CUSINE. Fedêl ae linie… ma la “linie” parcè?

Se o domandais a un cogo cuâl che al è l’aspiet plui impuartant e impegnatîf par mandâ indenant la cusine di un ristorant, no us disarà “inventâsi plats gnûfs” ma pluitost rivâ a cura lâ gjestion interne de cusine, in ordin, di vê simpri dut pront par frontâ une sala plene, ma tal stes timp di no vê vanzums, che a son une pierdite pal locâl.
Parcè che ducj si imagjinìn il cogo che, in cinc minûts, al prepare dut in timp reâl. Ma la logjiche e dîs che nol pues jessi cussì, parcè par sigûr cierts ingredients a àn di jessi parecjâts ben prime.
E alore si discuvierç che il segret al sta intune buine organizazion. Lessâ lis verduris, parecjâ i filets di pes, involuçâ sù i tocs di cjar di meti tal ultin moment te padiele, organizâ prime i pignatons de polente o de paste, par vêju pronts par cuant il client al domandarà. “Fâ la linie”, come che a disin lôr.
Chest al è, naturalmentri, vêr mistîr. Ma al pues jessi ancje un model interessant par une cualsisedi femine di cjase che e volarès meti tal plat simpri alc di san e di difarent, ma che par solit no à timp e si cjate a vê di sielzi simpri la robe plui svelte.
E alore, un consei al pues jessi: “imparìn dai cogos”. Imparìn, ancje a cjase, a resonâ un tic “fasint la linie”. Che al vûl dî, par esempli, dopo fate la spese, cjapâsi une orute di plui par parecjâ une schirie di ingredients di vê pronts par dute la setemane, che a sedin la base par une pastesute, il contor de fetine o ancje la imboconade par une idee origjinâl.
Timp che al pues semeâ pierdût, ma che ae fin de setemane si pues discuvierzi che al è sparagnât cuant che si à presse, e che al garantìs une cualitât miôr dal gustâ e, robe no di pôc, une gjestion plui sparagnine de spese alimentâr. Butìn li cualchi idee…
VERDURIS CUETIS
– Intant che si met vie la spese, par esempli, si pues tacâ a meti a netâ e a lessâ dute une schirie di verduris. Cicorie, spinaze, blede (ma ancje rondelis di carote, fetutis di fenoli o pontutis di cauliflôr): si rive a cjase e come prime robe si le taie e si bute inte vaporiere o te pignate a pression, e, intant che si finìs di disvuedâ i sacuts, si à di bielzà la verdure pronte pe setemane (baste lassâ disfredâ e suiâ 10 minûts, striçâle da la aghe di masse e po dopo metile intune scjatule di plastiche tal frigorifar, ben sierade).
–  Foncs champignons, bielzà netâts e taiâts a fetutis sutilis, di passâ 5 minûts te fersorie cun vueli e ai, e si à un gamelin di foncs trifolâts che a van di cane ancje dopo un pâr di dîs par un tocji, par une scalopine o par un risot.
– Une fersorie plene di melanzanis a daduts, rustidis simpri tal vueli e ai e magari cuntune spolvarade di pevaroncin: a son bielzà un bon contor  ma a puedin jessi ancje la base par une pastesute, con doi pomodorins o un tic di ton.
– Cuntune mieze ore di timp di plui e une piçule gridele eletriche, si puedin parecjâ rondelis di melanzanis, strissulis di zuchins o fetutis di pevaron a la grilie, che a son simpri une buine soluzion di tignî pronte tal frigorifar, par un gustâ svelt o par une emergjence.
PES NO DOME DI VINARS
Il marcjât dal pes par solit al rive une volte a setemane, ma nol è che si vedi di mangjâ pes dome chê dì… I sardons, curâts a pene rivâts a cjase, a puedin stâ tal frigorifar par une zornade o dôs, baste che a sedin ben netâts e suiâts. E compagn un toc di ton o di pes spade che, se taiâts a daduts e subit saltâts te padiele, a puedin stâ li cuets intune scjatule par un pâr di dîs, pronts par improvisâ une pastesute fantastiche di emergjence.
E il bon vecjo sgombri… Se comprât fresc e subit netât e lessât (magari te vaporiere), al pues jessi metût tal frigorifar sot un got di vueli, e nol sarà nancje parint de variante industriâl…
IL MISTÎR DAL BECJÂR
Se par câs o lais in Slovenie une volte a setemane a comprâ la cjar, no vês di mangjâle dute subit (fevelant par chei che no àn il conzeladôr). A pene rivâts a cjase, cinc minuts par cjapâ une fetine e fale deventâ un involtin, o par jessi taiade a strissulis par une “pizzaiola”. Cinc minûts a pene rivâts a cjase, e no si varà di rassegnâsi par fuarce ae gramece de fetine su la lastre.
ANCJE I VANZUMS A FASIN SPARAGNÂ TIMP
Cuant che si fâs la polente, fâle simpri bondante e chê che e vanze metile ben sierade tal frigorifar. Di sere, cuant si rive tart e si à pôc timp, ve pronte une polentute di taiâ a daduts e di scjaldâ e cuinçâ cun pomidoro, ragù o cun spongje e scuete: e vâl ben i miôr macarons! ■
Margherita Timeus