Se la nestre Regjon e fos indipendente, cemût cambiaressino i siei rapuarts internazionâi? L’om plui adat a cirî di rispuindi a cheste domande al è Paolo Petiziol, un che, a une clare vision storiche dal Friûl e dal so rûl inte gjeografie politiche europeane, al zonte une atente osservazion de realtât di cumò dai paîs dal Nord e di Soreli jevât. Ancje par chest il president di Mitteleuropa, consul onorari de Republiche Ceche e za president di Finest, al è stât nomenât intal consei di aministrazion de Universitât per internazionalizazion dal Ateneu.
Cuâl saressial il prin aspiet di tignî di cont par lâ a imbastî une politiche foreste pardabon furlane?
Bisugnarès partî dal ricognossiment de funzion storiche dal Friûl. E la nestre storie nus mostre cun clarece che no o vin simpri gravitât intor de Europe centrâl. La indipendence de Patrie e je stade otignude dal Imperadôr Indrì IV, no dal Pape. E la concession de prime universitât furlane e je vignude di un altri Imperadôr, Carli IV di Boemie, dome 4 agns daspò de fondazion di chê di Praghe. Gno nono mi diseve simpri che par cjatâ fortune bisugnave lâ a Nord, parcè che e je vere che i moments dulà che o sin stâts plui siôrs te storie a son stâts chei di cuant che no vin vût barieris cu la Europe di Mieç. Se no, e je stade miserie.
Il nestri avignî passial par fuarce par di li?
Noaltris no vendìn nuie a Catanzaro. I nestris imprenditôrs a àn la vocazion ae esportazion viers la Gjermanie e l’est european. Si trate dome di riapropriâsi dai nestris marcjâts. La diplomazie e covente ancje a chest. Ma e je ancje une cuistion ideâl. La console ceche di Rome e je vignude al Mittelfest e e je restade scaturide des tantis afinitâts che il nestri paisaç e la nestre int a àn cu la sô tiere. O sin plui dongje a Praghe e a Budapest di ce che o crodìn. O scugnìn rindisi cont di chest.
Trente agns indaûr Alpe Adria, vuê la Euroregjon: ce isal cambiât?
Alpe Adria e jere une intuizion fulminante ma l’inzornament dai cunfins su la cjarte gjeografiche al à rindût sorpassât il progjet. La Euroregjon no je altri che la riatualizazion de funzion dal Patriarcjât, che e jere chê di fâ di colegament jenfri Adriatic e mont gjermanic, e puarte dal Est european. La nassite di Aquilee e ven dal fat che alì l’Adriatic al rive al stes paralêl di Aoste: si rimpine a Nord come un coni naturâl. Al è il pont plui dongje dal mâr che a vedin i todescs.
Duncje si varès di pontâ su lis infrastruturis portuâls…
In cheste fasse di Adriatic al è simpri stât un puart fondamentâl. Muarte Aquilee, e je nassude Vignesie. Colade Vignesie, al è vignût fûr chel di Triest. Cumò al è di fâ ce che si pues in maniere che i nestris partner economics no cjatedin plui convenient lâ a Cjaudistrie o a Flum.
Ce capitâl podaressie vê cheste Euroregjon?
Jo le varès clamade Euroregjon aquileiese, parcè che Aquilee e je la capitâl ideâl. No je une grande citât e par chest no scontente nissun, e e à un valôr simbolic che al lee dutis lis popolazions des regjons coinvoltis. Sul Domo di Lubiane a son piturâts i Sants Ramacul e Fortunat, in Austrie al è Hermagor.
Dut câs al è cualchidun che al sburte la Euroregjon a rivâ fin in Baviere o in Lombardie…
O crôt che al sedi plui che altri un discors economic. Il Nord de Italie al è un sisteme che a nivel di Pil al prodûs tant che la Renanie: clâr che si voledi cirî un rimpin par peâsi istituzionalmentri ae locomotive di Europe. Ma in chest câs no si va daûr a une vocazion storiche…
Il gnûf Stât furlan al varès ancje di preparâ i siei diplomatics. Cemût varessial di fâ? Ise avonde la Facoltât di Gurize di Siencis diplomatichis?
E je une Facoltât che e funzione ben e e prepare tancj zovins che però no simpri a àn la oportunitât di rivâ a cjatâ un lavôr in diplomazie. Dut câs a laressin judâts cun iniziativis che a metin i fantats in condizion di imparâ no dome la teorie ma ancje la pratiche des regulis di contat cun chescj popui e cu lis lôr delegazions. O pensi par esempli a campus di fâ di Istât cun lezions di bande di esponents de diplomazie de Europe di Mieç. ■
Walter Tomada