Cungjò Dino Del Ponte, amì de Patrie e mestri di vite

Il mont de scuele, chel de musiche e ducj i furlans che a vuelin ben aes lôr lidrîs a vain pe muart di Dino Del Ponte, amì de “Patrie” e nestri colaboradôr. Un om gjenerôs e plen di voie di testemoneâ il valôr di fâ cressi i nestris fantats cu la braùre di jessi part di une gjernazie, di une divignince che si pee a un teritori e che e supe di lui dute la sô fuarce.
◆ Fevelâ cun Dino al jere simpri une lezion. Si imparave simpri alc, parcè che Dino al veve une formazion culturâl e une atenzion aes personis, fie di une grande esperience. Al jere vignût al mont a Muçane intal 1944 e par chest al diseve “o soi nassût in vuere, o vuei un mont di pâs”: la clâf par fâ sù chest mont e jere par lui la educazion dai zovins, e a chest obietîf al à dedicade dute la sô vite. Lavorant te scuele, ma ancje sburtant i zovins a creâ spazis di autonomie e di riflession, tant che orghins come la Consulte, che lu àn simpri viodût come un supuart fondamentâl.
◆ La cressite di une societât e à aes fondis la cussience dai fantats di podê deventâ protagoniscj dal lôr avignî: cheste e jere la convinzion primarie dal professôr Del Ponte, che dut câs nissun nol cognosseve cun chel titul parcè che par ducj al jere deventât il “preside” Del Ponte. Al veve direzût scuelis dal an dal taramot, cuant che al veve cjapade in man la medie di Maran, e tai agns Novante al jere jentrât in servizi intal Proveditorât di Udin par coordenâ i progjets cuintri de dispersion scolastiche. Tant al veve fat, che ducj lu ricognossevin come un om di alt nivel, zentîl e simpri siôr di riflessions spiçadis su la realtât in divignî.
◆ Sindic di Muçane dal 2004 al 2008, al jere atent ancje aes tematichis de autonomie, che par so cont e varès podût jessi un pont di fuarce ancje pal mont de istruzion. Del Ponte al à simpri spiegât a ducj che la scuele e à di jessi un pont di riferiment pe sô comunitât, e par chest la identitât dai teritoris no podeve jessi platade o dineade. Ancje intai ultins doi agns, cu la crisi determinade dal Covid, Dino al veve sostignût cun fuarce une “soluzion furlane” che la Regjon e varès vût di cjapâ in autonomie. “La fuarce de nestre scuele e je intes lidrîs de nestre int”, al è stât il titul dal ultin articul che nus à regalât: tal 2021 la sô fuarce e veve tacât a vignî mancul ma la sperance di rivâ a tignî bot cuintri des sgrifis dal destin no lu à ai molât. Cumò Dino, che al è stât grant apassionât di musiche e coordenadôr dal concors Organistic Internazionâl “Organi Storici del Basso Friuli”, al sint la musiche dai agnui che al à simpri cirût intes notis dai siei compositôrs plui preseâts: a nô, invezit, nus tocje fâ di mancul de sô vôs che e insiorave il nestri gjornâl e dut il Friûl. ❚