Sensibile e ironiche. Plene di vitalitât, i plâs contâsi cun ilustrazions, citazions e «collage», contâ emozions, passions, lis personis che i stan dongje. Animaliste, Emanuela Biancuzzi e piture un mont «ribaltât» dulà che animâi trasformâts in oms dispietâts a rifilin muart e torturis. Chel che e rapresente, cun peraulis e imagjinis, al è il dolôr des vitimis, di dutis lis vitimis, par scjassâ un mont indiferent ae soference di chei altris.
Nassude a Cividât, e vîf a Pavie di Udin. «O stoi chi di scuasi 15 agns, ma – e marche – o vîf altrò». Citadine dal mont, e je buine di cjalâ, e rapresentâ, la int de tiere dulà che e je di cjase, tant che e à fat par «Sticeboris 2007», zovine mostre di art contemporanie tes vilis di Pavie di Udin.
Ironic, dissacrant, crût. Ve chi Emanuela trê adietîfs pal to lavôr. Ti ricognossistu?
«Sì. Par chel che al inten lis tematichis di tip etic, antispecist e animalist, l’adietîf “crût” dispès al devente une acuse. Mi disin che no fâs un lavôr rilassant, riposant, ma problematic, fastidiôs, che ti oblee a riflessions o a piçui curtcircuits mentâi. Mi maravee viodi che la imagjine disegnade e scjasse, come se il disen al podès fâ plui vere la realtât concrete e tragjiche».
Par «Sticeboris 2007» tu âs dedicât lis cuviertis di «Famiglia Cristiana» ae int dal to paîs, Pavie di Udin. Tancj a àn fevelât di «epiche cuotidiane». Tal progjet e je jentrade ancje la lenghe furlane. Parcè?
«O volevi fâ onôr aes personis che a son vignudis prime di me e che, cul lôr jessi, a àn lassât un segn dal lôr passaç. O ai cjalât aes personis che a caraterizin la vite dal paîs te lôr semplicitât, cu la lôr vite ordenarie. Lis cuviertis fintis lis ai dadis fûr ae popolazion par pueste. Dut chest par passâ imagjinis e segns par solit destinâts a un public elitari. La lenghe furlane e fâs part dal teritori, e je impuartantone. Lis informazions che o ai cjapât sù, scuasi “spifaradis”, a jerin par furlan, impussibil no metilis. “Mario daiblecs” e “Petoti” a son i personaçs che mi àn apassionât di plui. I tescj che ju contin a rispietin il mût di fevelâ sut, incisîf e saurît tipic de lenghe furlane».
Tancj dai tiei progjets a previodin la partecipazion ative des personis. Parcè ciristu chest apuart tal procès creatîf?
«Massime parcè che mi interessin lis relazions, i rapuarts, il lôr significât e svilup, e po parcè che fin de Academie o ai metût dongje ae mê ativitât di ilustradore editoriâl esperiencis di art relazionâl cuntun coletîf feminîl. Mi interesse coinvolzi il public tal procès artistic, che al sedi partecip e cussient. E po, sburtant un contat diret cu lis voris dai artiscj, si dismôf tes personis la curiositât pe art, si preserve e si svilupe chê ativitât di osservazion e valutazion – tai paîs anglosassons le clamin “art appreciation” – che e fâs nassi un ategjament di confidence cul mont de art. Chest mût di lavorâ, intun scambi e confront continui, al à caraterizât tancj dai progjets puartâts indevant cun Piermario, tant che Fun, “Fantastic united nations”».
In ce direzion stano lant lis “Fantastic united nations” dopo la pierdite di un dai siei fondadôrs, Piermario Ciani?
«O patìs une vore la pierdite di Piermario. L’an che al è mancjât, il 2006, o stevin corezint i stampons dal libri Fun, che al met dongje i svilups dal progjet cun contribûts di Pablo Eucharren, Ferruccio Giromini e Carlo Branzaglia. Cumò al è in vie di publicazion. I timps, inevitabilmentri, si son slungjâts. Intant, l’Ufici postâl di Topolò al continuarà a promovi gnovis azions “fun-tastichis” tai secui che a vignaran».
Ce ise par te la identitât?
«E je fate di vincui, te acezion dople di laç che al straten e di leam che al unìs. O vin un vincul gjenetic, che al determine dute la nestre vicende biologjiche; un vincul morfologjic, vincui familiârs, culturâls, ambientâls… e psichics: lis esperiencis positivis, i incuintris, i traumis, i incidents, i corots a incidin sul gno mût di fâ esperience e a costruissin la mê identitât».
Cuai sono i tiei prossims progjets?
«“Undercover” al sarà tes librariis in Setembar. Al è un esperiment, un “fûr golaine”, tant che une piçule bombe colorade tal mieç dai confets, une racuelte di imagjininis fatis tai ultins 5 agns, che ai 13 di Setembar o presentarai in ocasion de mostre omonime ae No Loco Art gallery a Padue. “WWW – The book” al è un altri libri, che o ai pratichementri finît. Un lavôr une vore impuartant dal pont di viste emotîf e afetîf. Lu met a puest cun periodicitât, parcè che o vuei che al sedi bon di frontâ il mont cence compromès».
__________________________________________
CE FÂ
Butiliis di plastiche, plats vecjos, crucjis, budiei di biciclete… tornâts a meti dongje e trasformâts par une cuotidianitât eco-compatibile di nature ludiche. Ve chi cemût che a àn interpretât il teme dal ricicli Roberta De Bernardi e Ines Paola Fontana, Anna Lombardi, Walking Chair, Lucy.d, Kontiki e F Maurer pe mostre «RE-Design», seconde tape di «Maravee 2008 – Recycle». Su la tor panoramiche dal Museu Cid di Tor di Zuin, intune sale sospindude a plui di cincuante metris di altece, a cjataran acet ogjets e intervents ambientâi che a cimiin ae relazion tra industrie e vite cuotidiane. La mostre e je vierte il miercus des 9 di matine a une dopomisdì; la sabide des 10 a une dopomisdì e des 4 aes 7 sore sere; la domenie des 3 daspomisdì aes 8 di sere, fin ai 3 di Avost.
