Dopo doi secui di polse, dal 2000 la sfide e torne a fâ scombati i borcs
Ai 18, 19 e 20 di Avost si celebre a Cividât la edizion numar XXII dal Pali di Sant Donât, che al pee il so non al Sant Patron de antighe citadine furlane.
◆ Il Pali al previôt une serie di competizions che a cjapin dentri i cinc borcs storics cividins (Domo, Sant Pieri, Sant Domeni, Brossane, Dal Puint) e che a consistin in garis pedestris e di tîr cul arc e cu la balestre: il borc vincidôr al è chel che al cjape plui ponts sumant la gare pedestre a chê dal arc, e al conserve il Pali (costituît di un confenon ornât cu la figure di Sant Donât) inte Glesie dal so borc.
◆ Cumò, la ricorence e cole intal fin di setemane plui dongje de dì di Sant Donât, che e je ai 21 di Avost; lis sôs origjins a son però cetant antighis e in part discognossudis.
No je di fat dal dut definide la ete esate cuant che al è tacât il Pali, ancje se la opinion plui slargjade al coloche lis origjins tor dal secul XII.
◆ La prime prove sigure e documentade de sô esistence e rimonte al 1361, an che il Cjamerâr Oldorì al à regjistrât lis spesis sostignudis propit pal so davuelziment: in origjin, l’event al consisteve massime in incuintris tra balestrîrs, arcîrs e po dopo arcabusîrs, e ognidun di chei al rapresentave o un cjistiel, o un borc citadin, ancje di altris citâts e no dome di Cividât.
Daûr de tradizion, i vincidôrs a vevin ricompensis ricjis pe lôr abilitât, massime tiessûts cetant preziôs; l’ultin classificât al cjapave invezit un sparvâl, un purcitut o un gjal.
◆ Dal an 1365 al è rivât invezit un document che al ripuarte il regolament dal Pali de epoche, che al fissave che il cjaval vincidôr, une volte otignude la vitorie, nol podeve plui concori, e che il stes al valeve pal vincidôr de corse pedestre.
◆ Ai 20 di Avost dal 1368 al vignì decretât in maniere uficiâl che il Pali si ripetès “in perpetui”, e chest al confermave la impuartance come celebrazion che e conferive grant lustri ae siore citadine di origjin romane. Il Pali duncje al è lât indevant fin al 1797, cuant che si à scugnût par fuarce fermâsi par vie de ocupazion napoleoniche.
Intal 2000 si à decidût di ripuartâ ae lûs la tradizion antighe, ambientant lis ativitâts, lis musichis e i costums inte seconde metât dal secul XIV, cuant che al guviernave il Patriarcje Marquart von Randeck.
◆ La sielte e je motivade soredut dal fat che cheste ete e je stade tra lis plui impuartantis di simpri pal Patriarcjât e pal stes Friûl: prin di dut, in chê epoche Cividât e jere sede dal Patriarcjât di Aquilee e e à vivût il so periodi di massime potence jurisdizionâl sot dal guvier di Marquart. Il non di chest ultin al passarà ae storie dal Friûl ancje par vê fat butâ jù,intal 1366, une racuelte di leçs di slargjâ a dute la Patrie dal Friûl, cognossudis tant che “Constitutiones Patriae Forojulienses”. Chestis a coniugavin principis etics e politics in maniere esemplâr e cetant inovative pe epoche, par organizâ intal mût miôr e plui coret la comunitât dal Patriarcjât. Il valôr dal contignût di chestis leçs al vignì riconfermât plui tart, cuant che il guvier de regjon al è passât a Vignesie; la Serenissime lis à revisionadis cun grant scrupul e cure, e il gnûf test legjislatîf revisionât al è restât in vore par ben doi secui e mieç.
◆ Di chescj fats storics si dedûs, duncje, cuale che e sedi stade la impuartance di chest periodi storic pe nestre regjon e soredut par Cividât, e la consecuente sielte di ambientâ l’event tradizionâl propit in chê volte.
Vuê Cividât e rapresente il palc perfet par dâ acet a cheste tradizion, viodude la sô struture, i siei puescj carateristics e lis sôs atmosferis medievâls plenis di un di incjant inmagant.
In chestis trê zornadis di fieste l’intratigniment no si limite aes sfidis tra i borcs, ma si inricjìs ancje di plui di 500 figurants, cun tancj spetacui di tambûrs, gaugars, mangjefûc, bufons e musics, bancuts dulà che si vendin tancj manufats artesanâi, propuestis di zûcs che a vignivin doprâts intai timps antîcs, e la disponibilitât che – clâr – no pues mancjâ, di bevandis e di savôrs dal nestri passât. ❚
