Electrolux, Ideal Standard e l’avignî de industrie furlane

La Electrolux e je salve e no sierarà. Ma, par cumò, la uniche ciertece che o vin e je che si trati di une salvece a timp, che e vâl fin ae fin dal 2017. Ciert, l’acuardi cu la multinazionâl al tiermin di une tratative tacade ae fin di Otubar dal an passât al permet di sconzurâ (simpri par cumò) che si sieri l’ implant (chel stimât tant che plui “debil” in merit ae cualitât di prodots) di Purcie, di ridusi il numar dai soreplui previodûts, di mantignî in vite – in sostance – puescj di vore. E chest, in timps di crisi dure, al è za un bon risultât.
L’acuardi al previôt, par altri, 150 milions di invistiments intal cuadrieni, nissun licenziament fin ae fin dal 2017, soreplui limitâts a plui o mancul 500 unitâts a pet dai cuasi mil di principi vertence, l’ûs di contrats di solidarietât, la casse integrazion straordenarie in cualchi aree dai impleâts e incentîfs al esodi o al prepensionament. Guvier & C. a contribuissin cu la decontribuzion dai contrats di solidarietât e cun agjevolazions pe ricercje, i sindicâts a acetin invezit plui flessibilitât, in particolâr su lis feriis, auments de produzion e un tai dai permès sindicâi dal 60%. Ma i puescj a restin. Insume, par cumò ben. Ma a nissun no i è scjampât che si trate dut câs di un contrat a tiermin e che la Electrolux e à pûr simpri il curtìs de bande dal mani.
Un discors no diferent al è chel che al rivuarde la Ideal Standard di Dursinins, che par chê si è impiade dut câs une lûs di sperance. Ma, ancje in chest câs, e je une vicende plene di incognitis, cuntun futûr pardabon inciert. Ben che a vegnin i intervents che a permetin di salvâ puescj di vore, ancje se chest al cjame sui belançs dal Stât e di consecuence su lis sachetis dai citadins. Dal rest, aromai, e je une prassi: lis grandis impresis a scuvierzin “emergjencis” che a sclopin improvisis (ma i lôr grancj manager no puedino inacuarzisi par timp? Mah!) e a anunziin daurman senaris di tragjedie. Prin pas: Italie adiu, o mandìn ducj a cjase. Dopo, fuarts dal lôr “pês”, a acetin di tratâ. Se la emergjence e nas in periodi pre-eletorâl, il zûc al è ancjemò plui facil.
Intai mês passâts – o vin za fevelât propit su la Patrie – la Confartesanât regjonâl, definint il cuadri dal 2013, e veve evidenziât che l’an passât il numar des impresis artesanis ativis al jere calât di 341 unitâts, puartant a 979 il totâl di chês sparidis intal ultin trieni ,e a cuote 2.025 il numar di chês che si son “estintis” a pet dal pic dal principi dal 2006. «Il compart – al veve sotlineât inte ocasion Graziano Tilatti, president di Confartesanât Fvg – al à pierdût intal 2013 plui o mancul 3.000 impleâts, numar superiôr ma dal sigûr di mancul impat mediatic a pet dai soreplui previodûts in regjon ae Electrolux. Nissune polemiche – al veve precisât daurman – ma o volaressin che e vignìs condividude ancje la nestre bataie in difese des piçulis impresis e dal artesanât. Cetantis Electrolux coventino par che cualchidun al tachi a interessâsi dal setôr e dai artesans restâts cence lavôr?».
Al pâr dal artesanât, ancje il setôr industriâl e chel dal cumierç a àn sofiert – e a van indevant a sofrî – in maniere pesante pe crisi economiche che e condure. Lis piçulis impresis a sierin une daûr chê altre, la liste dai faliments esposcj ae Liste de cancelarie dal Tribunâl di Udin e je aromai un flum in plene. Il president di Confindustrie, Giorgio Squinzi, al à ribatût pe enesime volte che si riscje la deindustrializazion dal Paîs. Ciert al è che se lis za pocjis risorsis disponibilis a vegnin dopradis par fâ front aes “emergjencis” des grandis impresis, magari multinazionâls (come che a son Electrolux e Ideal Standard), no indi restin par supuartâ lis impresis piçulis e mediis, vêr fîl de schene dal nestri tiessût imprenditoriâl.
Al bisugne cambiâ regjistri, ancje parcè che – lu conferme la investigazion conzunturâl resinte di Confindustrie Fvg – lis nestris impresis, a ben che penalizadis dal “Sisteme Paîs” e di problemis struturâi (dimensionâi e finanziaris), a àn mantignude une competitivitât fuarte, tant che il trafic in esportazion intal prin trimestri dal 2014 al è cressût dal 2,9% su base anuâl e dal 12,7% sul ultin trimestri 2013. Si spere che la cartolarizazion dai credits in pericul che la Bce – cussì almancul al à lassât intindi il president Mario Draghi – si prepare a varâ, e contribuissi a gjavâ aes bancjis chei “alibis” che a vuê ur impedissin di vierzi i cordons de borse e che a consintin aes piçulis impresis di respirâ e di rilançâ no dome che la produtivitât, ma ancje la ocupazion.
Par tacâ la riprese – al à visât in maniere nancje masse origjinâl (robis ditis e tornadis a dî, ma che mai nissun nol à fat tesaur..) il president di Confindustrie Fvg Giuseppe Bono – «al covente fâ sisteme. Dome lavorant ducj insiemi, istituzions, sindicâts e impresis, midiant di un dialic e un confront costant e costrutîf, o podarìn individuâ e fâ funzionâ i struments adats».
Cuntun voli di rivuart pai “piçui” – o zontìn nô – che lis emergjencis veris lis frontin ogni dì e masse dispès no cjatin scolte, parcè che a “pesin” pôc in tiermins di imagjin ma a son fondamentâi par costruî il Pil di un teritori.
L’unic auguri: il dialic che al spere Bono che nol sedi tra sorts. Regjon e bancjis che sal visin. ❚
Linux