul sens de memorie, de nostalgjie e dal ricuart. Lant un tic atôr pes variis celebrazions si pues dî che la lezion che e je stade imparade miôr e je chê tecniche: di un pont di viste sismologjic si è fat tant, e ancje par chel de prevenzion e de gjestion di un pussibil event catastrofic gnûf; il Friûl nol è stât di sigûr fer. Di un pont di viste aministratîf si cjacare di «model Friûl», ma cjalant ai fats si è viodût che nol è un model espuartabil par varis resons: chê plui stretementri tecniche e je che no si è tratât di un “sisteme” organic, pensât e realizât cun criteri, ma di une grande improvisazion basade sul discjamâ ogni rogne viers il bas e su lis spalis dai sindics e dai comuns, che par braùre e fortune (e sot il voli atent de int) a àn lavorât ben.
Pal rest, si son viodudis lis solitis paradis di ogni àn e ca e là (miôr pôc che nuie) si è parfin tacât a cjacarâ de autogjestion popolâr tes tendopolis, ma si continue a sotstimâ la impuartance di cheste reazion sociâl al traume coletîf. L’operât de Protezion Civîl in situazions come il taramot da L’Aquile al è un biel spieli di chest: il massim de eficience operative che si mude intal massim da l’esautorazion de popolazion, la cuasi perfezion tecniche dal intervent ma la incapacitât di relazionâsi cul teritori. Se il pinsîr al va, come che nol pues no lâ, ai fradis e a lis sûrs di Amatrice e dintor, che in chescj dîs a patissin un lôr taramot, il consei al è di dî gracie ai volontaris da Protezion Civîl che a àn fat svintulà la bandiere cul poleçat inte lôr tendopoli, ma ancje di no acetâ nissun model imponût  di fûr, nancje chel “Friuli”, e di scombati par jessi lôr a decidi cemût saltà fûr dal disastri. ❚
✒ Igor Londero – Autôr di «Pa sopravivence, no pa l’anarchie» Forme di autogestione nel Friuli terremotato: l’esperienza della tendopoli di Godo (Gemona del Friuli)