Cungjò, pre Laurinç

Un cîl cjamât di nûi lu à vaît, adun cu la sô int di Cjargne. Chê Mari dal Friûl che al veve sielt 43 agns indaûr par puartâ indevant la sô mission di pastôr, dulà che invezit dispès i predis a vignivin mandâts a purgâ plui che i pecjâts, il no jessi masse in sintonie cu la jerarchie.
Par bonsignôr Laurinç Dentesan, plevan de plêf di Sante Marie in Guart, nassût a Bicinins ai 14 di Lui dal 1941 e mancjât tra vinars ai 11 e sabide ai 12 di Setembar di chest an, invezit chei paisuts su lis monts a jerin deventâts la sô vite. Un percors di fede e di umanitât scomençât e puartât indevant cun cussience e passion. Cjaminant simpri tal mieç de int e condividint la strade cun pre ‘Sef Cjargnel, compagn di scuele e di tantis bataiis, che cumò al reste a frontâ il vueit lassât di un om che pe sô energjie, pe sô presince, pal so jessi cussì sclet al mancje une vore.
La plêf di Sante Marie in Guart lunis ai 14 e jere stracolme di int, la tô int, la tô famee.
Tra lis lagrimis però plui di cualchidun o pensi che al vedi imagjinât il to coment ae fin di un funerâl celebrât par talian. Cuissà ce che tu i varessis dit a un vescul che, tra lis tantis bielis e meritadis peraulis di memorie e laude pal to impegn di pastôr, no si è “impensât” di dî nancje un “et” par dute la fuarce spindude par fâ in maniere che la lenghe furlane no sedi lassade fûr de glesie, par che e vedi chê dignitât che i sorestants ancjemò in dì di vuê a dinein. La fadie par vê in lenghe furlane la Bibie, il Lezionari, il Messâl, la riscuvierte dal patrimoni dai cjants patriarcjins… tu e pre ‘Sef jal vês racomandât ancje a Pape Francesc, ai 18 di Jugn di chest an, cuant che cun altris predis us à ricevût a Sante Marte in ocasion dai vuestris 50 agns de ordenazion… Ma si viôt che in borc di Trep forsit nol sofle l’aiar dal Concili Vatican II.
Juste un an indaûr, propit tu tu vevis ricuardât chê messe dai 28 di Avost dal 1974. Adun cun chei altris amîs di Glesie Furlane, pre Checo, pre Antoni e pre ‘Sef prins di ducj, o jeris vignûts vie di Zui parcè che no us vevin permetût di celebrâle par furlan. In Guart par fortune almancul pre Loris al à cjantât il Vanzeli te nestre marilenghe, ma se tu fossis stât tu daûr di chel altâr, dal sigûr no sarès lade cussì.
La tô vite e je stade la declinazion concrete de Glesie Mari di Aquilee: une ‘rusticitas’ di peraulis scletis e fats concrets. E se ancje il vescul di Rome al à racomandât che la Glesie e à di tornâ a cjapâ sù l’odôr des sôs pioris, dal sigûr chê racomandazion no ti vignive a ti, che fin dal principi tu âs metût in pratiche dì par dì chel “restâ cu la int”, par une Glesie incjarnade fin insom.
Cumò che tu sês tornât te cjase dal Pari e tu âs tornât a cjatâ pre Checo, pre Toni, la tô int, tegninus une man sul cjâf e stânus dongje par che i tiei insegnaments di vite e la tô grinte nus segnin ancjemò la strade, come chel salustri che tal cimitieri de Plêf nus à scjaldâts sot di tante ploie, e che o ai sintût tant che un to salût e confuart.
Al è uman e comprensibil domandâsi parcè che ti à puartât vie, ma inmò plui just e cristian al è vê agrât al Signôr par vênus dât la gracie di condividi un toc di strade insieme.
Mandi, pre Laurinç. ❚
Christian Romanini
****
A pagjine 10, un altri ricuart di pre Laurinç e un scrit
di pre Toni dedicât a lui. ☛