CURTIS E CHE SI TOCJIN. Emigrazion îr, vuê e doman

Il prin e il doi di Avost passât, o soi stât a Gardiscje dal Lusinç, dulà che l’Ent «Friûl tal Mont» al à organizât l’incuintri anuâl dai emigrants furlans, sparniçâts ator par ducj i continents de Tiere.
O soi stât ancje ai incuintris dai emigrants furlans fats culì e intal forest tai agns Setante. Cambiadis lis situazions e i timps, a son cambiâts ancje i contignûts di chest metisi adun. Tai timps passâts si cjatavin devant di une emigrazion di masse e obleade, parcè che chenti nol jere lavôr. E alore i temis dai incuintris a jerin su lis condizions di vite e di lavôr, sui rapuarts cui sindacâts dai lavorents, cu la int e cu lis istituzions di fûr, su la pupilance di gran part di lôr che a jerin muradôrs e operaris tes fabrichis. Ancje in chel timp, la nestre int e sintive il leam fuart di identitât, la nostalgjie pes fameis lontanis e pe nestre tiere. Il metisi adun tai Fogolârs furlans e tai Circui dai emigrants furlans al jere un suplî in calchi mut ae lontanance de Patrie e aes umiliazions che cualchi volte i nestris fradis a jerin obleâts a cjamâsi su pe schene.
Vuê la situazion e je cambiade in maniere sostanziâl. La emigrazion e esist ancjemò, ma par fortune no je dal dut obleade, ni di masse. A Gardiscje, insiemit ai vecjos emigrants tornâts in Friûl tai agns passâts par meti in pîts cetantis aziendis artesanis nassudis come foncs ae fin dal secul passât, a jerin presints lis pontis significativis de emigrazion furlane di vuê. Di chei che no partissin plui cu la valîs di carton leade cul spali ma, come che si dîs cumò, cu la valisute tecnologjiche. Si trate, volìn dî, di une emigrazion cualificade, di lavorents diplomâts e magari laureâts, di managers che un grum di voltis tal forest a son deventâts impresaris par cont lôr o che a son compagnadôrs di impresis furlanis che a lavorin in cooperazion cun altris dal puest o che lis implantin di plante fûr.
In ducj chescj furlans, sedi des primis ondadis che di cumò, e je simpri stade e e je ancjemò presint no dome la cussience de proprie identitât, val a dî di apartignince al popul furlan, ma ancje la braure di jessi fîs di une tiere, che tal mont a àn savût jessi preseâts e considerâts. Cjapâts a vore e a vivi in Paîs che no cognossevin prime, a àn fat in mût, cui lôr valôrs, di vuadagnâsi une buine convivence cun tancj forescj e cu lis lôr comunitâts e di puartâ achì cheste mentalitât vierte di solidarietât umane aes diviersis culturis, cuant che a son tornâts. Ancje cumò che, in situazions invertidis, il Friûl al è deventât tiere di imigrazion, chei valôrs a son di atualitât.
Di chescj sintiments, vivûts in mût sclet, ducj i furlans che a vivin chenti – e specialmentri tancj politics – a varessin simpri di visâsi par rinfuarçâ ancjemò une volte l’impegn te bataie par fâ tornâ il Friûl simpri plui furlan, cussient de sô identitât linguistiche, storiche e culturâl. Viert a dutis lis contaminazions etnichis come tal passât, e ae necessitât di dâi, ae nestre tiere e al so popul, unitât e autoguvier.