………………………………………………………..
I TRÊ PROVERBIS
Nêf di Dicembar,
Invier lunc
❋❋❋
A Sant Nicolò (6-XII)
il frêt al è ca cumò
❋❋❋
Nadâl in zûc,
Pasche dongje il fûc
………………………………………………………..
LA CUSINE
Pastiç di cardis
Rîs e râfs
Cûrs di articjocs cun ardiel
e taiade di pet di poleç
Paste, rîs o vuardi cun salam
o luianie
Mignestris cuinçadis dal Invier
Purè di patatis, verzis e râfs
Brût di gjaline e tortelins
Mignestre di paste e fasûi
Mignestrons cun coce,
fasûi e patatis
Sope di selino
Jote e mignestre cu la broade
Jentrade di verduris di ort conservadis in dolcegarp
Cjar lesse cun salsis diviersis
Patatis (tal for, lessis, marinadis, con cevole e asêt, te fersorie,
in torte, e v.i.)
Verduris cuetis a vapôr o lessadis e passadis te fersorie
Cjarsons cun ont e scuete fumade (ancje cu la zonte de varhackara)
Tocj in braide cuntune ostie di frico crustulin o persut di Sauris
Rose di Gurize cu lis fricis (ardiel in padiele sfumât cul asêt)
Persut cuet di Triest cun kren
o sanaf
Cjapon in padiele o in umit
o farsît
Verze cun cuestis di purcit
Luianie cuete cul lat, cul vin,
cu lis jerbis
Sghinc di purcit saurît
Salam o muset cuet sot lis cinisis
Sopis di brût ancje cu lis tripis
Broade e muset o muset
cu lis lints
Bisat a rost, in umit
o cun altris ricetis
Capûs in padiele
Pes di mâr cuet in dutis
lis manieris
Pan dolç
Creme al vin moscât
Sirop cun scussis di naranç
o mandarin
………………………………………………………….
IL SANT DAL MÊS – Sant Nicolau
La devozion di Sant Nicolau, protetôr dai frutins, e ve difusion slargjade in dute la Europe pai cetancj miracui e pes maraveis che la agjiografie cristiane i atribuì za dal secul VI indenant, sul imprin te Glesie di soreli jevât e dopo, viers il secul XI, ancje ta chê di soreli a mont, dulà che la fieste dal sant e fo fissate ai 9 di Dicembar. Sant Nicolau, che al vierç il timp dal simbolisim solstiziâl, al à concentrât inte sô tradizion ancje antighis mitologjiis nordichis che a metin in evidence la lote dal ben cul mâl e sul so control. Cussì, in chest precîs moment dal calendari, dulà che si davuelç plui fuarte la lote tra la lûs e il scûr, Sant Nicolau al rive cul diaul o i diaui inte lôr conotazion di demonis de nature e de vegjetazion (come i krampus a Tarvis e inte Valcjanâl), vierzint il cicli critic dal solstizi dal Invier, cu la bataie tra lis fuarcis alternadis che a rezin l’univiers e che a guviernin il ritmi de nature e la ruede dal timp. ❚
………………………………………………………….
LA FIESTE DAL MÊS – Nadâl
E je la seconde plui grande fieste de tradizion cristiane. Celebrade ai 25 di Dicembar, e ricuarde la nassite di Jesù Crist a Betlem. In realtât, no si cognòs la date precise dal event, che la Glesie ocidentâl e tacà a celebrâ in chest dì tor la seconde metât dal IV secul, soredut par sostituî la fieste pagane dal Nadâl dal Soreli (Dies Natalis Solis Invicti), peade al solstizi e duncje ai cults solârs antîcs. In ogni câs, pai cristians il “Soreli di justizie” al jere propit Jesù Crist. Tal an liturgjic la fiestone e je prontade dal Avent (cuatri setemanis tal rît roman, sîs in chel ambrosian), che une volte al jere timp di astinencis, dizuns, cu la improibizion di balâ, di fâ gnocis e altris baldoriis. In Friûl e jere tradizion spietâ il Nadâl cuntune novene une vore sintude dal popul, che al jemplave lis glesiis (il famôs Missus, o Devetica te Sclavanie), fate tes seris fra il 16 e il 24 di Dicembar. Invezit ae miezegnot dai 24, in ducj i paîs e vignive celebrade la Messe di miezegnot, clamade “Madins” dal non dai uficis “Ad Matutinum” che une volte a cjantavin i religjôs. Ae vilie de grande fieste a jerin peadis une vore di usancis popolârs. Une volte, tal dopomisdì, sul fogolâr si impiave il çoc plui grant de anade e ator si cjatave la famee cu la parintât a preâ, cjantà e fâ ancje cualchi pronostic e cualchi semplice pratiche di divinazion. Sot sere si consumave une cene “di magri” par podê ricevi la comunion te messe plui famose dal an. Dopo la jessude de glesie, tor la une di gnot, chei che a podevin si fermavin tes tratoriis par mangjâ la innomenade sope cu lis tripis e vin blanc. La sere de vilie di Nadâl i vecjos des fameis slovenis dal Friûl di Soreli jevât, a fasevin il zîr dal broili e a vuadolavin cu la aghe benedete ogni lûc preant pal benstâ des personis, la prosperitât dai animâi e la conservazion des robis e dai ambients. Lis cerimoniis religjosis dal Timp di Nadâl si slungjavin fin ae Epifanie, come lis tradizions popolârs che si tignivin par dodis dîs e dodis gnots. ❚
……………………………………………………
FRIÛL CONTADIN. Lis voris dal mês
Prin mês dal Autun, Otubar al siere lis vendemis de ue e di ducj i prodots de tiere che a àn puartât davoi e ligrie sui cueis e su la plane e po dopo intai curtîi dulà che une volte a rivavin i cjars, tirâts dai cjavai e dai bûs, plens di ue, panolis e patatis e di miluçs, piruçs, coculis e cjastinis e pardut si sintive il bonodôr dai moscj e des trapis intant che borcs e andronis a jerin profumâts di polente fate cu la farine gnove. La fieste de Madone dal Rosari (ai 7 di Otubar) e segnave dapardut la colme des vendemis. Puartâts a cjase i prodots de tiere, dopo vê semenât pe gnove anade, il cicli agrari si sierave. La fieste di Sant Simon (ai 28 di Otubar) e jere chê che e meteve il sigjîl su ogni vore de campagne. Al jere rivât il timp umit dai foncs e dai gnespui, dai uciei di pas che une volte si butavin jù su lis bressanis e sui rocui intant che a svualavin ad alt viers lis tieris cjaldis dal meridion. ❚
…………………………………………………
LA TRADIZION DAL MÊS – Te Deum di ringraciament
Se la societât civîl e siere l’an cuntune grande fieste di gjonde ancje dissolude te ultime gnot di Dicembar in spiete dal prin dì di chel gnûf, ancje il mont religjôs al siere il cercli dal an cuntune tradizion sacre. In tancj paîs e je ancjemò une vore partecipade la messe celebrade inte soresere dai 31 di Dicembar, seguide dal cjant solen dal Te Deum, il plui biel imni de cristianitât, come ringraciament par dut chel che si à vût tal an che al è daûr a distudâsi. La societât agricule di une volte, cu la sô miserie endemiche, no cognosseve la usance de baldorie de ultime gnot dal an, ma cu la sospension di ogni ativitât e osservave dome riflession e preiere, magari gjoldintsi dome une tace di vin e un piçul ghiringhel pe fin dal an vecjo e la nassite di chel gnûf, meditant sul timp, sul cori des stagjons e, cjalant adalt il cîl stelât, sul grant misteri de vite. ❚