Ancje l’Osmer dal Friûl-Vignesie Julie al confluirà inte gnove agjenzie ItaliaMeteo, cun sede a Bologne. Il parê dal diretôr Micheletti
I procès di acentrament, sburtâts de globalizazion dai marcjâts, a son al ordin dal dì. Cheste tindince cjataraie aplicazion ancje intai cîi? La domande e je plui che legjitime, dopo che la leç di belanç 2018, tal articul 51, e à dât lûs verde pe nassite de agjenzie meteorologjiche nazionâl ItaliaMeteo che e varà sede a Bologne, tal Tecnopolo, dulà che si incjasarà ancje il data center dal Centri european di previsions a medi e lunc tiermin di Reading, in Ingletiere. Ironizant sul fat che il ministri dal Ambient, Gian Luca Galletti, al è ancje lui bolognês, cualchidun al à fevelât di un regâl ae sô citât (dopo il Zi magjic florentin a Palaç Chigi e la ore de Mortadele magjiche?), ma in chest câs la designazion si mostre pardabon supuartade di dâts di fat. Ce vuelial dî che in ItaliaMeteo a varan di confluî ancje i osservatoris regjonâi? Ce consecuencis sarano su la autonomie dal Osmer Arpa dal Friûl-Vignesie Julie, che dai 8 di Març si è trasferît li de sede de Protezion civîl regjonâl a Palme? O fevelìn cul diretôr, Stefano Micheletti che al è stât nomenât de Conference des Regjons intal Comitât di direzion de gnove agjenzie e che al sarà duncje in prime linie a difindi lis specificitâts dal nestri servizi regjonâl meteo.
Diretôr Micheletti, cualis sarano lis consecuencis de creazion de agjenzie ItaliaMeteo sul Osmer dal Friûl-Vignesie Julie?
«La leç e previôt che al sedi un coordenament fuart fra i servizis meteo regjonâi di cumò e la gnove agjenzie ItaliaMeteo, di realizâ cu la stipule di convenzions di pueste di colaborazion che a regolin i rapuarts mutuâi, i servizis che la agjenzie e pues ufrî aes realtâts locâls e vicevierse, i dâts, lis informazions che i servizis regjonâi a puedin di rimant fâ rivâ ae gnove agjenzie nazionâl, o midiant di une “confluence”, che al podarès volê dî pardabon un trasferiment di bens, risorsis e personâl des aministrazions publichis che a fasin servizis intal ambit de climatologjie e de meteorologjie bande la gnove agjenzie. Ce che al sucedarà intal concret al è ancjemò dut di definî e di valutâ. Chest test rivuardôs des Autonomiis regjonâls al ven ancje dal lavôr che o vin fat cu la Conference des Regjons a pet di un prin test dal Guvier plui incentradôr».
In ogni câs une grande rivoluzion…
«Sì, dal sigûr. Pe prime volte la Italie e podarès dotâsi di un servizi meteo nazionâl civîl dongje di chel militâr, cemût che al sucêt in grande part dai Paîs, delegât a furnî dâts, informazions, servizis e previsions a dut il mont socioeconomic. La particolaritât dal nestri Paîs e je la ricjece di sogjets coinvolts. Intes regjons dal Centri Nord, ma vuê ancje al Sud, a esistin servizis regjonâi che za a fasin cheste funzion. L’auguri al è che si puedi rivâ a un plui alt nivel di coordenament, cence gjavâ nuie aes specificitâts locâls, aes struturis che za a operin, ae lôr particolaritât in tiermins di misurazions, di presince sul teritori, di servizis aes comunitâts locâls».
Cuâl contribût specific dano i servizis regjonâi?
«Intun paîs svariât pe gjeografie tant che la Italie e je une grande varietât climatiche e meteorologjiche. La presince di servizis a nivel locâl e je duncje dal dut justificade. Chest nol gjave nuie ae dibisugne di coordenament di funzions che a van intal interès di ducj».
La indeterminazion de leç istitutive di ItaliaMeteo e sta però gjenerant preocupazions di une sô pussibile leture centraliste e incentradore…
«I pericui a son simpri. In chest moment no mi somee che a sedin incentradôrs i intindiments de riforme. La leç, cemût che e je saltade fûr dal passaç parlamentâr, e je avonde rivuardose des realtâts locâls, previodint une schirie di clausulis di difese. No mi somee che e puedi jessi disfrutade in clâf di acentrament o di stratificazion jerarchiche tra centri e perifarie. O viôt avonde une colaborazion paritarie. E sarà dal sigûr cure mê vuardiâ par che no sedin derivis di chel gjenar, propit parcè che la mê designazion intal Comitât di direzion e je espression de Conference des Regjons e des Provinciis autonomis, e duncje il gno mandât al è chel di rapresentâ – intune cun chei altris coleghis designâts – dutis lis realtâts meteorologjichis e climatichis locâls talianis».
Ise previodude za cualchi forme organiche di coinvolziment dai diretôrs dai servizis meteo regjonâi inte gnove agjenzie?
«Il statût al è ancjemò dut di scrivi. Al pues jessi, e magari ancje si podarès auspicâ, ma par verificâlu al bisugnarà spietâ. Al è clâr che al sarà un nucli centrâl di personâl par meti in vore dutis lis funzions di interès comun e par rapresentâ la Italie intai organisims meteorologjics internazionâi».
Ce timps si previodino?
«La leç e da timps dome pe costituzion dal Comitât di direzion. Par meti impins la agjenzie nol è realistic pensâ a timps curts, viodude la amplece dai compits e la varietât di interazions cui nivei regjonâi e i teritoris. Al sarès biel se al podès viodi la lûs in un o doi agns».
Il ministri Galletti al impute ai servizis regjonâi di no vê savût disvilupâ prodots meteo che, agregant i dâts locâi, a fossin in grât di imponisi a nivel nazionâl. Ise une critiche fondade?
«Un bon prodot meteorologjic in buine part dal Paîs al ven ufiert dai servizis meteo regjonâi, si sint però une mancjance a nivel di comunicazion, di difusion e di informazion. Al covente che a sedin elaborâts formâts fruibii par fâ cognossi a ducj i nivei la esistence di chestis informazions. Ca di nô, in Friûl-V.J., ducj a san de ativitât dal Osmer e dulà procurâsi chel gjenar di informazion, ma par esempli un turist forest o capìs che al puedi vê dificoltât di rivâi».
Cumò l’Osmer al è finanziât de Regjon. Cu la gnove agjenzie ancje il Stât metaraial bêçs?
«Cheste e je une altre des cuistions di sclarî. Par cumò la leç e finanzie dome la struture centrâl di ItaliaMeteo. Il finanziament des struturis regjonâls al sarà ogjet di analisi, di discussion e di negoziazion».
L’Osmer Arpa dal Friûl-Vignesie Julie cemût si metial a nivel talian in tiermins di cualitât e cuâl contribût specific puedial dâ a nivel nazionâl?
«O soi convinçût che o sin une struture di bon nivel, preseade e valutade ben ancje dai coleghis dal rest di Italie. O vin setôrs di ecelence. Intai agns passâts o vin lavorât tant sui radars meteo e sui temis de instabilitât atmosferiche (temporâi, tampieste…)».
Une altre ponte di diamant al è il coordenament strent cu la Protezion civîl…
«Ciert, ancje in chest moment mi cjati li de Protezion civîl a Sotselve di Palme, parcè che joibe ai 8 di Març propit chi e je stade la scree de gnove sede dal Osmer. E je une dimostrazion concrete e laboriose di cetant che la colaborazion e sedi strente. L’Osmer al costituìs il setôr meteorologjic dal centri funzionâl decentrât di Protezion civîl dal Friûl-V.J. La colaborazion no dome e je, ma e je ancje intime, di jutori strent».
Intai prossims agns in cuâi setôrs de meteorologjie saraial plui necessari fâ invistiments?
«Fondamentâl al è il teme des rêts di rilevament e di trasmission, parcè che la tecnologjie e va indenant. A laran fats invistiments direts su lis postazions sul teritori, e indirets in tiermins di radars e elaborazion di imagjins satelitârs intal ambit dal progjet european Copernicus. Al larà indevant ancje il disvilup de modelistiche previsionâl, che e impliche dibisugne di risorsis par implementâ la capacitât di calcul, cussì tant che l’adestrament des gnovis gjenerazions di personâl».
Ise juste la sielte di Bologne tant che sede de agjenzie nazionâl?
«O stimi che la sielte de sede bolognese e sedi plui che apropriade. A Bologne intai decenis al è stât fat un sisteme di infrastruturis e di centris di ecelence intai setôrs de meteorologjie e de gjeofisiche. Al è un servizi meteo regjonâl che al è chel plui robust e antîc in Italie. La Universitât si è ocupade simpri di fisiche de atmosfere e di meteorologjie. E dopo a son il Cineca, che al è il centri principâl di calcul nazionâl, i istitûts dal CNR che si interessin di meteorologjie, clime e fisiche de atmosfere. Cu la agjenzie ItaliaMeteo e il data center dal Centri european di previsions a medi e lunc tiermin di Reading (Ingletiere) si costituìs un pôl sientific une vore robust».
di Roberto Pensa
