CUSINE. Un Nadâl dolç dolç cui piçui scaletîrs

Il Nadâl dal sigûr al è la fieste dai fruts: l’arbul e il presepi in tantis fameis a son fats dispès tant che un zûc pai canais. Ancje in timps di crisi no si pues fâ di mancul di pensâ a fâur cualchi regalut, e – soredut – tal periodi des fiestis no so regulis di sane alimentazion, ma invezit a imperin cence limits i dolçs. Chei che si comprin pronts (paneton, pandoro, mandolât), ma ancje chei de tradizion, magari preparâts in cjase.
E une biele idee, par un Nadâl calorôs in famee, e pues jessi propit chê di metisi in cusine clamant i fruts a fâ di assistents, par zuiâ ai “piçui scaletîrs” e par preparâ grandis vuantieris plenis di biscots fumants. Biscots che a puedin jessi fintremai – insieme a mandarins e pomis secjis – une maniere par  zuiâ a decorâ l’arbul in maniere origjinâl, di savôr plui domestic e ecologjic di chel cun balutis di plastiche o lusutis eletrichis, ma ancje par preparâ un pinsirut di Nadâl fat personalmentri dai fruts pe mestre o pai vons…
Viodìn cualchi ricete, “robade” massime de tradizion da la Austrie, dulà che fâ i biscots di Nadâl in cjase al reste une usance une vore popolâr.
FROLINS DI NADÂL
A son biscotuts di paste frole fats – par ½ chilo di farine – cun 4 ûfs, une bustine di levan, un pêl di arome di vanilie, 250 gr. di spongje, un gotut di lat, scusse gratade di limon e di narant, 250 gr. di zucar. Une volte fat l’impast e tirât sutîl cul mescul (e tante farine li pronte par no fâlu tacâ te bree di lavôr), i fruts a puedin passâ dut il dopodimisdì a taiâlu cun stamputs di dutis lis formis (stelutis, besteutis, rondelis, agnuluts…), di meti dopo – clarementri cu la assistence di un adult – su la plache tal for cjalt, 5 minûts, e gjavâju juste prime che a deventin scûrs. E magari ancje divertîsi a decorâju une volte disfredâts, cun glasse di zucar, colôrs alimentârs, balutis di zucar coloradis, marmelade tal mieç di doi biscots, cjocolate fondude. Fasint une buse in ogni formute, prime di metile tal for, si puedin ancje otignî decorazions origjinâls di picjâ sul arbul, cuntune curdele colorade e slusinte.
FIERS DI CJAVAL  AE VANILIE (VANILLEKIPFERL)
A son piçulis miezis lunis di paste frole preparadis cun tante spongje (210 gr., montade a sbrume a temperadure di ambient) e pomis secjis masanadis finutis (mandulis, coculis, nolis o ancje un miscliç di dut, par un totâl di 100 gr.), insieme a 280 gr. di farine, 100 gr. di zucar, un got di rum e une gratade di scusse di limon.
Si fâs l’impast e po dopo si fâs sù a curdelis tant che pai macarons (un centimetri di diametri), di taiâ a tocs luncs 4-5 cm, e di poiâ te plache dal for a forme di fier di cjaval. Passâ tal for juste il timp che si indurissin, prime di tacâ a brunîsi e – une volte disfredâts – spolvarâ cun zucar a vêl. Facilissims, ma un consei impuartant: cirî di lavorâ intun ambient fresc, lontan dal for, parcè che se no la spongje dal impast si pastroce masse e no lasse impastâ.
BUSSADIS DI SIORE (BACI DI DAMA)
L’impast al è compagn dai Kipferl ma invezit che preparâ piçui fiers di cjaval, si fasin piçulis balutis di fracâ su la cjarte di for, tant di vê tancj “emisferis” che – une volte disfredâts – si “bussin” a doi a doi fasint tantis balutis, cun tal mieç un tic di cjocolate fondude, in funzion di une gjoldibile…cole!
BRUTS MA BOGNS (BRUTTI MA BUONI)
Si prepare un impast une vore grês, con tocs grues di cjocolate fondente, nolis taçadis gruessis, ue calabrie, zontâts a 300 gr. di farine, 3 ûfs, 200 gr. di zucar e une bustine di zucar vaniliât. Fâ strissulis avonde lungjis di stâ tal for e largjis un pâr di centimetris; poiâlis su la plache e meti tal for a 200 grâts par 25 minûts. Tirâ fûr e taiâ lis strissulis ancjemò cjaldis in tocs di plui o mancul un centimetri.
STRUDELUTS DAL SOLDÂT (SOLDATENFREUNDE)
Preparâ une sorte di sfolie cun 200 gr. di farine, une sedonute rasade di levan, 150 gr. di zucar, une bustine di vaniline, zontâts a un ûf, un ros dal ûf e un pâr di sedons di lat, di tirâ in strichis lungjis tant che la plache dal for e largjis 10 cm. Tal mieç, meti une farsidure fate cun 60 gr. di cjocolate fondente, 40 gr. di nolis e 100 gr. di pomis cuinçadis, dut taçât grues, e sierâ lis strichis di paste tant che piçui strudel, ben strucâts. Pinelâ cul blanc dal ûf sbatût e passâ tal for cjalt juste chel tant che la paste e tachi a indorâsi. Tirâ fûr e taiâ i strudeluts ancjemò cjalts in fetutis di un centimetri, cuntun curtis a see (e tante gracie, parcè che al è facil rompiju!). ■
Margherita Timeus