Il sodalizi citadin, une des Associazions Sportivis plui preseadis dal firmament furlan e talian, al vûl lâ dilunc cul percors segnât dal president storic Marcello Zoratti
Sessante agns, une vite interie, massime se si fevele di une ativitât sportive. Un travuart che la Associazion Pesistiche Udinese e à festezât intal mês di Novembar, inte sô cjase, tal palaç dal sport “Manlio Benedetti” a Udin, intune biele fieste, cun tante int e tancj amîs.
◆ Al nol jere fisichementri presint il president storic, Marcello Zoratti, il dirigjent che intal 1967 al à cjapade la carghe di vuide e le à tignude fintremai intal mês di Avrîl dal 2023, cuant che une malatie lu à distudât. Dut câs, il spirt, i insegnaments, la personalitât di Marcello si nasavin tal aiar dal palasport, vie pe fieste, indulà che al è stât presentât ancje un libri cu la storie dal sodalizi.
◆ Al jere il prin di Jugn dal 1963, denant dal nodâr Bronzin a Udin, cuant che Franco Degano, i fradis Giovanni e Marcello Zoratti, Antonio De Zorzi, Ivano Brianese e Giuliano Zoratti a firmarin l’at costitutîf de Associazion Pesistiche Udinese. Bielzà di dîs agns a fasevin ativitât dentri dal Ricreatori Festîf Udinês e a vevin otignût titui talians e organizât manifestazions di nivel. Chel moment costitutîf al jere dome la consecuence formâl di un percors aromai vincent. In di di vuê, a son 24 Societâts in Friûl-Vignesie Julie e dibot 3.800 atletis che a fasin pesistiche: dut al è nassût dal lamp impiât di chel moment.
_
Par capî cui che al jere Marcello Zoratti al baste sintî lis peraulis di chei che lu àn cognossût.
“A son personis che a deventin grandis fasint sport – al à dit Enzo De Denaro, delegât dal CONI di Udin – e a son personis che a fasin deventâ grant il sport. Marcello Zoratti al jere un di chei”. “La Pesistiche Udinese – lis peraulis dal professôr Flavio Pressacco, president dai Amîs dal Benedetti – e à simpri pandût il sô messaç di fâ ativitât cun umiltât, passion e spirt di sacrifici. Jo o zonti ancje la peraule orgoi. La gjenerazion di Marcello, chê dai agns Cincuante, nassûts in timp di vuere, e à interpretât in maniere straordenarie chei timps. Une gjenerazion che e à vudis visions e spirt di iniziative che, in pôc timp, al è deventât un pont di riferiment par ducj”.
_
Amicizie e agrât.
“La Pesistiche – al ricuarde Claudio Bassi – e je stade une seconde famee, in tancj câs la prime. Marcello al è nassût di une famee di contadins e al à simpri pensât a semenâ e a racuei. Impussibil dismenteâ dut ce che o vin fat: o jerin une scuadre pardabon e o vin vude une vere scuele di vite”. “Di Marcello o ai imparât dut – al à confermât Ernesto Zanetti -: al rivave a tirâ dentri une vore di int, cun capacitât, sensibilitât e autoritât. Par tant timp, o sin lâts ator pal mont e, pardut, la stime e jere clare”.
_
E cumò, si pense a lâ indenant.
“Cjapât dentri intal gno lavôr – al à dite Luca Zoratti – no ai dât cuissà ce ae Pesistiche intai agns. Al jere gno pari simpri presint e, cumò che nol è plui cun nô, nol è scontât rivâ a lâ indenant. Dut câs, daspò de dì dal funerâl o ai vût tant di tancj, un jutori, une poie di tante int che e je stade dongje dome parcè che e jere amie di gno pari. Une disponibilitât, un calôr di ducj che mi àn fat pensâ che al jere just tirâ dilunc. E cun Enrico Zorzi o vin pensât di organizâsi par continuâ la storie de Pesistiche Udinese. Forsit cuntune logjiche organizative divierse di chê che al veve Marcello, dut câs simpri cuntun voli pes gnovis gjenerazions”. _
Une responsabilitât e un onôr vignî daûr de esperience di sessante agns di sucès.
“O ai tacât a fâ pesistiche intal 1982 – al à contât Enrico Zorzi – e o ai cjatât un ambient une vore positîf. Il merit al è stât simpri di Marcello, e cumò o vin voie di puartâ indenant il so messaç, colaborant cun ducj chei che a intindin la palestre di pesistiche tant che un pont di riferiment e che a dan simpri alc. No podìn sierâ: si din une man insiemi e o lin indenant”. ❚
:::::::::::::::::::::::::::::::::::::::::::::::::::::::::::::::::::::::::::::::::::::::::::
“CJALÂ SIMPRI LIS GNOVIS GJENERAZIONS: GNO PAI AL À LASSÂT TANT, PAR CONTINUÂ LA TRADIZION IN PEDANE”
“Sessante agns indaûr – al dîs il fi di Marcello Zoratti, Luca -, gno pari, insiemi cun tancj amîs e apassionâts de dissipline dal solevament di pês, al tacà une imprese che in dì di vuê o sin daûr a festezâ, ringraciant ducj chei che, intai agns, a àn fat il percors cun lui. O vin scrite la storie parcè che lui al veve voie di lassâ, aes gnovis gjenerazions, il ricuart di ce che al è e di ce che al è stât, e ce che al è stât fat dal sodalizi in dut chest timp. Il messaç, pai zovins, al è chel di lâ indenant simpri cun umiltât, passion e spirt di sacrifici, cun impegn e voie di fâ, cussì si rive lontan. Gno pari al à simpri cjalât i atletis zovins cun atenzion, parcè che al tignive iniment l’avignî de societât e al saveve che, dispès, i zovins si pierdin vie in tantis ativitâts e no rivin a impegnâsi pardabon. Par un om usât a otignî dut cu la passion e l’impegn, rivâ a trasmeti un messaç cussì al jere un pinsîr fis. Cun di plui, il libri dai sessante agns de Pesistiche Udinese al è par ricuardâsi dut ce che al è stât fat intal timp: iniziativis, sucès, manifestazions metudis sù, ideis, promozion dal teritori. Si pues dî che al veve voie di rivâ a chest pont, ae fin de sô cariere, par molâ daspò sessante agns e lassâ cu la sodisfazion di jessi rivât a fâ alc di bon, pardabon. Al sintive une vore fuarte cheste dibisugne”. ❚
::::::::::::::::::::::::::::::::::::::::::::::::::::::::::::::::::::::::::::::::::::::::::::
Une storie di vitoriis in pedane e di snait organizatîf
Plui di cent titui talians, plui di trente manifestazions metudis adun in Friûl e no dome. La Pesistiche Udinese e à une bacheche di no crodi. I nons dai atletis che a àn vût sucès a nivel talian e internazionâl a son une vore.
◆ Vanni Lauzana, di San Marc di Merêt di Tombe – il paîs plui sportîf dal Friûl, come che o vin scrit intal numar da La Patrie dal Friûl di Jugn dal 2022 – al à rivât a competi aes Olimpiadis dal 1992 a Barcelone, lant fintremai in finâl.
◆ Ancje Raffaele Mancino al à rivât a lâ aes Olimpiadis, intal 1996 a Atlanta, in Americhe: l’atlete pordenonês al à te bacheche cuatri titui tricolôrs senior, plui ducj i titui di zovin e une vore di presincis in events fûr de Italie.
◆ A nivel talian, il non che al ven sù par prin al è chel di Antonio De Marco: dîs titui talians,trê Copis Italie, un Criterium Nazionâl under 23 e cetancj records talians. Inte flôr ideâl dai protagoniscj de pesistiche furlane, di sigûr al è un dai miôr di ducj.
◆ E no si pues dismenteâ int come Antonio Batesta, Antonio Gori, Dino Marcuz, Piergiorgio Moreale, Adriano Sappa, i Vincenzi, i Calzolari e atletis e tecnics che a àn fate la storie, massime Ivano Brianese e i siei fîs, e Ernesto Zanetti. Chescj nons a son dome une piçule e cetant preseade part di dutis lis personis che, intai agns, a àn dât un contribût, plui o mancul impuartant, par scrivi une storie maraveose, di sucès e di costance, ricognossude in dut il mont.
◆ No dome risultâts. Si scuen pensâ aes manifestazions metudis sù de scuadre di Marcello Zoratti. Intal 1960, un incuintri internazionâl Italie – France, il torneu Alpe Adria a Codroip intal 1966, il prin di une lungje serie. La European Promotion Cup, une invenzion di Zoratti, compagn che il trofeu des Regjons a Statût speciâl, e i doi Mondiâi juniores a Lignan intai agns Otante.
Un sucès straordenari, dut une vore furlan. ❚
