Deventâ infermîr? Une oportunitât contade dai fantats di YoupalTubo

I fantats dal canâl furlan “YoupalTubo” di YouTube a tornin a fevelâ intal lôr ultin video di un teme cuntun valôr sociâl une vore fuart, invidant i zovins come lôr a rifleti su la oportunitât di deventâ infermîr. Par podê fâ cheste profession si à di seguî un percors di studis une vore diferent di chel di une volte e che, cu la Universitât dal Friûl, al permet di imparâ ancje midiant di un centri di simulazion di avanvuardie.
◆ La clip e tache cun Mattia Cantarutti e Federico Iob (Chei di Udin) che, cuntun mateç simpatic, a introdusin par prins di chest argoment. Daûr, Desiree Chiappo Debegnach e met subit “ordin” e e rimarche la impuartance de figure professionâl dal infermîr; po dopo a intervegnin Federico Benedet, Davide Buccheri e Lucia Bello. Chescj zovins youtubers, cun chei altris compagns di “aventuris”, a son i protagoniscj dal canâl là che a contin lis lôr passions, fevelant in lenghe furlane di contignûts e curiositâts dal Friûl.
◆ «I fantats di YPT a àn dât un messaç cun contignûts impuartants e intune forme plasevule. Ancje cheste volte, cun simpatie e snait, a àn evidenziât un teme fondamentâl pal nestri teritori: la formazion dai infermîrs. Midiant dal dialic continui tra la ARLeF e la Universitât dal Friûl – che e à dât un contribût tecnic fondamentâl sostignint cun convinzion la realizazion di chest gnûf video – al è stât pussibil meti adun un filmât che al atire la atenzion dai nestris zovins. O ringracii il professôr Bresadola, coordenadôr dal cors di Lauree in infermieristiche, e il Retôr Pinton par cheste colaborazion gnove che, come lis precedentis, e puartarà beneficis, no dome pe comunitât furlane». Cussì al à dit Eros Cisilino, president de ARLeF – Agjenzie regjonâl pe lenghe furlane, che e poie il progjet realizât cu la colaborazion de Universitât dal Friûl, dal Centri di Simulazion e Alte Formazion, dal Dipartiment di Medisine de Universitât dal Friûl e dal Cors di Lauree in infermieristiche, sedis coordenadis di Udin e Pordenon.
◆ Lis fantatis e i fantats di YoupalTubo, nus fasin capî ben che “infermieristiche” al è un dai percors universitaris plui dinamics. E je une lauree trienâl (la prove di amission e sarà ai 5 di Setembar dal 2024), che è permet dopo di iscrivisi tal ordin des professions infermieristichis, e di tacâ a lavorâ intal setôr public, o tal privât, sul teritori e inte assistence. «O soi une vore content dal contribût dai zovins di YoupalTubo che, cun chest video, a rivaran dal sigûr a rinfuarcî inmò di plui il procès di divulgazion su la impuartance de profession di infermîr.
◆ Di fat, o crôt che al sedi un imprest une vore bon par fâ rivâ chest messaç ai zovins, ma ancje a chei mancul zovins. O volaressin ancje rivâ a aumentâ il reclutament dai students futûrs di infermieristiche, che intai ultins agns al è stât plui dificil, come che al sucêt par dute la aree di medisine e sanitarie», al à marcât il professôr Vittorio Bresadola, coordenadôr dal cors di Lauree in Infermieristiche de Universitât dal Friûl a Udin e a Pordenon.
◆ Forsit no ducj a san che za a tacâ dal prin an, lis lezions in aule si alternin cui laboratoris dal centri di simulazion di avanvuardie. In plui, si fasin tirocinis sul teritori o pûr in Europe cul Erasmus+ Traineeship (cu la pussibilitât di borsis di studi). E je une sielte di vite che e da une vore di cognossincis e competencis, midiant tecnichis di aprendiment simpri plui modernis e dal contat diret cu la realtât professionâl. ❚