Al è spirât tor la une di gnot dai 19 di Dicembar il compositôr e grant inteletuâl de Cjargne Giovanni Canciani, une figure tra lis plui luminosis tal panorame de culture in Friûl. Il fondadôr des cjasis museu La Mozartina 1 e 2, che a conservin struments musicâi di grandissim valôr, comprendude une largje sezion dedicade ae storie dai struments a tast, al à lassât il so paîs Paulâr, la Cjargne e il Friûl intîr, cuntun vueit cetant dificil di jemplâ. I funerâi di sabide ai 22 Dicembar, inte glesie parochiâl dal comun de Val di Incjaroi, a àn viodût une partecipazion cetant grande di int, di estimadôrs, autoritâts, artiscj, amîs, par une cerimonie composte e cetant sintude, cu la presince di tantis corâls e di une orchestre di afezionâts che e à sunât diviersis composizions scritis dal mestri Canciani, un artist plen di ispirazion e di profonde umanitât.
Un erudît di altris timps, dotât di une memorie enciclopediche, di une culture sterminade e di une curiositât cence fin, paron di tancj savês che a tocjin la musiche, la piture, la leterature, l’artesanât artistic, includude la liutarie, ma ancje la botaniche, la gjeologjie, la medisine e altris siencis e dissiplinis. Un vêr savi, un grant cognossidôr, plen di umanitât e di spirt votât ae filantropie, par un bagai di savês coltivâts dilunc dute la vite, cun grande pazience e perseverance.
In plui di un patrimoni museâl grant e svariât, al lasse une schirie di intervents votâts ae tutele dai bens artistics de Cjargne, come i tancj rifasiments dai orghins liturgjics, lis ativitâts dedicadis al Museu Cjargnel, tant che il restauri dal clavicembal dal Sîscent de famee Linussio e dute la sezion dedicade ai struments musicâi di tradizion popolâr, cence dismenteâ la sô opare par rimeti in lûs il Palaç Calice di Paulâr. Al lasse cetantis composizions e dutis di otime fature par diviers organics, comprendût l’Imni de Cjargne “Carnorum Regio” e chel de Regjon “Decima Regio”.
Un om, il professôr Canciani, che al à semenât, come nissun altri, l’amôr pe culture ai zovins, savint creâ tal timp un grup di arlêfs che lu àn seguît in dutis lis sôs ativitâts, come la realizazion di centenârs di concierts, concors musicâi, cunvignis, mostris, laboratoris, iniziativis, ogni an in tantis localitâts dal Friûl. E propit chescj zovins si son votâts a continuâ cu la stesse passion la sô grande opare, inte volontât di memoreâlu simpri e cun costance, e pandi – come che al faseve lui – l’amôr pes robis bielis, buinis e justis.
La passion pe musiche al mestri Canciani i jere scomençade di zovin, cuant che al veve tacât i studis cun Giovanni Pigani e Enrico De Angelis Valentinis al Conservatori Tomadini di Udin, inte classe di pianoforte e composizion, par dopo diplomâsi ancje al “Verdi” di Torin cun Ferdinando Centemeri, in musiche corâl e direzion di côr, oltri a vê studiât al Istitût Rosmini e al Regina Margherita simpri tal cjâf lûc dal Piemont, indulà che al à operât tal mont de culture par plui di cuarante agns insiemi cun grandis personalitâts tant che Franco Antonicelli, Marziano Bernardi, Guido Aristarco, Massimo Mila, nomenât tra l’altri ispetôr onorari dai bens artistics dal Piemont. Tornât in Cjargne tai agns ‘90, al è stât ancje sindic de sô comunitât, tacant la grande imprese di nobilitâ, midiant di une profonde cognossince de storie, la culture in Cjargne. ❚
Alessio Screm
