Dal 2024 al 2025, preocupazions vecjis e gnovis in cont di lenghis e dirits

Se de interpretazion dal Pignarûl Grant di Tarcint al salte fûr che il 2025 al sarà un an che al domande fature, atenzion e sparagn, lant daûr di ce che al nas in Europe e a nivel internazionâl la impression e je che la situazion e ledi ancjemò dilunc a jessi grivie e penze o almancul une vore preocupante, in continuitât cun ce che si à viodût inte ultime part dal an passât, massime cun riferiment a dirits di fonde, pluralisim linguistic e culturâl, autoguvier, disvilup sostignibil, convivence e pâs.
◆ In cont de minorizazion linguistiche e cun specific riferiment al mont de scuele, l’an gnûf al è tacât cun diviersis situazions di dificoltât, par esempli intai Paîs Catalans. Salacor lis cundizions piês a son chês che a tocjin la Catalogne dal Nord, dentri dal Stât francês, là che lis scuelis paritariis cul catalan prime lenghe de rêt “La Bressola Escola Catalana” a son impegnadis intune vere e proprie bataie pe sorevivence. La cuistion e je in chel istès economiche, operative e di rapuarts istituzionâi, stant che a coventin almancul 600 mil euros par mantignî in vore dute la ativitât didatiche che e ven metude adun de bande dai diviers istitûts e chest al tocje ancje i rapuarts cul guvier centrâl e cu lis aministrazions de Regjon Ocitanie (entitât teritoriâl e aministrative che e cuvierç dome une part de Ocitanie storiche e che e cjape dentri ancje la zone catalane dal Rossilion) e dal Dipartiment dai Pireneus Orientâi, che ur ven domandât un aument dal 5% dai finanziaments publics e garanziis di sostance par lâ dilunc a “fâ scuele” ancje par catalan. Par intant “La Bressola” e à inviât ancje une racuelte di fonts, clamant dongje la int de Catalogne dal Nord. Cun di plui, se des istituzions publichis no rivarà une rispueste di sest, la int e larà in place ai 15 di Març.
◆ Lis robis no van nuie ben nancje a Sud dal confin tra Stât francês e Stât spagnûl. Intal Paîs Valenzian, in particolâr, e je in vore la gnove leç di “segregazion linguistiche”, fate buine de maiorance autonomiche di diestre, che di fat e ridûs une vore la presince de “lenghe proprie” intes scuelis e inte societât, e cuintri di chê e je in vore une grande mobilitazion sburtade de bande dal moviment Escola Valenciana, impegnât in diviersis iniziativis di proteste cuintri dal model educatîf reazionari e conservadôr fat indenant dal guvier valenzian. Cun di plui, preocupazions in cont de scuele e in particolâr dal mantigniment e dal disvilup dal model educatîf imersîf, cul catalan prime lenghe intes scuelis publichis, a vegnin indenant ancje in Catalogne, cemût che e mostre la ativitât plui resinte de rêt “Som Escola”.
◆ La politiche linguistiche no tocje dome la scuele, ma ben ancje ûs publics de lenghe, media e produzion culturâl. Di chescj diviers aspiets e cuntun riferiment specific ae dimension digjitâl e tecnologjiche, cemût che e mostre la presentazion dal studi “Against digital diglossia” si à fevelât ai 30 di Zenâr stâts a Barcelone inte suaze di une conference internazionâl inmaneade de Fondazion Coppieters e di une schirie di entitâts catalanis tant che il Ciemen e l’Institut d’Estudis Catalans. Al è saltât fûr a clâr che cence di une politiche linguistiche di sest, coordenade, struturade, ben finanziade e in stât di cuvierzi ducj i cjamps che a coventin, no si va di nissune bande.
◆ Al è ce che si à viodût ancje a Rome ai 12 di Dicembar stâts, in ocasion di une cunvigne inmaneade cu la colaborazion dal Senât de Republiche taliane in ocasion dai vincjecinc agns di “vite” de Leç di tutele des minorancis linguistichis storichis 482/1999: la sô aprovazion, un cuart di secul indaûr, e je stade un risultât impuartant, però, magari cussì no, la plui part des sôs previsions, tra istruzion, media e aministrazion publiche, a àn ancjemò di di jessi metudis in vore… ❚