✽✽ Passe 12 mil metris cuadrâts par fâ di Triest il centri di gravitât di Bat produtôr di spagnolets eletronics. Intor dal implant screât mancul di un an indaûr a San Dorligo della Valle/Dolina, e rive la gnove plateforme logjistiche costruide in vot mês in colaborazion cun Interpuart di Triest, cuntun invistiment di sîs milions di euros. L’assum de aziende al rivarà a 500 milions di euros in 5 agns, cuntune stime di plui di 2500 puescj di vore tra direts e indirets. In cheste maniere, Bat al met dongje la ufierte di servizis logjistics cu la produzion industriâl in regjim dal Pont Franc dal Puart di Triest, e al pues deventâ un model par altris aziendis. Ve il pont che nus à di dâ di pensâ e che al tocje di dongje il Friûl.
✽✽ Si varès prin di dut di sclarî che no savìn se i prossims lavoradôrs a saran man di opare locâl, ma la esperience Fincantieri nus puarte a pensâ che nol sarà cussì e si doprarà in maniere costante fuarcis a cost bas che a rivin dal forest.
E chest al rapresente za un probleme. Une vore plui penze e je invezit la domande che o vin di fâsi: cuale imprese, cuale industrie in chest moment ise daûr a invistî cifris e impegn di cheste puartade in Friûl?
✽✽ Al è chel che jo o clami “efiet calamite” e nol è un capriç dal capitalisim, ma la logjiche di chel contemporani che al sburte simpri di plui a acentrâ podê e disvilup in ciertis areis a spese di altris, creant megalopolis e perifariis simpri plui puaris e desertificadis.
Al è un fenomen mondiâl che intes sôs narazions plui dramatichis al fevele di baracopolis, intant che intal nestri contest furlan al conte di paîs abandonâts, di comuns cence plui servizis, di ambient simpri plui degradât. Al è un efiet a cjadene. Pensait ae nestre mont: dai cjanâi cjargnei bande Udin, intune diaspore che vuê e tache a viodi dome inte citât di Triest une ombre di sperance. Nol tocje dome che la classe operarie, ma ancje diplomâts e laureâts, chei che ancjemò a resistin e che za no son emigrâts tal forest.
✽✽ I imprenditôrs furlans cemût che rispuindino?
Lis associazions di categorie cemût si movino in chest contest? Fin vuê, cun grandis cunvignis, cun dirigjencis stucadis che no rivin o forsit che no vuelin interessâsi a ce che al è daûr a sucedi, cui voi plui atents a ufiertis che a podaressin rivâ dai fonts di invistiment che no aes propriis responsabilitâts.
Ae fin, cuntun puest intal consei di aministrazion, il futûr al è sigurât… Ancje lôr “tengono famiglia”. ❚