La ete dal benstâ e je ancje chê dal desert demografic; ma dai ostacui de storie
e ven simpri pes Tieris Altis une gnove sperance
Al sarà capitât a ognidun di lâ a visitâ la Cjargne, no mo? Cheste tiere speciâl e maraveose, là che i borcs si ingrimpignin sù pai crets, vuê come mil agns indaûr, cjapâts dentri di une scune di boscs là che peçs, arbui, agaçs si alcin in ponte di pîts par rivâ a cjalâ di lontan la plane, che si distire a val, dilunc di un riul che al barbote sui claps insumiantsi di podê deventâ flum. La Vierte e je une sinfonie di colôrs che a àn il savôr de mîl. L’Istât si celebre intune sagre continue, là che intes plaçutis si imbandissin taulis plenis di frico e di cjarsons, polentis e scuetis fumadis. Parfin la Sierade si piture di zâl e di ros, e se la otubrade e je buine, ti invide a metiti vie pal troi, cul russac sù pe schene e i pîts intai scarpons, par gjoldi la aventure plui biele dal mont che e finìs ator di un fogolâr, gustant cjastinis imbombidis di ribuele. E l’Invier? Covential contâlu? Une cartuline che e pâr piturade par ducj chei che a son bogns di supâ la vite gote par gote: pistis plenis di nêf, baitis di len che a somein jessudis fûr di une di chês publicitâts che i bulos a clamaressin “glamour”! Elegance, lus, buine compagnie. E alore? Al vignarès di domandâsi parcè che un Paradîs cussì si spopole ogni an di plui: la int e scjampe vie, i paîs si disvuedin, i fruts no nassin plui. “Desert demografic”, lu definissin chei che si ocupin di demografie. Al pâr tant strani. Un mont fat al contrari. Si varès di metisi in code e sburtâsi ancje par rivâ a cjatà un puest disponibil par vivi là sù adalt. Epûr… Ma cheste e je la flabe involuçade sù ben par chei che a puedin permetisi une vacance maraveose e fûr dal mont, dut câs cence molâlu mai, chest mont, e tornant po dopo ae fin “inte Basse”, come che a disaressin i Cjargnei, là che la lôr vite si consume gjoldint di servizis e comoditâts che lis “Tieris Altis” no àn mai vudis. Magari i siôrs si permetin ancje di comprâ une cjase biele, antighe, di ristruturâle cun ducj chei “comforts” che no saressin bogns di lassâsi indaûr: antenis parabolichis che a vegnin sù plui che no i foncs, cucant su lis scandulis di len dal cuviert, e magari ancje saunis e pissinis, tavernutis par ospits e amîs, gjavadis fûr di ce che une volte a jerin stalis e cantinis. “Ma al va ben ancje cussì” al sosten plui di cualchidun. Almancul a zirin i “dindins”. Sì, ma par cui? La int “normâl”, par solit, e reste fûr dal zîr. Par chest e decît, cul cûr sglonf, di lassâ il zîr e lâ vie pal mont, come che par solit a fasevin i antenâts cramârs. Ma cheste volte no tornin indaûr. Cuasi mai. E cussì di une bande la Nature e torne a cjapâsi la rivincite sul Om: a son centenârs i borcs bandonâts in cuote, aromai deventâts “ghost villages”, segnâts su la cjarte come curiositât turistiche. Mûrs là che une volte si viveve cumò sepulîts des elaris o sdrumâts dai ramaçs di un arbul grant. Di chê altre bande, la rapine: la Cjargne e ven “vampirizade”, lis sôs risorsis a fasin gole. La aghe, prime di dut. E ven pompade vie, par interès di pôcs che no son nancje di chenti. Ce centrial dut chest cu “Lis Cjargnelis”? O ‘nd ai cognossude une, “babie” e bastiancontrarie, propit come dutis chês altris che nus àn regalade la lôr vôs, pontade par pontade. Si clame Mira, e ven de Macedonie. So pari e sô mari si son trasferîts in Cjargne vie pe ultime vuere balcaniche. A jerin zovins, in chel timp. E l’afit, adalt, al costave une vore mancul che no a Tumieç. Lavorâ inte cjartere e je stade la ocasion di une vite, par ducj i doi. Ma simpri, come che al sucêt pai migrants, cul marum di une grande nostalgjie pes monts di cjase, là che la famee e viveve tirant sù pioris. Vuê Mira, che je nassude a Pradumbli, tal Cjanâl Perdarç, e à decidût, a trente agns ancjemò no batûts, di tornâ a cjapâ sù il mistîr antîc dai siei antenâts, ma in Cjargne. Stin a scoltâle. Us promet che e vâl la pene!
◆ “Parcè si maraveaiso che o feveli par cjargnel? O soi nassude tal ospedâl di Tumieç. Cressude in Cjanâl. O soi deventade “Cittadina della Repubblica italiana” dome cuant che o ai finît disevot agns. Ma o pues dî di jessi simpri stade une Cjargnele, dal moment che o ai viert i voi. O ringracii mê mari par vêmi regalade la lenghe dai miei paris. Le ai supade cul so lat. Ma di cuant che o ai memorie o tabai par cjanalot. No si podeve zuiâ tal borc, ca sù, cence cognossi lis peraulis antighis di cheste Tiere maraveose. Cartufule par patate, pin par frut… Mi àn contade la storie di chest piçul paîs là che o ai sielzût di vivi. Pradumbli: il “Prât das Dumblas”. Tirat sù par volê di chê badesse che e faseve passonâ lis pioris par produsi lane destinade ai puars. E jo o ai provât a fâ la stesse robe, pensant cussì di miscliçâ un alc di chenti cuntune part de mê storie, stant che i miei basavons a jerin ducj pastôrs su la mont Korab. Cul gno puem, che al ven di Cleulis e duncje chi al è calcolât plui forest di me, o vin afitade une piçule casere, in cuote. O stin là sù par dute la buine stagjon, Vierte e Istât. O menìn lis bestiis come che si faseve une volte, discuvierzint i trois antîcs de transumance. Aromai, di tancj di lôr, al restave dome che il non inte toponomastiche locâl, disparîts ancje de memorie dai plui vecjos: lis tantis armentaressis che a partissin des ultimis cjasis dal paîs e che a montin adalt. Li o preparìn formadi, scuete, mîl, cjalçuts e cuviertis di lane. O resti convinte che la difese di cheste nestre Tiere e sedi la uniche vere bataie che o scugnìn scombati, a ducj i coscj. No pues pierdile, cheste vuere. Cul gno om, o fâs part di cualchi an dal Comitât che al lote pe liberazion da la aghe de mont cuintri di ogni interès privât. La aghe, come l’aiar, e je di ducj! Lu ai imparât di un cjargnel cu la vôs potente, un che al à simpri fruiade la sô vite par difindi i dirits. Si clame Franceschino. E al è compagn di gno nono, Mitri! Ancje intal mût di fâ. Ruspiôs sul prin, ma plen di tenarece cuant che tu lu cognossis plui di dongje. Puedio confessâ un sium? Insot o sin paisans! O volarès che i miei fîs a vignissin sù braurôs di cheste lôr apartignince miscliçade. Braurôs di jessi “macedocjargnei”! Savêso cemût che si clame la mê frutine? No stait a ridi, però! Il prin non al è chel di mê none, che mi à insegnât dut e che ogni an o voi a cjatâle, in Macedonie: Mila. Il secont al è Piltrude. Sì po! Us zuri. Mila Piltrude. Che voltât de mê lenghe mari al volarès dî Piltrude la Dolce. Come che sigûr e jere. No us parial une flabe? Ma une flabe vere! ❚