In 10 agns in fum 7 mil puescj di vore e 1200 aziendis a àn plantât sac e râfs
Se si podès rivâ adore a fâ une stime di tropis cjasis che i furlans a àn fat sù “di bessôi”, al sarès clâr ancje in tiermins statistics che la malatie plui dificil di vuarî in Friûl e je chê dal “mâl dal modon”. No dome daspò dal taramot, ma za tai agns dal boom economic, un grum di emigrants a devin prove de lôr capacitât di muredôrs, marangons, cjarpentîrs, fornasârs tal forest e a tornavin des stagjons di vore par fâ sù la cjase par lôr e pe lôr famee. Il prin an a tacavin cu lis fondis, l’an dopo e vignive la struture, chel dopo ancjemò lis finiduris. In 3-4 agns la cjase e jere finide. E po se al coventave di zontâ alc, no si finive mai di lavorâi parsore: parcè che il “mâl dal modon” de nestre int al è pardabon cence remedi. In ducj i furlans, cui plui cui mancul, si plate un piçul muredôr, che se al pues intivâsi a tirâ sù alc lu fâs cence bati un cei.
Al è clâr duncje che la edilizie e je deventade par fuarce un svant de economie furlane, il fîl de schene dal cuarp produtîf di chenti e la gnervadure stesse dal tiessût sociâl e urbanistic dai nestris paîs. Vê vude une corporazion di professioniscj di nivel alt, di grande competence e dedizion, al à puartât il Friûl a cressi une vore, cuntune cualitât buine des costruzions che e rint avonde buine ancje la cualitât dal nestri “capitâl teritoriâl”, ven a stâi lis infrastruturis publichis e privadis che a stan ae fonde dal nestri vivi di ogni dì.
Cul mileni gnûf dut câs alc si è rot e la crisi e à disfat une storie di cognossince e di valôrs che e vignive di lontan. Intai ultins vincj agns la edilizie e je colade a tocs, pierdint miârs di impleâts, une grande fete di marcjât e soredut viodint sierâ un grum di impresis. La edilizie residenziâl e je in fuart malstâ parcè che la capacitât di spese des fameis e je lade in mancul, l’avignî nol à nuie di ciert e par domandâ bêçs di imprest a une bancje bisugne prin lâ a Madone di Mont (e nol è dit che al basti). La contrazion dai invistiments publics e à fat il rest: lis risorsis a son simpri di mancul e i vincui di belanç simpri di plui (il pat di stabilitât al à stropât dut il flus di bêçs che a jerin destinâts a miorâ il patrimoni public che di dîs agns aromai al sta lant a patràs. Lis impresis dal setôr po a àn simpri plui dificoltât a jessi paiadis e no son pôcs i câs dulà che a àn scugnût sierâ par no jessisi viodudis saldâ lavôrs za fats. No dome dal privât: ancje in Friûl, i timps di paiament des aministrazions publichis no son cuissà ce.
La crisi des costruzions si tire daûr chê dai setôrs dal indot (materiâi, machinaris e implants eletrics, idraulics, di riscjaldament e di condizionament). I dâts a fasin pardabon une vore di impression: in 10 agns a son lâts in fum 7 mil puescj di vore e 1200 aziendis a àn plantât sac e râfs. E a nivel talian si fevele fintremai di 539 mil puescj di vore pierdûts in 10 agns. Un grant scjas, une disgracie cence pâr, che tai ultins doi agns e somee jessisi fermade, ancje se il monitorament dal setôr aromai nol è cussì clâr, stant che tancj a son i disocupâts, ma il mudament des formis di contrat al à fat passâ tancj muredôrs di dipendents a autonoms cu la Partide Iva, situazion che no permet di lei la realtât autentiche dal panorame edîl de nestre regjon. E cree ancje avonde pericul, parcè che a diference di altris setôrs pe ativitât autonome no si domande recuisîts particolârs di organizazion, soliditât finanziarie e formazion su la sigurece. E chi si rive ae cuistion par sigûr no secondarie de ricualificazion e dal inzornament professionâl des risorsis umanis in chest setôr strategjic.
Il benstâ al à rindût i zovins furlans justementri plui esigjents in fat di professionalitât. Un lavôr dûr e plen di fastidi, che si fâs sot de plombe dal soreli di Istât e te ploie e te glace di Invier, nol è plui di chei che a vegnin cjapâts in considerazion de gnove cove di chenti. E cussì al è normâl che la lavoranzie e vegni di in altrò: propit come cuant che i furlans a levin tal forest a lavorâ al puest di todescs, svuizars, francês, cumò a son serps, albanês, bosgnacs, rumens che a lavorin al puest dai furlans. Pensâ ae lôr sigurece, competence e formazion dut câs no je dome cuistion astrate di civiltât, ma al è tal nestri interès precîs. La reson e je avonde clare: chel che lôr a van a costruî al è il patrimoni edilizi dulà che i nestris fîs e i nestris nevôts a laran a stâ. Nus covente che al sedi sigûr e ben fat di int che e dopre materiâi di cualitât e cussience intal lavôr. Stesse robe pe sigurece: i lôr infortunis ju paìn noaltris cul nestri Servizi sanitari, si che duncje evitâju il plui pussibil al è just e necessari. Sui cuvierts, come tes fabrichis, il risi al è alt e nol baste vê lis cjartis a puest: a coventin atenzion e cussience dai pericui che si corin, robis che a vegnin sì de esperience, ma soredut di un percors di educazion che tal timp al è lât simpri plui a pierdisi.
Ce fâ alore par dâ jutori e prospetive gnove a un setôr che nol è di bessôl a patî, se e je vere di fat che ai prins di Avost la Cisl furlane e à fevelât di 67 aziendis in percors di crisi cun 6 mil lavoradôrs in dificoltât, che al è un numar mai viodût in Friûl? Un prin pas indevant tai ultins agns pal setôr des costruzions al è stât dât dai incentîfs pes ristruturazions e pai intervents pal sparagn energjetic dai edificis. Il Stât al à cussì decidût di judâ il setôr e ancje di fâ vignî fûr il “neri”, dant la pussibilitât aes fameis di taiâ i coscj cu la defiscalizazion dal 50 o ancje dal 60 par cent sui intervents di ricualificazion des lôr cjasis. La nestre Regjon e jude a comprâ e a fâ sù une cjase gnove o a recuperâ une vecje, dant 15 mil euros di contribût: nol è tant, e al coventarès fâ di plui.
Timp indaûr Giorgio Cavallo e Sandro Fabbro, intune cunvigne de Afe-Associazione Friuli Europa, a vevin stimât che par tornâ a inviâ in maniere significative il Pil dal nestri teritori, la Regjon e varès di scometi suntun grant program di incentivazion che al dedi un sburt ae edilizie. Un gnûf Plan Marshall che al permeti di tornâ a cressi a chest setôr, l’unic bon di fâ cressi a colp i numars de ocupazion e di slargjâ i beneficis a un indot pardabon consistent.
Cavallo e Fabbro a fasevin cont che un miliart di euros di contribûts a font pierdût in 5 agns, in ratis di 200 milions par ogni anualitât, a varessin podût stiçâ almancul altris 4 miliarts di intervents, cuntun moltiplicadôr dal 400 par cent. Nol somee dut câs che il lôr apel al sedi rivât aes orelis che a contin, parcè che la situazion, ancje se il Guvier talian si svante di vê aprovât un decret “Sbloccacantieri”, no je cambiade masse. Un jutori concret al podarès vignî de adozion di une normative autonome sui apalts che la Regjon e à dit di volê copiâ di chê de Provincie Autonome di Bolzan. La propueste, fate in Consei regjonâl dal Pat pe Autonomie e daurman acetade dal president Fedriga, e varès un dopli vantaç: chel di judâ lis impresis di chenti a vê plui competitivitât e chel di scurtâ i timps e di semplificâ lis proceduris. Ma e je ancjemò une intenzion, e lassâ passâ masse timp al podarès fâle restâ su la cjarte: invezit al è bisugne che cheste leç, cuant che e rivarà, e deventi alc di concret che al fasi il ben dai nestris teritoris. ❚
