A Dignan e va in sene la ultime violazion
dal bilinguisim visîf di bande di FVG Strade
L’ultin câs si è viodût a Dignan, li che a completament dai lavôrs de gnove Variante Sud, FVG Strade su solecitazion de aministrazion comunâl e à metût gnûfs cartei stradâi. Cemût che si viôt de fotografie in pagjine, no si pues che cjapâ at de enesime violazion de leç 482/99. A FVG Strade, cun di fat, no i jentre propit tal cjâf (o miôr, “cjâfs”) che tes zonis furlanofonis i cartei a àn di jessi bilengâi, par talian e par furlan.
L’ûs public de lenghe furlane, in plui che un valôr, al rapresente un dirit. Tignint cont che no puedin jessi puartadis resons di gjenar economic, par vie che la stampe di un cartel intune o plui lenghis e à simpri chel cost, chest jessi cjaviestris di bande di une societât a capitâl dal dut public de Regjon al sta deventant grotesc.
Cognossint però la ande di cierte burocrazie, inte legjislature passade in Consei regjonâl al jere stât proponût un emendament dilunc de discussion dal contrat di servizi cun FVG Strade che al domandave plui garanziis sul ûs des lenghis minoritariis inte segnaletiche stradâl, tant che previodût des leçs n. 482 dai 15 di Dicembar dal 1999 (normis in materie di tutele des minorancis linguistichis storichis) e n. 38 dai 23 di Fevrâr dal 2001 (normis pe tutele de minorance linguistiche slovene de regjon F-VJ)
Presentât dai conseîrs Violino, Piccin e Gabrovec, l’emendament al fo mandât indaûr cun 16 vôts de maiorance di in chê volte fate di Pd, Cittadini e dal Gruppo Misto.
Ve ca i risultâts. Si domandìn trop che o varìn di lâ indevant par che a vignedin fats bogns i dirits de comunitât furlane di bande di une Regjon che simpri di plui no le calcole come element di fonde sedi de specialitât regjonâl, che de sô esistence stesse. E la situazion no cambie nancje cul colôr des aministrazions che a vegnin une daûr di chê altre. ❚
Dree Venier