CUINTRISTORIE DAL TARAMOT. Setime pontade. La manifestazion dai 25 di Lui: “Dalle tende…” aes barachis!

No sai se in chescj miei intervents o ai fat sul seri une “cuintri storie”. Cuant che mi met a scrivi o pensi di contâ “la” storie, o almancul ce che al è pussibil ricostruî de storie partint des fonts che si consultin. Insome, plui che “cuintri storie”, semplice storiografie.
Chest nol gjave che fasint storiografie a saltin fûr leturis dai fats cetant diviersis di chê che e je la vulgade, che e nas un pôc de volontât di cui che al à il podê sui media uficiâi (celebrazions e gjornâi), e un pôc dal procès di rimozion e di nostalgjie che a fasin part de creazion de memorie.
Tra lis varis liendis che a son stadis creadis ad art par ridusi la impuartance dal moviment des tendopolis, e je chê che lu vûl espression di une minorance di contestadôrs di çampe che a àn sustade la int cuintri la zonte democristiane.
Une altre liende e je funzionâl a fâ viodi che il moviment al jere animât di desideris impussibii e nol jere in grât di capî la situazion, presonîr di slogans cence sostance come chel famôs «Dalle tende alle case».
Cjapìn par esempli la manifestazion dai 26 di Lui dal 1976 a Triest. I verbâi des assembleis nus contin di une decision che e ven a madurî in tantis riunions tai comitâts di tendopoli che a puartin a une assemblee gjenerâl dai taramotâts tal cupolon di Ospedalet, a Glemone, ai 3 Lui (viôt pontade di Jugn, ndr.). Tes riunions che a vegnin dopo, si viôt pardabon il tentatîf des fuarcis di oposizion istituzionâls di metisi insom dal moviment. In particolâr, intune riunion organizative a Trasaghis al ven fûr che i partîts come il PCI e il PSI, lis comunitâts montanis (in chel moment controladis dai doi partîts ros) e i sindicâts a àn decidût di cambiâ la destinazion de manifestazion: no plui denant dal palaç dal podê regjonâl a Triest, come che e veve decidût la popolazion in assemblee al cupolon, ma a Udin. Parcè? Parcè che cussì a saressin lâts lôr a Triest a contratâ cu la Regjon tant che rapresentants dai taramotâts! Ma propit tal verbâl di chê riunion si lei che i delegâts de int ur àn molade un pidade tal cûl a partîts e ai sindicâts. Ai 26 di Lui si son fatis dôs manifestazions: i taramotâts a son lâts jù a Triest, sindicâts e partîts son restâts a Udin. E chei di CL, par no sbaliâ, a àn organizât un pelegrinaç a Madone di Mont…
Ma soredut, al bisugnarès leisi la mozion consegnade tes mans dal president de regjon Comelli la dì de manifestazion. E je une mozion un grum discutude e resonade tes riunions des tendopolis, che e frontave ducj i problemis vignûts fûr tai prins mês di vite tes tendis e e meteve neri su blanc trê cuatri robis che po dopo a son deventadis pilastris de ricostruzion. Vuê al somee che a vedin inventade la aghe cjalde a domandâ une ricostruzion antisismiche, ma di fat a son stâts lôr a tirâ fûr la cuistion viodint che la prime leç regjonâl su la ricostruzion, la numar 17, e dave i prins bêçs par meti in dret lis cjasis ancjemò sù e no stabilive nissun criteri antisismic.
E po dopo, la richieste di esenzion dal militâr o chê di tornâ a fâ sù i paîs dulà che a jerin prin: no jerin utopiis, ma vertencis che a son stadis fatis rivâ ben dentri de stanzie dai botons e a àn fate la storie.
Ma la plui grande e je chê altre leiende, chê «Dalle tende alle case», che a 40 agns a tornin a tirâ fûr cence vergogne – e, a fuarce di menâle, la int i crôt. Framieç des cjartis dal moviment des tendopolis a no ’nd è une che e ripuarti chel benedet slogan, e sì che al è un sfuei dulà che a son segnâts ducj i slogans vosâts a Triest. Il pont 4 de mozion de manifestazion dai 26 di Lui si intitule Sistemazione provvisoria e al bruntule ae Regjon propit pai ritarts te individuazion des zonis dulà tirâ sù lis baracopolis. Ce «dalle tende alle case»! In mês di Lui la int e voleve lis barachis parcè che e saveve che cence al tocjave lâ vie. E al è stât un pecjât, o forsit un delit, che la Regjon no sedi rivade a fâ nuie di chest pont di viste. Cuissà ce rivoluzion che e sarès vignude fûr di Atom, cul prin frêt, se no fossin stâts i taramots di Setembar a salvâi la ghirbe ae Regjon fasint scjampâ la int cu la schene rote. ❚
✒ Igor Londero – Autôr di «Pa sopravivence, no pa l’anarchie» Forme di autogestione nel Friuli terremotato: l’esperienza della tendopoli di Godo (Gemona del Friuli)