1. Tal Cinccent, in plui dai spetacui de Comedie de Art, un dai intratigniments publics plui famôs di Udin e jere la corse dai taurs, vietade tal 1787, par vie dal pericul.
2. Il “non licet” des autoritâts eclesiastichis al à mandât in fum plui di cualchi rapresentazion. La censure no je dome dai secui passâts, ma si le à sintude ancje tal 1947, cuant che l’arcivescul di Udin, bons. Giuseppe Nogara, intune pastorâl intal Domo, al fevelà cuintri dal spetacul “Incontri con San Francesco” di Fabbrini, cu la regjie di Mutinelli (San Francesc al jere interpretât di Faglioni). Il vescul al disconseà ai predis di partecipâ al spetacul.
3. Ancje la storie dal Conservatori di Udin e je peade al mont dal teatri, stant che al è nassût su lis fondis de Societât dai citadins amants de musiche e dal teatri, fondade tal 1826 e logade parsore de Loze. Tai agns, l’istitût al à cambiât non plui voltis: la trasformazion in Conservatori Tomadini e je dal 1981.
4. A Udin e je esistude fintremai une “vie dai teatris” (vuê vie Bonaldo Stringher). Ai 2 di Jugn dal 1898 il Comun al refudà la propueste di cambiâi il non in “vie Felice Cavallotti”.
5. Stant a Nico Pepe, il drame di Pirandello “Come tu mi vuoi” al è stât dal sigûr copiât di “La statua di carne”, ultime opare dal autôr sandanielês Teobaldo Ciconi.
6. Pacifico Valussi, pari dal gjornalisim furlan e Reâl Comissari dal Friûl su nomine di Quintino Sella, al è stât ancje il fondadôr dal gnûf teatri furlan, cul test “Sang no je aghe” dal 1851.
7. Pai siei 80 agns, Adelaide Ristori e ricevè la visite dal re Vittorio Emanuele III, onôr che nol jere mai stât risiervât a nissun altri esponent dal mont dal spetacul. La Ristori e veve recitât in 334 citâts, 33 stâts, 5 continents, par un totâl di 3546 aparizions in sene.
8. La compagnie udinese “Chei de Lum”, che la sô anime al jere Silvio Sattolo, e à recitât ancje a Rome, Vignesie e Milan. Un dai siei cjavai di bataie e jere la trasmission radiofoniche “Il fogolâr”, cun protagoniscj Florean e Venturin. Tai agns Trente, la sô stagjon teatrâl estive a Padier e ve cussì tant sucès che a faserin un tram speciâl par tornâ a menâ in citât il public.
9. Ducj a cognossin Gianfranco D’Aronco tant che om di culture e espert di leterature furlane. Pôcs, però, a san che tai agns Cuarante al è stât ancje colaboradôr, senograf e autôr di tescj pal teatri.
10. E se us rivàs a cjase un modon cun scrit parsore “PUGTAUS”? No, no je une fantasie, ma un fat pardabon sucedût tal 1970. Autôr de provocazion al jere Luigi Candoni, che al creà un Off-play di 9 dîs di intratigniment. Dome te ultime sere si scuvierzè il significât de scrite: Par Un Grant Teatri A Udin Subite. Pecjât che si à scugnût spietâ fin al 1997 par vê il Gnûf Giovanni da Udine.
11. Ancje la Clape Culturâl Aquilee e à dât un biel contribût pal teatri in lenghe furlane, voltant lavôrs di Beckett, Shakespeare, Jonesco, Molière, Brecht, Goethe, Pirandello, Lorca, Čhecov, e tancj altris.
(s.f.)
