CULTURE – I CLASSICS – 19. SANT JACUM, LÀ CHE AL FINÌS IL MONT

Curiosant tra une preiere e chê altre…
Ancje se un al è une persone di intense religjositât, no si pues pratindi che al prei fin che i vegnin lis vissiis te bocje. Al scuen fermâsi ognitant a tirâ flât e a cjalâ ator, in Sante curiositât. No vin di dismenteâ che i lûcs de devozion popolâr no dome a son metûts tes posizions plui bielis, ma a son arcjis di art piçule e grande. Al mertarès lât a Sant Jacum ancje se si è ateus; par viodi il puest, la basiliche, i palaçs, lis contradis, i colôrs des pieris imboreadis dal soreli che al va a mont. E po statuis, altârs, figurazions… Une robe straordenarie. Par ricjece, par varietât, par armonie tra mont sacrâl e profan. Il cûr de citât, di dimensions vivibilis come grandece e come int, al à la basiliche, il palaç dal vescul e chel dai cjalunis, la universitât, il palaç de aministrazion civîl, il ‘seminari, il convent di Sant Francesc, l’ospizi pai pelegrins, trasformât in albierc di lus, l’istitût pe lenghe e pe culture galiziane, i cuartîrs dal marcjât, dai mistîrs, lis stradis che a rivavin i pelegrins, lis glesiis, lis buteghis, ma dut armonizât, cence contrascj e cence sfuarçaduris. La soste e je stade curte, une sere e une dì, e in plui al jere un frêt cancar. Par chel o ai preferît gjoldimi la glesie. Grande, biele e devote. Mi soi passût a cjalâ la grande statue, dute rivistide di aur e di arint, par onorâ l’apuestul e salvâlu de devozion esagjerade de int, che e voleve puartâlu vie, un tocut parom, di memorie. E je usance di cjapâ il sant a bracecuel, pardaûr. Ancje jo lu ai strent, domandant che mi strenzi ancje lui, me e la int che o puarti simpri tal cûr par dovê e par brame. O ai venerât la casse indorade de cripte sot dal altâr, là che a saressin lis sôs relicuiis, inluminadis di une grande stele. Come che o ai dit, no mi à passât pal cjâf di domandâmi se a jerin propit i vues di Sant Jacum, dal moment che i vues no zovin nuie, nancje chei dai Sants. Tor ator dal altâr a son lis capelis, cun tal mieç la puarte sante che si vierç tal an Sant, che al scjât ogni volte che ai 25 di Lui al cole di fieste. Il prossim an Sant al sarà dal ’99 e a stan za preparantsi e preparant. Ma la capele che mi à plasût di plui e je stade chê cul tritic de Madone cul frut, Sant Jacum e un altri Sant. Un altâr dal ‘300, di une umanitât e spiritualitât che no si pues contâ. La Madone e à doi puntinuts lusints tal mieç dai voi e al somee che ti cjali fis. O ai pensât che no pues jessi brute la muart se tu âs doi voi cussì dolçs e umans che ti cjalin. Ce che o paiarès a tornâ a viodi chei voi!
Tra tancj altârs e altaruts e statuis e capelis, a ‘nd è une riservade a la adorazion e a la preiere personâl, come te catedrâl di Barcelone. E je la capele di Crist agonizant. Tal mûr a àn sgjavât come une grote, là che il Signôr al sude sanc e l’agnul al cîr di confuartâlu. Une robe che mi à impressionât a son i sfueuts che la int, di ogni etât, e met tes sôs mans in preiere e intun zeut poiât sul plan dal altâr. Ognidun che al à une domande di fâ, un probleme che lu tormente, une gracie che i covente, le scrîf tal sfueut e le met tes mans dal Signôr come se la gracie le domandàs lui. Intun altri altâr di cheste capele al è ancje un Bambin di Praghe, cu la tunicute blancje, la cotulute ricamade sot de tonie e lis scarputis. Ma la robe plui biele e je la muse di chest bambin: gras e taront come un dindi e cuntune cjavelade nere piês de zoventût che si viôt ator pes stradis. Ti vignive di piçâlu, di tant che al jere tombul e ninin. O ai vût gust di viodi, a diestre e a çampe de capele maiôr, une femine e un om, cun tant di non: Marie di Salome e Zebedeo, la mari e il pari di Sant Jacum. Par dî che ancje i sants a nassin come ducj e che la prime scuele di sapience e virtût si le à in cjase. Une clamade o mission prime che Crist al clami e al mandi. Se o fos un artist o un poete o fevelarès come che al merte dal puarti de Glorie, cu la colone de vite là che si va a meti la man. A fuarce di meti mans, a àn fate la buse. Di fat si jentre tal marmul cun ducj i cinc dêts. Al è li che si domande lis trê graciis che dopo Sant Jacum al sielç la plui adate. Jo o ai metût dome i trê numars, parcè che nancje jo no sai di precîs ce che propit al covente pe mê anime e pe mê vite e no ai volût cori il riscli di fâ come la canaie, che e strace une ocasion uniche par domandâ un gjelât. Adalt a son figurâts i profetis e i apuestui e plui in alt ancjemò, a corone, i 24 viei de Apocalìs cui struments musicâi in man. Une armonie di storie, di art, di significazion, di simbologjie, di misteri. Chês statuis a son masse bielis par no jessi umanis, ma a son masse spirtuâls par no jessi divinis. I pelegrins, cjatantsi dopo des traversiis e dai pericui dal viaç, denant di dute cheste sante compagnie, a scugnivin pensâ di jessi rivâts in paradîs, di jessi za in glorie. I turiscj pelegrins a restin impressionâts dal botafumeiro, il grant turibul che al ven tirât cu lis cuardis e fat zirâ par aiar dilunc fûr de navade. Une usance nassude forsit par resons igjenichis, cun tante int che e rivave tes sagris di ogni bande e in ogni stât e condizion, che dopo le àn fate deventâ la grande atrazion. Di fat o soi convint che, cuant che a tachin a tirâ chest turibul, la int e je tant intente a cjalâlu che a podaressin puartâ vie ancje Sant Jacum. Mi è vignût tal cjâf un fat, viodût a Salzburg. Dongje de puarte grande de catedrâl al jere un om cuntun organet a vendi planets. E i planets ju tirave fûr une simiute. E je rivade une sdrume di turiscj americans e, a pene viodude la simiute, a àn dismenteât catedrâl, Mozart e dut il sflandôr dal Sietcent. Ducj in file a spietâ cun pazience di jessi fotografâts dongje de simiute. Des glesiis che o ai viodudis in chest pelegrinaç, o disarai che te Sagrada Familia e sul Tibidabo no si preave; te catedrâl di Barcelone si jere invoiâts a preâ, soredut te capele dal Crist di Lepanto; te basiliche di Sant Jacum si scugnive preâ. Anzit si podeve ancje stâ li cence dî nuie. A preavin cun te e par te i claps, lis statuis, la memorie e i secui.
pre Antoni Beline