Sfuei Mensîl Furlan Indipendent
Archivi de Patrie

CULTURE. Al torne Suns

............

Sabide ai 28 di Avost: e je cheste la date dal gnûf apontament, il secont, cun Suns, festival de cjançon in lenghe minoritarie. Inte sugjestîve suaze di Place S. Jacum, tal cûr di Udin, o podarìn gjoldi une serade cun grups che a cjantin in lenghis minoritariis che a rivin di dute la Europe mediterranee (dal arc alpin fin ae Sicilie par capîsi).
Biel che o stoi scrivint i 8 grups partecipants no son ancjemò stâts selezionâts de jurie ma o vin di sigûr devant dai voi e intes orelis la musicalitât des lenghis rapresentadis l’an passât inte prime edizion (Romanì, Catalan, Sart, Albanês, Rumanç, Ladin e Furlan). E si visìn cun emozion ancje le intense performance di Lino Straulino cu la so «Doman» che e je stade selezionade par rapresentâ il Friûl ae finâl 2009 dal Liet International davuelt sucesivementri in Frisie (l’altri grup «finalist» vignût fûr di Suns al jere stât chel dai sarts CRC Posse).
Chest an la finâl dal Liet si davuelzarà ai 20 di Novembar inte suaze dal Festival Interceltic di Lorient in Bretagne, dulà che a rivaran ancje doi grups che a saltaran fûr di Suns. E par tacâ a respirâ l’aiar de edizion di chest an, o vin sintût Frits Sieswerda, board member dal Liet International e president de jurie di Suns 2010.
Daspò di cuasit 10 agns de prime edizion il Liet 2010 si sta svicinant. Cemût ti sintistu?
O soi une vore braurôs di jessi part di cheste organizazion, lavorant adun cun partners internazionâi che a àn la pasion pe lôr culture e pe lôr lenghe. Dîs agns a son tancj. Mi auguri di lâ indenant e fâ deventâ il Liet une organizazion plui fuarte e impuartante.
Frits Sieswerda al è un asistent sociâl e un musicist prime che un operadôr culturâl. Cemût metistu adun chescj diviers aspiets de tô vite professionâl?
Agns indaûr o ai lavorât tant che operadôr di comunitât; di cinc agns o soi docent di assistence sociâl te NHL Univerity di sciencis aplicadis a Leeuwardeen in Frisie.
Dal 1990 o suni tal grup folk frison Willehùske e agns indaûr o soi stât il cantant dal grup punk frison Trije Gurbes. Lavorant tal sociâl cui zovins o ai doprât la musiche par stiçâju e insegnâur a organizâ festivals e ativitâts musicâls di bessoi. La musiche e met la int adun dant stimui positîfs a la coesion sociâl e a la partecipazion civîl.
I frisons a àn inventât il Liet International; ce impat aie vût chest festival te sene culturâl de tô regjon?
Simpri plui int si è rindude cont dal risultât di visibilitât internazionâl tal forest. Un altri risultât positîf al è che a son simpri plui i zovins che a partecipin. O vin une interessante diviersitât dai gjenars musicâi. La nestre rêt e cres simpri plui!
Le colaborazion jenfri il Liet e il Frûl e je in vore di diviers agns. Ce pensistu de nestre regjon e de nestre int daspò agns di colaborazion?
O soi une vore content de colaborazion cui furlans. I furlans che o ai incuintrât a son une vore positîfs, cjalts e plens di passion pe lôr culture e lenghe.
Opinions su la musiche furlane?
O ai viodût e scoltât un cjantautôr une vore brâf al Liet International, Lino Straulino. O ai ancje scoltât il metal furlan su la pagjine myspace Metallari Friuli. Mi somee interessant. Mi interessin ducj i gjenârs musicâi, dal folk al punk, dal metal al hip hop. Dut al devente plui speciâl cuant che al è cjantât te lenghe mari. No viôt la ore di incuintrâ i musiciscj furlans e di jessi de jurie di Suns.
Duncje a prest in Friûl!
Buine fortune cu la organizazion di Suns 2010 e cul Liet International 2011 (a Udin, ndr). Si viodin a Udin!
Mojra Bearzot

Contile juste / Plebissît pustiç

Diego Navarria
“MMandi, nono.” “Mandi frut!” “Dai mo, nono, no soi un frut. O ai disenûf agns e o ai pene finît il liceu!” “Par me tu sarâs simpri un frut, il prin nevôt. Però e je vere, tu sês deventât grant, une anime lungje. Se tu cressis ancjemò tu varâs di sbassâti par jentrâ in cjase, […] lei di plui +

Presentazion / Presentazion dal libri “Fûc su Gurize”. Intal ambit dal Cors Pratic di Lenghe e Culture Furlane inmaneâtde Societât Filologjiche Furlane

Redazion
Joibe ai 17 di Avrîl dal 2025 aes sîs e mieze sore sere (18.30)SALE CONFERENCIS DE BIBLIOTECHE COMUNÂLVie Rome 10, Vile di Ruvigne / Via Roma 10, S.Giacomo di Ragogna A intervegnin: DIEGO NAVARRIA colaboradôr dal mensîl ‘La Patrie dal Friûl’e DREE ANDREA VALCIC president de Clape di Culture ‘Patrie dal Friûl’Jentrade libare lei di plui +

L’EDITORIÂL / La lezion de bandiere par dismovisi dal letarc

Walter Tomada
Par sigûr o sin stâts ducj braurôs cuant e je rivade in television la storie, discognossude a tancj furlans, di Marc di Murùs (o Moruç?), ultin a rindisi ae concuiste venite dal 1420. Pûr di no dineâ la sô apartignince ae Patrie dal Friûl, lui – che al puartave la bandiere dal Stât patriarcjâl – […] lei di plui +

La piçade / Fevelìn di autonomie pluio mancul diferenziade

Mastiefumate
In Italie si torne a fevelâ di autonomie. Magari par dâi cuintri, ma si torne a discuti. La Lega cu la propueste di leç su la autonomie diferenziade e torne a metile in cuistion. Dopo la Secession de Padanie, la Devoluzion, la Gjestion des Regjons dal Nord, dutis cuistions ladis in malore, cumò Calderoli al […] lei di plui +