DI SCJAS IN SCJAS: I TARAMOTS INTE STORIE FURLANE. 1278 – 1279: i trê scjas

E chest colp a son trê lis patafadis in pôc plui di un an: si tache ai siet di Avrîl dal ’78 e si finìs ai vincjecuatri di Avrîl dal ’79: tal  mieç il vincjecinc di Zenâr, cuasi un avertiment, par no dismenteâsi e tignîsi pronts al piês. Une sdrondenade plui fuarte e crude di chês altris. An di passion e di pôre vie par dute le Patrie duncje, regjistrât di tancj autôrs impuartantons, no dome furlans, tant che Antoni Muratori, Francesc di Manzan (1858), e soredut la Croniche di Julian, une opare une vore interessante, che e passe sot il non di Annales Foroiulienses, là che si contin i fats plui memorabii in Friûl dal 1252 al 1315, cu la zonte des notis di Pieri Passarin (dal 1343 al 1364) che cun dute la solenitât monastiche scrite par latin, che ancje in lenghe furlane e manten la sô dramaticitât fuarte, sunant cussì: «intal an dal Signôr 1279, une setemane prime che al finìs il mês di Avrîl, inte fieste di Sant Zorç, prime sul imbrunî e po dopo, pe seconde volte, intal cûr de gnot, cuant che i fradis a cjantin madins, al fo un taramot cussì grant che diviers cjistiei a colarin e a forin tancj a murî».
Zuan Francesc Palladi dai Ulîfs, intes sôs storiis dal Friûl (1660), nus ricuarde ancje lui che chest colp al puartà dams une vore impuartants, sì che la basiliche za riviodude dal progjet di Popon e fo cuasi dal dut sdrumade par tiere. Ancjemò une volte un simbul fuart di fede e di identitât cjapât di smire dal Orcul, come che nus conferme Jacopo Valvason di Manià, inte sô famose Descrizion dal 1568. Informazion golose di chest taramot si cjatile ancje tal catapan di Cjavalì, là che si conte di un ciert Narducius de Cabalicco che al domande ae glesie di Sant Leonart novante liris di monede, dant in fede tant che pegn cinc cjamps di arâ, un patrimoni, «ut reparet ruinam factam a terremotu in sui aedibus funditus destructis», ven a stâi par meti man aes sôs cjasis dal dut slacadis intun grum di rudinaçs. Mi pâr di viodilu Narducius, Nardin par furlan, che al impegne dut ce che al à devant di un nodâr di Udin, innomenât Sâr Fidrì, par tirâ sù la cjase, par no dismenteâsi de lidrîs plantade plui tal cûr che no inte tiere. Al met sul plat une fortune pûr di garantîsi di podê restaurâ il cuviert dai siei vons, par se e pe sô famee. E cuissà mai ce tancj come lui, che di râr la storie nus consegne, e i lôr nons a scuegnin jessi sgarfâts fûr dai documents che nus contin de int comun, come nô, che no si è pierdude di coraç, che à vude la fuarce di crodi e di resisti. Magari ancje plui dai sorestants.
Chei che a àn fat come il patriarcje di chel moment, Raimont Torian (1273-1299), di divignince milanese, che al scjampe vie in Langobardie, a Lodi, bandonant il Friûl par ducj i doi chescj agns, forsit pensant che l’Orcolat nol varès tant gradît un Princip talianot. E par sei sclets, nol fâs propit une biele figure cu la sô int, che il pastôr al varès di viodi des sôs pioris propit intal moment di pericul plui grant, cence bandonâlis inte bocje dal lôf. Tal 1279, i apalts dai dazis di Glemone, de Scluse e di Tumieç a forin concedûts a marcjadants di Florence, che a cjapin cjase ancje a Udin, Cividât, Acuilee, Sant Denêl, Sant Vît, Pordenon.
Cheste e sarès une ocasion interessante di ricercje, une strade gnove e mai prime tant sperimentade dai storics, par lâ a cjatâ fûr cronichis e notis scritis di lôr, dal sigûr testemonis di chês zornadis, marcant su cualchi pergamene o cjarte di un tacuin sugjestions e pinsîrs che a podaressin jessi une vore interessants par ricostruî la vite cuotidiane di chei dîs. Fadie e fuarce. Fin tal 1301, cuant che un altri scjas trement al screarà il secul XIV: un colp sul fâsi de albade, un altri tor des trê dal dopodimisdì e l’ultin a ore di jespui. A Cividât taramot e tampieste, cun grignei grancj tant che ûfs di gjaline. Come une rabiose sentence a preparâ il stomi par chel annus horribilis, il 1348, là che vuere, peste, taramot e fam insiemi si daran la man al galop vie pes contradis de nestre Patrie. Ma cheste storie le contarìn la prossime volte. ❚
✒ Agnul Floramo