DI BESSÔI – FEMINIS. Femine e leader, un binomi inmò dificil

Interviste a Cristiana Compagno, dal Friûl la prime retore femine in Italie
Cuant che e je deventade retore de Universitât dal Friûl Cristiana Compagno, dongje dai discors uficiâi, e à vût dit: «Mi sint une puartadore cjargnele». Par une come jê, che e dopre lis peraulis in maniere une vore resonade, «chê declarazion e marcave un pont clâr: no jere le prime volte che lis feminis te storie dal Friûl e sielzevin di puartâsi su la schene un pês une vore penç benefizi de lôr comunitât. Chescj esemplis di concretece, di fuarce e di determinazion che dutis lis feminis furlanis a puartin dal lôr Dna nus puedin judâ a cjapâ cussience dal fat che la nestre identitât no je dome masculine, ma ancje, e in cierts moments soredut, feminine».
Ma in ce stât ise la situazion des feminis vuê in Friûl?
A son scûrs e lusôrs insiemit. In realtât par rivâ ai nivei des nazions plui evoludis di Europe in chest setôr o vin ancjemò tant ce fâ, ma di chê altre bande tal stes timp par tantis resons o sin un model pal rest de Italie. No a câs la Universitât dal Friûl e je stade la prime in Italie a sielzi une femine come me tant che retore.
Jê e je stade la prime retore femine di Italie, ma no son masse lis feminis che inte nestre Regjon a ocupin posizions diretivis …
In chest moment storic la partecipazion des feminis al marcjât dal lavôr e sta cambiant. A son simpri di plui lis zovinis che a studiin e che si preparin in maniere di jessi buinis no dome di davuelzi funzions operativis, ma ancje mansions diretivis. Par esempli, cjapìn la Universitât dal Friûl: lis matriculis che nus sielzin par perfezionâ i lôr studis a son il 54 par cent. A son pocjis lis facoltâts che a restin a maiorance masculine: Inzegnirie, Matematiche, Siencis. Ma za a Medisine lis feminis iscritis a son plui dai oms. E in dutis chês altris no je storie: e no dome pes iscrizions, ma ancje pes laureis. I oms a bandonin plui dispès i studis e invezit lis feminis a rivin dapît prin, cun plui frecuence e cun valutazions plui altis.
E dopo?
Il probleme al è il dopo. No si sa parcè che chescj “çurviei colôr di rose” no cjatin maniere, sul marcjât dal lavôr, di vê stessis possibilitâts di fâ cariere rispiet ai oms. O miôr, il parcè si cognòs ma no si fâs vonde par mendâ cheste situazion.
Cuale ise la reson? Dome lis cuistions leadis ae maternitât o isal alc di plui struturâl?
Par sigûr la problematiche di une mancjance totâl di cualsisedi politiche di conciliazion jenfri lavôr e famee e va drete al cûr des feminis, che a finissin par considerâ il dedicâsi ai fîs un dovê e il lavôr une colpe. Al è un dât di fat che a coventaressin robis tant che i nîts, la scuele a timp plen, une politiche dai redits che e ledi a incentivâ la famee e no a penalizâle. Ma nol è avonde. Di fat, dongje di condizions obietivis di dificoltât, si scuen tignî cont dai frens che la femine e à incorporâts dentri di jê. Lis feminis a son, par cussì dî, programadis par jessi operativis, ma la lôr educazion di solit e frene la energjie feminine parcè che no considere mai la eventualitât di indreçâlis ae leadership.
Duncje ce covential par deventâ une femine “leader”?
Al è un percors a ostacui. Par rivâ adore a fâsi valê une femine e à simpri di fâ plui fature di un om. E à di fâ il 120 par cent par dimostrâ di jessi ae altece. E à di sopuartâ stress e discriminazions, e al è normâl che tantis a rinunciin a cheste sfide.
E chest ce compuartial a nivel di sisteme?
Che i sistemis economics e culturâi dulà che lis feminis no dan il lor plen contribût a son sistemis plui puars. A àn di fat un potenziâl grandonon che, par dutis lis resons che o ai cirût di spiegâ, al finìs par lâ straçât. No si trate duncje dome di une cuistion di civiltât, ma par me che o insegni Economie al è un esempli di cemût che un sisteme nol rive a logâ in maniere eficiente lis sôs risorsis. E nol è a câs che se si fevele di macroeconomie ducj i studis a considerin che rivâ ai obietîfs di Lisbone, ven a stâi tocjâ il 60 par cent des feminis ocupadis, al fasarès cressi il nestri Pil dal 7 par cent. La femine no prodûs dome ricjece civîl, ma ancje economiche.
Ma ise cualchi carateristiche feminine in particolâr che le à judade intal so lavôr di retore?
Jo no esalti par definizion il gjenar feminin. No crôt che une femine e vedi di jessi par fuarce miôr di un om. Dut câs a son tal caratar de femine peculiaritâts che a permetin di davuelzi une vore ben un rûl di guvier di struturis complessis. La femine e je pragmatiche e “multitasking”, ven a stâi che e je buine di frontâ insiemit intal stes timp tantis cuistions viertis. Altri che “agnul dal fogolâr”: i studis internazionâi a mostrin cemût che tantis multinazionâls si son afidadis a dirigjentis feminis propit pe lor sensibilitât di contest e pal fat che a rivin a stâ daûr a tancj obietîfs e a puartâju insom ducj.
Ma parcè il feminisim no isal deventât un model ideal? Cemût mai isal muart?
Si è tratât di un moviment che al jere insuazât intune epoche di grant rignuviment sociâl e ideâl, dulà che par afermâ une gnove posizion de femine inte societât si à doprade la cuintriposizion di gjenar. Tai agns seguitîfs lis robis a son gambiadis. E je stade une evoluzion che e à puartât lis feminis a jessi cussientis de lôr paritât cul om, e a no cirî plui la cuintriposizion, ma la integrazion cui oms.
Ma cemût si fasial a vê plui feminis tai puescj di vuide de societât? Lis “cuotis pes feminis” coventino o no?
Jo o soi stade la prime retore femine in Italie ma se o ves vût di jessi elete intune “cuote” parcè che o jeri femine no mi sarès nancje candidade. No crodevi a chest imprest di selezion che, o pensavi, al è une agjevolazion cence merit. Tai ultins agns dut câs o ai gambiât idee, parcè che o viôt che ancje se la robe e je sbaliade, nus jude a acelerâ procès une vore lents come chel de presince feminine tai cda des societâts publichis o di capitâi cuotadis.
Duncje l’esempli al jude a stiçâ i procès?
O fâs il câs de mê elezion a retôr. In Italie a son Universitâts cetant plui vecjis e preseadis di Udin, ma e je stade la nestre la prime a dâ fiducie a un retôr femine. E cumò o sin in trê, parcè che il gno esempli al à coventât a cunvinci che no son dome i oms a podê vuidâ un ent cussì e che no si à di vê pôre a afidâ aes feminis posizions di grande responsabilitât. Inte tornade di elezions di retôr che e vignarà a son cetantis di plui lis candidadis a retôr e il numar al larà a cressi. Il câs Udin al à discjadenât un procès emulatîf. Par chest a coventin plui feminis in puescj di guvier: a son modei che a sburtin lis zovinis a studiâ, preparâsi e combati par mostrâ ce che a valin. A mostrin che si pues vê risultâts e che il mont nol è dome dai oms.
Alore l’avignì al è des feminis?
L’avignì al è des personis preparadis, feminis o oms che a sedin. Ma cumò lis feminis no rivin a jentrâ tal marcjât dal lavôr e permeti la lôr partecipazion al è interès di ducj. La nestre societât furlane e taliane no pues privâsi di chestis inteligjencis. No vin dome i çurviei che a scjampin, ma ancje chei che o sotvalutìn, e dâur dignitât al darà risultâts par ducj. ■
Walter Tomada