Furlans, votait furlan!
Lis minorancis linguistichis dentri de Union Europeane a àn vinçût la lôr sfide. E à vût un sucès straordenari, di fat, la iniziative popolâr Minority SafePack, che e à ufiert ai citadins la ocasion, cu la proprie firme (passe un milion e 200 mil chês cjapadis sù), di infuartî lis leçs europeanis a tutele des minorancis nazionâls e linguistichis. Un pas indevant impuartant te direzion di dâ atuazion al sproc de Union Europeane “Unîts inte diversitât”. Biel che si cjapavin sù lis firmis, e je rivade ancje la decision dai judiçs todescs di refudâ la estradizion dal president catalan Carles Puigdemont pai reâts di ribelion e di sedizion che e da un segnâl fuart ae magjistrature spagnole, ma dal sigûr pe autonomie catalane – cun diviers dirigjents indipendentiscj catalans tes presons e in esili – no rivin buinis gnovis par vie de repression politiche in at. Propit par manifestâ solidarietât ai fradis catalans, i furlans si son dâts dongje di resint tun presidi a Udin, che al à viodût tante int in place Sant Jacum sot dal sproc “La Europe dai popui solidaris”. A svintulavin cetantis bandieris dal Friûl e de Catalogne, ma ancje di Triest. Il presidi, di fat, al à metût dongje – sot dal unic cjapiel de difese de democrazie, des libertâts civîls e dai dirits umans sot atac in Catalogne e, in gjenerâl, dai dirits dai popui minorizâts – ancje un trop di autonomiscj triestins. Provis di dialic? Starìn a viodi.
Intant, simpri plui dispès tes ultimis setemanis o vin sintût a fevelâ di macroregjon trivenite. Une idee fûr dal vade, cu la prospetive di un Friûl colonie dal Venit, come che al è stât in passât. Lu dîs la storie, ma le nestre storie nissun le insegne. Ce fasaraial ancje in cont di cheste cuistion il prossim president de Regjon? Al baste lei cun atenzion i programs dai cuatri candidâts par vê za une prime rispueste. No sin chi dal sigûr a dî ce e cui votâ, ma cu lis elezions su la puarte nus son tornadis tal cjâf chestis peraulis di pre Checo Placerean. «Un popul che al à cussience di jessi ce che al è, si plee di mancul, nol cjate naturâl jessi il popul des massariis, dai manoâi: al pretint di cjatâsi te sente de vuide ta lis scuelis come tai tribunâi, ta lis bancjis come ta lis congreghis politichis. Un popul che al à cussience di jessi ce che al è, nol acete che la culture e vegni dome dal difûr, e che no si indegni di nomenâ la sô: al pretint di jessi scoltât te sô lenghe; e, cuant che chê cussience e cjape pît, al vûl paiâ lis tassis te sô lenghe, sei magari condanât, ma te sô lenghe, preâ te sô lenghe. Ma chest nol comude ai paronants di chenti, che a vuelin presentânus bogns, lavorents e sotans ai parons di venti: si pues capî Vignesie, Rome, e ancje Triest». Cui che al votarà ai 29 di Avrîl, che al sielzi cui che al pense al Friûl e al pues fâ i interès des diviersis comunitâts che lu componin, «tal nestri curtîl, a cjase nestre, libare e vierte a ducj, no in man di altris, che le doprin par lôr». E alore furlans, votait furlan!
di Erika Adami