Il Premi Hip Hop MEI di Faenza tai agns indaûr al è stât vint di artiscj come Ghali e Marracash
Va ben, disìnsal: fevelâ ben di Doro Gjat cun noaltris de “Patrie” al è come sfondrâ une puarte vierte! Ma propit par chest, al è un plasê viodi che l’artist cjargnel al vinç premis une vore impuartants. Al è za sucedût cui siei prins doi lavôrs “Vai fradi” e “Orizzonti verticali”. E cumò che al à publicât pe cjase discografiche indipendente La Grande Onda di Rome il so tierç disc solist, “Mondonuovo”, i sucès a van indevant: cheste volte Doro Gjat al à vint il Premi Hip-hop dal MEI (Meeting des Etichetis Indipendentis) di Faenza, festival rivât ae edizion numar 25. Si trate di une farie di talents che e rapresente un pont di riferiment par ducj chei che a lavorin intal setôr musicâl e che a cirin di capî ce che al bol inte cite dal panorame mancul comerciâl.
Par capî cetant impuartant che al è chest Premi, al baste viodi i nons che lu àn bielzà ricevût intai agns indaûr: Ghali, Ghemon, Marracash e Rancore a son cumò stelis de sene musicâl cun milions e milions di personis che a scjamin i lôr tocs e che a visualizin i lôr videos.
◆ A proposît di art visuâl, il videoclip di “Fuori Stagione”, un dai tocs di “Mondonuovo”, al è stât presentât pe prime volte propit al MEI e cumò si pues viodi sul canâl YouTube dal rapper cjargnel. Direzût de regjiste furlane Aurora Ovan, come ancje i doi precedents, “Stelle filanti” e “Montanaro chic”, il filmât al à a ce fâ cuntun dai problemis plui atuâi dal Tierç Mileni, il riscjaldament globâl e il cambiament dal clime. No a câs il cjantant al à partecipât, ancje se in maniere virtuâl, ae COP26 di Glasgow inte performance di Müller & Makaroff dai Gotan Project, che i àn afidât lis parts vocâls dal toc Da Casa Mia. In chest toc si fâs il pont suntun dai plui grancj scjas che a sedin stâts tai ultins agns, la Tampieste Vaia, che Doro al à podût viodi “di cjase sô”, in dute la sô fuarce teribile.
◆ Doro a chest pont al varà, in gracie dal Premi, la pussibilitât di vê une borse di studi, e di fâ ancjemò plui fevelâ di se. La colaborazion cu La Grande Onda e funzione ben; e ancje li al è un toc di Friûl che si pant. La cjase discografiche romane e je stade fondade di fat di Tommaso Zanello, cognossût come Er Piotta ma che al à une evidente divignince furlane. So pari al vignive di Teôr. Mai come tal incuintri cun Doro si viôt ce che a son bogns di fâ Friûl de Alte e de Basse cuant che si cjatin in sintonie. ❚