Tal 2018, in te suaze de Setemane de Culture furlane, la Universitât dal Friûl e veve organizade une mostre inte Biblioteche Florio sui sants furlans. Pe veretât, plui che sants, a jerin ducj dome beâts: Uldarì di Pordenon, Benvignude Boiane di Cividât, il patriarcje Beltram e Eline Valentinis. Uldarì mi jere restât tal cjâf. Un grant missionari, l’Apuestul dai Cinês (almancul tresinte agns prime di Basili Brollo) che nol jere mai rivât a deventâ sant. Po ben, tal principi dal 2019 o vevi un amì, in Cjargne, ancjemò zovin, che al stave murint, puar. Daspò trê agns di mâl, lu vevin menât a Pordenon par no sai ce curis, ma si jere ingriviât e la sô femine – mê amie ancje jê – e jere avilide. Lui al voleve murî almancul a Tumieç, dopo di vê saludât sô mari e i amîs. Ai 14 di Zenâr mi soi impensade dal aniversari dal Beât Uldarì, e dal fat che al vignive di Pordenon, ma cuant che si malà, biel che al lave a Avignon, al jere tornât tal so convent a Udin dulà che al jere muart in pâs (po dopo lu trasferirin inte Glesie dal Carmêl dulà che al polse ancjemò in dì di vuê). In sumis, o ai cjapât sù e o soi lade a cjatâlu. “Sint mo, Durì”, i ai diti, “o ai un plasê di domandâti… Che almancul chel puar fantat al puedi murî dongje cjase”. Dome cussì, nol covente cjacarâ masse cul Cîl, a san za dut. La dì dopo mi clame la mê amie e mi dîs che l’om al sta miôr e che l’ospedâl al acete di trasferîlu a Tumieç. Ai 16 di Zenâr il gno amì al è muart dopo di vê saludât ducj… In pâs e cence dolôrs. O soi lade li di Uldarì e i ai diti: “Graciis, cumò o speri che la tô cause e vadi indenant, o contarai cheste storie dutis lis voltis che o podarai. Ma o crôt che tu tu sês za in Paradîs, saludimi chel frutat e ae prossime”. E cussì e je lade, e ancje se Uldarì al restarà dome Beât par simpri, forsit nol à tant ce fâ in Cîl e i plâs di scoltâ chei che si impensin di lui. ❚