E DUCJ A VIVERIN… FURLANS E CONTENTS. Il jeur e la tartarughe

A jerin une volte, jù pes gravis dal Tiliment, un jeur e une tartarughe.
Il jeur al lave ator saltant di ca e di là dut il dì, cence lâ di nissune bande, e al saveve cori une vore svelt.
La tartarughe, invezit, e lave cu la calme, cence mai fermâsi par dibant, ma cjalantsi ator e fasint dut par ben: se e viodeve cualchidun di judâ lu judave, se par strade e cjatave une buse, le comedave.
Il jeur, dut braurôs dal so fisic atletic, al coionave la tartarughe pe sô lentece. La tartarughe no stave tant daûr aes cjacaris dal jeur, fin cuant che une dì il jeur, par fâsi viodi denant di ducj i abitants des gravis, al sfide la tartarughe a fâ une corse.
“Cui che al rive par prin insom di chê strade chi, al vinç un cjamp intîr di carotis!”
La tartarughe no veve la stampe dal agonist, ma denant dal pinsîr di un cjamp intîr di carotis, no si tire indaûr.
Il dì de gare, il jeur al rive li de partence dut vistît cuntune tute firmade, l’ultin model jessût te buteghe plui famose dal Friûl, robe dissegnade par un vêr professionist de corse. Metût il pît parsore de linee di partence, al scomence a cjalâsi ator par viodi cui che lu cjalave.
La tartarughe, li in bande, e stave li buine buine a spietâ di partî.
Il judiç al dâ il vie, e il jeur al partìs tant che une fusete, ma dopo cualchi metri, viodint che la tartarughe, cu la sô sflacje, e jere une vore indaûr, si tire in bande, si cjôl un cafè e al va a cjapâ soreli ad ôr dal Tiliment. Al stave tant ben li distirât tal cjalt, che dopo vincj minûts al partìs vie indurmidît come un clap.
Intant, a planc a planc, la tartarughe, cence mai rindisi, e lave indevant, passant il jeur e lant simpri plui dongje dal travuart.
Dopo une orute, il jeur si dismôf, al cjale il so orloi, un cronograf ultin model, al partìs vie content e sigûr viers la fin de gare, dulà che al cjate la tartarughe che, par no stâ cu lis çatis in man, e veve bielzâ finît di cjapâ sù lis carotis e e veve scomençât a arâ.
Cun dut chel murbin di lavorâ, o varês capît che la tartarughe e jere furlane di gjenerazions (un animâl tant tacât ae cjase di vê voie di puartâle sù pe schene, di dulà vuelistu che e vignedi?…).
E cussì il jeur, che come che si podeve intuî dai vistîts al jere triestin, al reste freât e al torne vie a Barcola a cjapâ soreli a panze vueite.
E ducj a viverin furlans e contents.❚
Lis flabis
di Bete di Spere