Cuintri dal Jadran, storiche societât slovene di Triest, il risultât al è di 82 a 70: e cumò la sfide e je meti in pîts la scuadre di balon
Il Friûl al à la sô prime nazionâl: e je chê di bale tal zei, che e à zuiât (e vinçût) la sô prime partide ai 24 di Jugn a Tresesin. La selezion sielte e alenade di Lorenzo Bettarini, liende de Associazione Pallacanestro Udinese (Apu), e à savût scomençâ cul pît just, cuntune dimostrazion dal valôr identitari che al pues vê il sport cuant che si pee al sens di comunitât che al met dongje un popul ae sô tiere e ae sô lenghe. Aversaris in chest prin incuintri a son stâts i zuiadôrs dal Jadran, la societât sportive di Triest che di agnorums e ten dongje i fantats de minorance slovene, alenâts ancje lôr di un gran zuiadôr come Boris Vitez. E il risultât al è stât 82 a 70 pai furlans, intune partide vere e scombatude, dulà che la tension agonistiche e je stade alte ma la coretece des dôs scuadris e je stade esemplâr, e i doi diretôrs di gare Fulvio Caroli e Leonardo Pais no àn vût nissun probleme a tignî lis brenis de dissipline sul cjamp di zûc.
◆ La prestazion de rapresentative furlane metude in pîts di Bettarini e à sorprendût il public, une vore fis, che al à volût assisti ae partide organizade de Associazion Sportive Furlane par iniziative di Daniele Puntel, imprenditôr furlan che al viôt intal sport une clâf impuartante par fâ cjapâ cussience ai furlans di jessi un popul. I slovens le àn acuiside simpri di plui intai agns propit in gracie dal sport: al baste pensâ ai lôr sucès te bale tal zei (campions come Luka Doncic a son stelis inte NBA americane), te bale a svol e tes corsis di biciclete dulà che Tadej Pogačar e Primož Roglič a son dominants.
◆ Chescj sucès a son stâts contâts in video e in plusôrs libris de vôs di Sergio Tavcar, che su Tv Koper al è deventât mestri inte art de croniche sportive. E Tavcar al dîs simpri che “furlans e slovens a son la stesse int che e fevele lenghis diferentis”. Si sa mai che ancje i furlans, come che a àn za fat i slovens, a dismovin il lôr sens de identitât ancje zovantsi dal sport. La ASF e varès in progjet di slargjâ la sperimentazion fate cu la bale tal zei ancje a altris dissiplinis, prin di dut il balon. Tal 2024 si fasarà la Europeada, il campionât des nazions cence stât, e il sium al è chel di viodi ancje une nazionâl furlane di balon scombati par chel titul.
◆ Tornant ae bale tal zei e al so esordi straordenari, la croniche de partide e tache de bale a doi iniziâl, che e je stade lançade di Ousmane Diop, zuiadôr senegalês che dopo 5 agns a Udin al à cjatât une strade une vore impuartante intal mont professionistic. Dut câs, al è restât leât al Friûl e soredut a Lorenzo Bettarini, che lu à invidât a batiâ cheste gnove aventure. Diop al à spiegât che al è in spiete di jessi convocât pe nazionâl dal Senegal, ma se la convocazion no ves di rivâ, Puntel e Bettarini i àn za garantît che par lui un puest inte rapresentative furlane al sarà simpri.
◆ Fin di cuant che e je començade la partide, la formazion furlane si è puartade in vantaç cuntun parziâl di 7 a 0. Ae fin dal prin cuart di zûc e vinceve 22 a 13, e inte seconde frazion e je rivade ancje al massim divari di 15 ponts di distac, rivant a mieze partide a 45 a 33. Intal tierç cuart si è materializade la rimonte dal Jadran, che al à recuperât cuntun parziâl di 20 a 7, ma daurman la scuadre furlane e à tornât a jessi brilante e la conclusion de tierce part dal incuintri le à viodude tornâ indevant, 63 a 60. L’ultin cuart i furlans a àn cjapât il larc, e la partide si è sierade, come dit, cul risultât di 82 a 70.
◆ Ae fin dal incuintri, spazi pe premiazion dal MVP, ven a stâi il miôr zuiadôr de partide: premi lât a Federico Bellina, cjapitani dai furlans, ancje se la prestazion di veterans come Claudio Munini e Pierluigi Mozzi no je stade di mancul. La sorprese plui grande e je stade il zovin Giorgio Romanin, cun 16 ponts gjavâts fûr di azions ancje une vore spetacolârs. Al Jadran une consolazion no di pôc: Stanko Rajčič al à vinçût il premi pal miôr marcadôr cun 18 ponts; e nol è di maraveâsi, stant che il zuiadôr al è stât par tancj agns un pont di fuarce dal Postojna, inte serie A2 slovene.
◆ Une gran biele zornade di sport, in sumis, cun dut ce che al covente par creâ la atmosfere di une partide vere: come l’imni dal Friûl “Incuintri al doman”, sunât prin de partide, e il tîr di mieç cjamp cul public che al à podût provâ a vinci mieze piece di formadi come premi. E ae fin, il cjapitani – che al à tatuade su la gjambe la acuile dal Friûl – che al berle al public “Fuarce Friûl simpri”. Ce si puedial domandâ di plui? La sperance e je che la iniziative e vedi no dome la poie de int, ma ancje chê dai mieçs di comunicazion talians e chê de politiche. In chest câs, al dûl dîlu, a son mancjâts ducj i doi. ❚
………………………………………
TABELIN
FRIÛL – 82
Lorenzo Bellese 2, Mike Cuccu 8, Pierluigi Mozzi 10, Claudio Munini 6, Tiziano Floreani 13, Lorenzo Molinaro 4, Federico Bellina 8, Michael Luis 7, Giorgio Romanin 16, Andrea Colussa 8.
JADRAN – 70
Ivan Gurlić 6, Matija Batich 12, Luca Bellettini 6, Borut Ban 7, Carlo De Petris 2, Saša Malalan 10, Luca Ignjatović 9, Stanko Rajčič 18. ❚
