E cumò in ce ospedâl lino?

Plui teritori, mancul ospedâi. Cun chest sproc il Consei regjonâl al à licenziade ai prins di Otubar la gnove riforme de sanitât dal Friûl-Vignesie Julie. Une riforme che, tes intenzions de Zonte Serracchiani, e cjale a “intercetâ par timp i problemis che si presentaran tai prossims agns”. In struc, dal prin di Zenâr dal 2015 aes 11 aziendis – tra chês sanitariis, ospedalieris e l’Irccs – a subentraran trê aziendis ospedalieris Hub (Triest, Udin e Pordenon), cuatri presidis ospedalîrs specializâts su dôs sedis (Gurize-Monfalcon, Tisane-Palme, Sant Denêl-Tumieç, Sant Vît al Tiliment-Spilimberc) cuntune direzion uniche, e po dopo trê presidis specializâts (Burlo di Triest, Cro di Davian e Gervasutta di Udin). Cinc a saran lis Aziendis pe assistence sanitarie: Triest, Friûl de Basse – dal Lusinç, Friûl de Alte – Culinâr – Friûl di Mieç, Friûl Centrâl e Friûl Ocidentâl.
Par cuintri, cuatri ospedâi a varan di jessi riconvertîts: Glemone,Manià, Sacîl e Cividât. Vie il Pront Socors su lis 24 oris: al sarà viert dome par 12 oris, vie pe gnot invezit al dovarès funzionâ un pont di prin intervent.
“Cun chest sisteme – e à spiegât Maria Sandra Telesca, assessore regjonâl ae sanitât – i citadins a varan tes lôr comunitâts i servizis principâi; par curâsi des malatiis plui gravis a fasaran riferiment ai Ospedâi “Hub”, che a saran plui specializâts”.
Al nassarà un Ent pe gjestion centralizade dai servizis aministratîfs e pes farmaciis. Si lavorarà par ridusi i doplons dai reparts universitaris, si pontarà a gjavâ puescj jet di ricoverâts tai ospedâi par potenziâ invezit chei di riabilitazion. A cjaparan plui impuartance i distrets sanitaris che a deventaran il pivot par rinfuarçâ la assistence teritoriâl, mentri che i miedis di medisine gjenerâl si dovaran meti adun par fâ rêt e par garantî une assistence continuative.
CE CHE AL CAMBIE SORE UDIN
Tumieç pe mont e Sant Denêl pe culine e pe zone di Codroip, a saran i doi gnûfs ponts di riferiment de int. A varan di metisi adun a nivel di struturis ospedalieris, ven a stâi che il stes primari al gjestirà il propri repart dividût sui doi ospedâi (al è il câs dal pont nassite o de aree di emergjence), tegnint cont dut câs che si cirarà di specializâsi ognidun par determinâts intervents (par esempli, di une bande si privilegjarà l’otorinlaringoiatra, di chê altre lis protesis). Glemone, tal mieç, riconvertide in “presidi ospedalîr di salût”, e vignarà a sô volte impegnade pal potenziament das riabilitazions dai lunc degjents, de medisine dal sport, dai ambulatoris specialistics (cardiologjie, oncologjie, gjinecologjie, diabetologjie, oculistiche, e v.i.). Sul discors des emergjencis, che al à fat berlâ e no pôc la int dal Glemonàs che no acete di viodi sierât il propri Pront Socors, e je stade butade fûr la promesse, di bande de regjon, che si cirarà di meti a disposizion une ambulance par ogni valade, in maniere di intervignî in maniere pronte cuant che magari l’elisocors nol rive.
Altre magagne saltade fûr sul ultin, il fat che te gnove Aziende sanitarie n. 3, si à decidût di lassâ fûr la zone di Tarcint par meti dentri chê di Codroip, e chest pe int de mont e de pedemontane, al sa tant di freadure, parcè che si suspiete un sbelançament des risorsis viers la zone basse de aziende sanitarie, che e larà – impensìnsi ben -, di Cjastions di Strade fin a Tarvis. E al sarà di ridi che 68 sindics a rivin a metisi dacuardi cuant che a vignaran clamâts a decidi progjets di assistence sanitarie o stanziaments di bêçs, stant che si sta fevelant di teritoris dal dut diferents par carateristichis e esigjencis di salût. Ultime notazion, il discors dai traspuarts: cul gnûf plan regjonâl al tocjarà riviodi lis tratis des corieris, parcè che a vuê, cu la riorganizazion des struturis, a son comuns e paîs che no son par nuie colegâts tra di lôr.
CE CHE AL CAMBIE DISOT UDIN
Palme di une bande, Tisane di chê altre, doi ospedâi che a restin al lôr puest, che a dovaran dut câs specializâsi ognidun pal so ambit e che a fasaran riferiment a une gnove Aziende sanitarie slargjade des bandis dal Lusinç. Chest il destin a nivel sanitari de Basse furlane. Un plan che, dopo cualchi resistence iniziâl, al plâs al sindic di Palme Martines, un tic mancul al coleghe di Tisane Benigno. E reste in pîts la cuistion dal “pont nassite”, e prime o dopo la Regjon e varà di decidi in cuâl dai doi ospedâi lassâlu, tegnint cont ancje de decision, cheste za cjapade, di sierâ il repart a Gurize cu la promozion di Monfalcon a sede di riferiment par chê provincie. La unificazion tra Ass n. 5 e Ass dal Lusinç e puartarà po dopo a une riorganizazion dai distrets e si fevele de ipotesi di un laboratori di analisi unic par dut il teritori. Ancje a Lignan a rivaran novitâts, dopo che in  Setembar si à tacât a lavorâ pe costruzion dal gnûf Pront Socors, che al deventarà un Pont articolât di prin intervent.
Cui che al stuarç il nâs a son chei di Cividât, che a àn provât in dutis lis manieris a fâsi sintî par difindi il lôr ospedâl, une struture un grum impuartante soredut pe int des Vals dal Nadison; ospedâl che invezit al vignarà riconvertît, a restaran dome determinâts ambulatoris, cualchi puest pai lunc degjents e il pront socors, che si spere che al resisti su lis 24 oris ma, cemût che al segnale il sindic Balloch, par dut il rest al bisugnarà lâ a Udin. ❚
David Zanirato