Sfuei Mensîl Furlan Indipendent
Archivi de Patrie

CULTURE. [ART-Â] I segrets de vite tun zermuei di tiere di cjamp

............

La art di Guerrino Dirindin e je di simpri un cuarp a cuarp cu la energjie vitâl de nature. Di scuasi dîs agns, al dopre propri la tiere, chê che lu à viodût nassi, tant che element materiâl e simbolic. Sedi tai “spiei” di tiere opache sedi tes oparis segnadis di agârs profonts, di segns curfs che a somein a grispis tetonichis, ma ancje a impronts digjitâls. Il scultôr pordenonês al puarte indevant la ricercje dal se tal confront cun chel “medium”, fat di tiere di cjamp, aghe e cole, che al cjape dentri, te sô viscositât, i segrets de vite. I siei lavôrs a delinein paisaçs interiôrs dulà che nature e culture si incuintrin te stesse forme.
Tes voris plui resintis si zonte un element che al cjacare ancjemò di plui de energjie vitâl de nature: il zermuei. La superficie di tiere si plee, sburtade di alc che al cres, che si sta formant. La menade fate di pantan si vierç par mostrâ ce che e à dentri: gnovis creaturis par un gnûf mont, par un gnûf inizi. Scuasi une necessitât, che e ven indevant ancje cul cjapâ cussience dal drame di un planet che al à bisugne di jutori. Ve alore che al nas chel berli di aiût «par une tiere che o stin sdrumant» li dal interpuart di Pordenon e che il scultôr al à volût dedicâ al poete di Andreis, Federico Tavan, so amì. Li la tiere si vierç e e domande jutori. «Bisugne tornâ a dâi dignitât – al dîs l’artist –. Lis cjasis a son tant che un sierai che al ten fûr il paisaç, la jerbe, la nature, ma, intun mont ipertecnologjic, paisaç e tecnologjie a àn di fevelâsi simpri di plui».
Cirint la autenticitât, Dirindin al torne a sintî la linfe dal mont, al torne a partî de origjine stesse de art. Lis sôs oparis a dan cuarp a formis archetipichis, scomençant de tiere e dal pantan: materiâi di plasmâ, di formâ, di costruî. Cun pôc: «dôs sedons e lis mans». No son barieris tra il scultôr e chel che al sta fasint. Dirindin nol à pôre di sporcjâsi lis mans cu la materie, cul pantan dal jessi, scjampant banalitât e omologazion. Intun moment li che simpri plui l’art e vîf intune dimension concetuâl, virtuâl, no materiche, l’artist pordenonês al va cuintricorint. Daspò vê doprât len, piere, fier, bronç, al à cjatât te tiere la materie che i da lis pussibilitâts estetichis che al cirive. Lui che cu la tiere al zuiave fin di piçul tai fossâi e che, ancje vuê, devant dai cjamps arâts al reste «incantesemât». «Tai agârs, tes cumieriis des mês oparis, la lûs e jentre e la tiere si ilumine. Cuant che la aghe e svapore, la tiere si spache e a nassin lis crepaduris». Scuasi une caligrafie naturâl, zuiade su piçulis variazions di colôr studiadis dal artist tant che un moderni alchimist che al dose i «ingredients» cun sapience.
Erika Adami
_____________________________
CE FÂ
Lis Galariis dal progjet di Udin a proponin une riflession sui mûts di comunicâ e di vivi la architeture di vuê cuntune mostre dedicade a trê edificis di rilêf internazionâl: la sede museâl dal Guggenheim di Bilbao di Frank Gehry, la cjase fate di Rem Koolhaas a Bordeaux e la glesie Dives in Misericordie di Richard Meier a Rome. Living architectures: trê leturis di architeture contemporanie si pues visitâ a palaç Morpurgo fin ai 10 di Zenâr dal 2009 (dal martars al vinars des 3 daspomisdì aes 6 sore sere – la matine dome su prenotazion – e la sabide e la domenie des 10 di matine aes 7 sot sere). Informazions al numar 0432/414742.
Un biel puest par dismenteâ al è il titul dal progjet fat di trê mostris indipendentis, par cure di Branka Bencic, Paolo Toffolutti e Matteo Chini, che a interpretin, di prospetivis diferentis, aspiets de contemporaneitât cjalâts a traviers dal concet di utopie. A son viertis fin ai 7 di Dicembar (la sabide e la domenie des 4 daspomisdì aes 8 di sere) tal Spazi public art contemporanie di vile di Toppo Florio a Buri. La jentrade e je libare. Informazions al numar 347.2713500.
Erika Adami

L’EDITORIÂL / La lezion de bandiere par dismovisi dal letarc

Walter Tomada
Par sigûr o sin stâts ducj braurôs cuant e je rivade in television la storie, discognossude a tancj furlans, di Marc di Murùs (o Moruç?), ultin a rindisi ae concuiste venite dal 1420. Pûr di no dineâ la sô apartignince ae Patrie dal Friûl, lui – che al puartave la bandiere dal Stât patriarcjâl – […] lei di plui +

La piçade / Fevelìn di autonomie pluio mancul diferenziade

Mastiefumate
In Italie si torne a fevelâ di autonomie. Magari par dâi cuintri, ma si torne a discuti. La Lega cu la propueste di leç su la autonomie diferenziade e torne a metile in cuistion. Dopo la Secession de Padanie, la Devoluzion, la Gjestion des Regjons dal Nord, dutis cuistions ladis in malore, cumò Calderoli al […] lei di plui +

L’EDITORIÂL / No stin a colâ inte vuate de indiference

Walter Tomada
Al à fat une vore di scjas l’articul scrit su la “Patrie” di Setembar di Marco Moroldo, furlan che al vîf in France e che al à insegnât ai siei fîs la marilenghe. Tornât a Mortean pes vacancis di Istât, al à provât a cirî cualchi zovin o cualchi frut che al fevelàs furlan cui […] lei di plui +