Sfuei Mensîl Furlan Indipendent
Archivi de Patrie

E DUCJ A VIVERIN… FURLANS E CONTENTS. Cinisuntule

............

E jere une volte, tun paîs dal Friûl, une fantate che e passave dut il dì a lavorâ e netâ cjase, e daspò   che une volte e veve netât ancje dutis lis boris vanzadis di un pignarûl, dut il paîs le clamave Cinisintule. La fantate e jere vuarfine di mari e viveve cun dôs surlastris, che invezit no fasevin mai nuie (de bande de mari, in fat, lôr dôs a jerin triestinis) e anzit, a cjolevin simpri vie la puare Cinisuntule che e lavorave simpri.
Tal paîs di Cinisintule al viveve ancje un princip, che une dì, strac di jessi vedran, al decît di fâ un bal par cjatâsi une morose. Lis dôs surlastris a van doi dîs a Barcola a cjapâ soreli par preparâsi, si metin sù vistîs dai plui grancj stilists dal moment e a van al bal, intant che Cinisintule e je a gjavâ la jerbe mate tal ort, cjantant “E a misdì ti doi vuainis e a la sere cuntun len”.
Ma tal ort, dut un moment e rive une fade, che i dîs: “Cinisintule, âstu voie di lâ a balâ?”
“Par dî la veretât – e dîs Cinisintule – o stoi ben chi a gjavâ jerbatis!”
“Sêstu sigure? – e dîs la fade – Cjale che tal cjistiel e a fasin ancje un aperitîf cun pan e muset!”
Convinte Cinisintule, la fade e pronuncie lis peraulis magjichis “Ursule parussule” e la tute sporcje di cinise de fantate e devente un bielissim vistît di sere, e une coce dal ort e devente une caroce cui cjavai.
“Ma sta atente – e dîs la fade – di tornâ a cjase a miezegnot, se no l’incantesim al va sù pai stecs!”
Cussì Cinisintule e va al bal, e il princip, dopo doi zîrs di tais e cuatri cjacaris di balon cun jê, si inamore. Ma aromai e je rivade miezegnot.
“Mi tocje lâ vie!”
“Fermiti almancul pe gubane!”
Ma Cinisintule e scjampe vie juste in timp: la caroce e jere a pene tornade coce, e jê e veve propite voie di fâ cuatri gnocs di cuinçâ cu la scuete. Ma lant cussì di corse, e piert un dai scarpets cjargnei che e veve intor.
Disperât, il princip al cjate il scarpet e al capìs intun moment che al è chel di Cinisintule. Par cjatâle, alore, al mande un famei ator par dut il paîs a provâ il scarpet a lis fantatis. Lis surlastris, cuant che il famei ur domande di meti sù il scarpet cjargnel, cence savê che il famei al lavorave pal princip, e I rispundin: “Noaltris meti sù un scarpet? Nancje muartis! O vin i nestris tacs a spiç!”
E cussì a restin freadis.
Cinisintule, invezit, e ricêf in cjase il famei cuntune butilie di Tocai e un salam, cussì lui al capìs che e je jê cence nancje provâ il scarpet.
“Cinisintule – i dîs il princip cuant che le viôt – âstu voie di sposâmi?”
“Va ben – e rispuint jê – ma dome se tu mi prometis che pal prossim pignarûl tu mi compris une scove gnove”.
E cussì Cinisintule e il princip si maridin e a fasin fieste cuntune grande gridele di cueste e luianie come pal “tierç timp” fûr dal stadi di balon dai Riçs, cun Cinisintule che e netave la cinise des boris a pene finît di cuei. E ducj a viverin furlans e contents.
Lis flabis di Bete di Spere

Contile juste / Plebissît pustiç

Diego Navarria
“MMandi, nono.” “Mandi frut!” “Dai mo, nono, no soi un frut. O ai disenûf agns e o ai pene finît il liceu!” “Par me tu sarâs simpri un frut, il prin nevôt. Però e je vere, tu sês deventât grant, une anime lungje. Se tu cressis ancjemò tu varâs di sbassâti par jentrâ in cjase, […] lei di plui +

Presentazion / Presentazion dal libri “Fûc su Gurize”. Intal ambit dal Cors Pratic di Lenghe e Culture Furlane inmaneâtde Societât Filologjiche Furlane

Redazion
Joibe ai 17 di Avrîl dal 2025 aes sîs e mieze sore sere (18.30)SALE CONFERENCIS DE BIBLIOTECHE COMUNÂLVie Rome 10, Vile di Ruvigne / Via Roma 10, S.Giacomo di Ragogna A intervegnin: DIEGO NAVARRIA colaboradôr dal mensîl ‘La Patrie dal Friûl’e DREE ANDREA VALCIC president de Clape di Culture ‘Patrie dal Friûl’Jentrade libare lei di plui +

L’EDITORIÂL / La lezion de bandiere par dismovisi dal letarc

Walter Tomada
Par sigûr o sin stâts ducj braurôs cuant e je rivade in television la storie, discognossude a tancj furlans, di Marc di Murùs (o Moruç?), ultin a rindisi ae concuiste venite dal 1420. Pûr di no dineâ la sô apartignince ae Patrie dal Friûl, lui – che al puartave la bandiere dal Stât patriarcjâl – […] lei di plui +

La piçade / Fevelìn di autonomie pluio mancul diferenziade

Mastiefumate
In Italie si torne a fevelâ di autonomie. Magari par dâi cuintri, ma si torne a discuti. La Lega cu la propueste di leç su la autonomie diferenziade e torne a metile in cuistion. Dopo la Secession de Padanie, la Devoluzion, la Gjestion des Regjons dal Nord, dutis cuistions ladis in malore, cumò Calderoli al […] lei di plui +