Il Côr Polifonic di Rude al scree dôs gnovis publicazions firmadis di Nassimbeni e Guerra
A l è stât presentât un gnûf grant cjapitul, fat di doi volums, de golaine che e intint catalogâ cun criteri sientific ducj i orghins de Regjon Friûl-Vignesie Julie. La golaine si clame, voltant il titul par furlan, “Orghins e tradizions organariis in Friûl-Vignesie Julie”, e e je promovude dal Côr Polifonic di Rude cu la poie de Fondazione Friuli, e fin cumò e à sburtât siet dai nûf libris in totâl che le componin. La ultime fadie e je chê de catalogazion dai struments liturgjics de Arcidiocesi di Udin intal teritori che di Udin al rive fin a Lignan, tratant des foraniis, in ordin alfabetic, di Codroip, Mortean, Palme, Porpêt, Rivignan Teôr e Vâr, Tisane e Udin.
◆ Un lavoron realizât di doi studiôs de materie, Lorenzo Nassimbeni e Andrea Guerra, autôrs che a àn dât il lôr contribût impuartant ancje in altris libris de stesse colezion, che cumò e je cuasi completade. A mancjin dome un altri libri su la arcidiocesi udinese e un dizionari dai organârs atîfs intal cors de storie in Regjon.
◆ Lis dôs publicazions, de cjase editore Serassi, a son stadis presentadis ai 26 di Novembar tal Oratori de Puritât di Udin, ae presince di Nassimbeni e Guerra che a dialogavin cul musicolic Roberto Frisano; i intervents organistics di Tommaso del Ponte si son compagnâts cu lis esecuzions corâls a capele dal Côr Polifonic di Rude, direzût di Fabiana Noro. E son stâts cusì regjistrâts ben 121 orghins, ognidun tratât cu la massime precision sot ducj i aspiets: localizazion, definizion culturâl, o ben non dal autôr e datazion, notiziis storichis e carateristichis intal detai, sot dai profîi tecnics e descritîfs, cun tantis notiziis rigjavadis de consultazion di tancj archiviis, e bielis fotografiis a completament di ogni cartele dedicade. Une opare monumentâl, pardabon enciclopediche, dedicade ae memorie dal grant organâr furlan Gustavo Zanin. La famee Zanin – nancje dîlu – e fâs di parone, tant che e figure come la cjase costrutore di orghins plui frecuente tal contest furlan, cence dismenteâsi che la sô notorietât e je mondiâl di un pieç, par vie che e à prontât struments fintremai in Gjapon, in plui che in variis localitâts di Europe.
◆ Altris organârs ricognossûts a fasin biele figure in cheste publicazion, e o podìn lei ancje lis lôr liendis leadis ae fate di struments a canis in Friûl. Autôrs tant che Nachini, Dacci, Comelli, De Corte, De Lorenzi, Malvestio, Michelotto, Bossi, Mascioni, Barbina, Walcher, Merlini, la dite Pugina, La Fonica e anonims organârs di scuele venite e napoletane.
◆ Fin cumò a son stât completâts chescj volums pe composizion de golaine enciclopediche, libris che o podês vê cjapant lis informazions sul sît ilpolifonico.it: “La Diocesi di Trieste” di Giuseppe Radole (edizions Pizzicato); “L’Arcidiocesi di Gorizia” di Lorenzo Nassimbeni e Loris Stella (edizions Pizzicato); “La Diocesi di Concordia-Pordenone” di Andrea Guerra e Fabio Metz, in doi volums (edizions Serassi); “L’Arcidiocesi di Udine” di Lorenzo Nassimbeni pal volum numar 1 e di Nassimbeni e Andrea Guerra pai volums 2 e 3 (edizions Serassi). ❚
