Sant Andree, il purcit su la bree, a disin ator pal Friûl. Al sarà par chel che in Friûl ae fin di Novembar si tache a purcitâ. Grande tradizion chê dai purcitârs in Friûl, tant che propit il non stes dal mistîr al à origjin de bestie, dal purcit.
Nol è un câs chest leam cu la bestie che e faseve vivi, almancul une volte, dute la famee. In ogni famee al jere un purcitâr e ognidun al veve un purcit intal cjôt; e il plui des voltis chest al bastave par fâ lâ indenant la famee e vê il mangjâ par un pôcs di mês.
«A son pardabon tantis lis detulis che a rivuardin il purcit e il purcitâ – al dîs l’assessôr regjonâl aes risorsis rurâls, agroalimentârs e forestâls Claudio Violino –, segn chest che e jere une bestie une vore impuartante pal nestri teritori».
Magari chei plui zovins o i plui piçui no san nancje ce che al è un purcitâr, ma di sigûr a ‘nd è di chei che si visin. O se no, a son chei che a viodin intes fotos dai nonos il purcitâr; o ancjemò, o vin la imagjin dai salams e des sopressis picjâts inte cantine, dai persuts metûts a suiâ, dai socoi tignûts di cont pal Invier.
Chi in Friûl, in plui de fortune di vê une grande produzion di persut tant che chel di Sant Denêl, o sin fortunâts parcè che o podìn cjatâ dapardut bon salam furlan e, ancje se a son in pôcs in dì di vuê, o podìn cjatâ cualchi purcitâr.
«Il persut di Sant Denêl e je la ecelence che no podìn fâ di mancul di vê – al dîs ancjemò l’assessôr –, al à di jessi chest il prodot, insieme cul Montasio, il Furlan, la Trute, a puartâ indenant il nestri agroalimentâr. No stin a dismenteâsi che o vin tancj altris prodots di podê “vendi” ben. In chest câs, une vecje detule furlane e diseve che “dal purcit no si bute vie nuie”. Ben che al vegni il persut – al dîs l’assessôr – ma ancje salams, sopressis, luianiis, brusadulis, cueste e dut ce che cheste bestie nus da!».
Un lûc di incuintri su chescj temis, par esempli, e je Cjase Cocel, a Feagne: cemût si fasial a no visâsi dal purcit neri di Feagne? Une raze aromai lade pierdude, ma che par agns e je stade la fortune di chest paîs dal Friûl Culinâr, che e dave i purcits fintremai a Sant Denêl.
Ancje intune altre zone dal Friûl, no lontane di Feagne, si cjate une tradizion di purcitârs. A Dartigne, inte gleseute di Sant Stiefin, e je une piture di un purcitut insieme cun Sant Antoni che e je datade XIII secul. La piture e je deventade la fortunade icone di une manifestazion aromai cognossude in dute la regjon, Purcit in Staiare, che ancje chest an si fâs a Dartigne ae fin di Novembar, propit dongje de dì di Sant Andree. Tancj a disin che a son stâts propit i purcitârs di Dartigne a fâ cognossi ator il salam, e al è ancje cui che al dîs che i purcitârs pignots (la int di Dartigne e je clamade cussì) a son lâts sù in Ongjarie a fâ chel che dopo al è deventât il salam ongjarês. Al sarà: par intant, spietant di vê cualchi informazion plui sientifichementri provade – a son studis in cors – gjoldìnsi une buine merinde di pan e salam!
Cinzia Collini
Presentazion / La Patrie dal Friûl e presente il libri “Fûc su Gurize” di Ferruccio Tassin e Gianni Nazzi
Redazion
La Patrie dal Friûl e presente il libri “Fûc su Gurize”.“La Patrie” e je la cjase dai furlans che no si rindin: e par chest e à volût meti dongje un libri zontant insiemi lis peraulis che chescj doi inteletuâi a doprin par descrivi ce che e jere cheste culture di cunfin e ce che […] lei di plui +
Cungjò / Mandi, Bruno.
Redazion
Al declarave “che nol è dificil fâ telecronachis in marilenghe e che il furlan al à peraulis e espressions di pueste par fâlu”. lei di plui +
L’EDITORIÂL / La lezion de bandiere par dismovisi dal letarc
Walter Tomada
Par sigûr o sin stâts ducj braurôs cuant e je rivade in television la storie, discognossude a tancj furlans, di Marc di Murùs (o Moruç?), ultin a rindisi ae concuiste venite dal 1420. Pûr di no dineâ la sô apartignince ae Patrie dal Friûl, lui – che al puartave la bandiere dal Stât patriarcjâl – […] lei di plui +
La piçade / Fevelìn di autonomie pluio mancul diferenziade
Mastiefumate
In Italie si torne a fevelâ di autonomie. Magari par dâi cuintri, ma si torne a discuti. La Lega cu la propueste di leç su la autonomie diferenziade e torne a metile in cuistion. Dopo la Secession de Padanie, la Devoluzion, la Gjestion des Regjons dal Nord, dutis cuistions ladis in malore, cumò Calderoli al […] lei di plui +
Grant suces di “Stin dongje ae Patrie”, la tierce edizion de fieste dal nestri gjornâl
Redazion
Pe rassegne Avostanis, li dai Colonos a Vilecjaze di Listize, il mont des associazions, de culture, dal spetacul, dal sport si è strenzût intor dal gjornâl dut par furlan fondât tal 1946 A an partecipât: Glesie Furlane, i Bakan, Claudio Moretti – Elvio Scruzzi – Fabiano Fantini (Teatro Incerto), Serena Fogolini e Raffaele Serafini (Contecurte), […] lei di plui +
L’EDITORIÂL / No stin a colâ inte vuate de indiference
Walter Tomada
Al à fat une vore di scjas l’articul scrit su la “Patrie” di Setembar di Marco Moroldo, furlan che al vîf in France e che al à insegnât ai siei fîs la marilenghe. Tornât a Mortean pes vacancis di Istât, al à provât a cirî cualchi zovin o cualchi frut che al fevelàs furlan cui […] lei di plui +