La farmaciste di Udin e je une specialiste di nivel internazionâl intes maratonis e tes garis di resistence
Cjatâsi cuasi di bot a cori une maratone, daspò che fintremai cualchi mês indaûr al someave impussibil. Al è lât cussì il percors di Elena Fabiani, udinese che e à cjatât intes garis di corse a pît la sô reson di vite sportive. E subit a son rivâts risultâts preseâts e une vore di compliments, tant che la atlete furlane e je cumò une des miôr coridoris talianis.
__
Elena, di indulà vegnial fûr il tô amôr pes garis di corse a pît?
“Dîs agns indaûr o passavi il timp libar in pissine: o nadavi e vonde, e o jeri tesserade cu la Triestine Nuoto: dome cualchi gare in aghis libaris. Nissun altri sport. Intal fin di setemane di Pasche dal 2013, invezit, la pissine e jere sierade e o ai scugnût cjatâ fûr alc altri par alenâmi. O ai dit: po ben, almancul par chei dôi dîs achì, o lin a cori: nol sarà tant malon. Cundut che, fin a un moment prime o varès vude voie di fâ ducj i sports, ma pardabon mai lâ a cori. Si che duncje, al ploveve e no rivavi a lâ in biciclete. Sante scugne: o soi partide a pît. Daspò di chê dì, o ai simpri corût. Tal principi, il gno cuarp nol jere pront par une dissipline come la corse e o ai patît cualchi infortuni. Cul timp e je lade simpri miôr e no mi soi fermade plui.”
__
Trop timp âstu spietât prime di vê il fisic alenât il just par jessi competitive?
“No masse. La mê prime mieze maratone e je stade intal mês di Setembar di chel an. Cuatri mês plui tart. Intal mês di Avrîl dal 2014 o ai corût la mê prime maratone interie. Il prin obietîf al jere chel di cori a Vignesie, in chel an. In garis dal gjenar, si à di vê cualchi risultât intal curriculum sportîf par vê la pussibilitât di partî indenant inte graduatorie e, par chel motîf, o ai corût la maratone dal Vin intal Cuei. O ai fat subit un bon risultât, e vie”.
__
Doprâ il cjâf e la mentalitât di une persone che no veve mai corût fin a rivâ a jessi une atlete di chest nivel, cemût isal stât?
“E je vere che no vevi mai corût prime, però o vevi simpri nadât. O vevi bisugne di fâ sport. E cun chel principi o ai cjatât in curt un ecuilibri. Dut câs, mi plaseve une vore la pussibilitât di cori in ducj i moments libars, cence jessi peade a struments o implants sportîfs. O vevi une frutine piçule e o rivavi a puartâ indenant ben dut, lavôr in farmacie e ativitât sportive. Cun tantis sodisfazions che a rivavin des garis, che prime no vevi mai fatis.”
__
Âstu mai provât a fâ une stime dai chilometris che tu âs corût in ducj chescj agns, dal 2013 fintremai in dì di vuê?
“Une domande di lambicâsi a rispuindi. Se si conte che o fâs almancul cinc mil chilometris ad an, in alenament e tes garis, si pues dî che in dîs agns o soi parsore dai cincuante mil. Ancje parcè che daspò des primis maratonis, o ai tacât a cori lis garis di “ultra marathon”. Par un motîf precîs. Dai prins timps, ducj a àn scomençât a bati sui risultâts dal cronometri. Ducj mi disevin che o vevi pussibilitâts di fâ miôr e jo o sintivi un tic di pression. Jo o corevi pal gust di cori e, invezit, dutis lis voltis che mi cjatavi cun cualchidun si fevelave dome di timps, di alenaments, di garis. Cussì, cul cori su lis distancis dai 100 chilometris, no lassavi a nissun un parametri di valutazion, par tacâ un discors. Cul cambiâ i chilometris dai miei timps, sedin 45, sedin 80, sedin 100, sedin cun cualchi rimpinade intal percors, nissun al podeve discuti ”.
__
Dut câs, simpri di corse a pît. Par dî, tu che tu lavis in pissine, âstu mai pensât ae pussibilitât de Acquaticrunner, a pît e nadâ tal mâr?
“No, no. Dome corsis a pît. O corevi lis garis di cent chilometris, o ai vinçût la Milan-Sanremo cualchi an indaûr. Cussì come che o ai vinçût a Berlin, in Gjermanie. E cumò che o stoi ben di gnûf, o soi tornade intes distancis classichis. Intal mês di Setembar dal an passât o ai fat i Europeans, che no son lâts tant ben. In Dicembar o soi rivade a sfrancjâmi, a Barcelone, indulà che o ai fat il secont miôr timp talian di simpri. No disin nuie, e pûr chel timp mi darès la pussibilitât di lâ ai Mondiâi a Taipei, ae fin di chest an. Spietìn lis convocazions, prime di fevelâ di Taipei”.
__
Si puedial dî che lâ a cori e je ancje une oportunitât di cognossi il mont e int simpri divierse?
“Sigûr! Tantis voltis o sielç di lâ a fâ une gare particolâr par rivâ a fâ cualchi piçul viaç, in cualchi puest indulà che no jeri mai stade. Dut câs, par dî, par lâ a Barcelone o partìs inte la sabide, par cori la domenie e tornâ a cjase il lunis. Nol è tant timp par gjoldi dai puescj o par viodi alc. O ai gust cuant che si rive a cjatâsi cun altris atletis, de mê scuadre o des scuadris aversariis. Cuant che e jere piçule, mê fie mi vignive daûr: cumò e ven dome intai puescj che i plasin”.
__
Divueli, un insium di vinci cualchi gare particolâr?
“No si pues dî che al sedi un insium. Disìn che mi plasarès lâ al Mondiâl. Plui che insumiâsi alc, al è plui just contâ che o varès voie di miorâ i miei timps. Cori une maratone o une corse a pît al è soredut un lâ cuintri i miei limits. Il risultât finâl al va daûr di cheste robe. Un obietîf al è chel di fâ il record talian.”❚
…………………………………………………………………………………
Lis prossimis garis, prime dai mondiâi dal 2023
In prevision dai Campionâts Mondiâi di Taipei, ce âstu intal calendari?
“Chest an o ai fat il gno personâl te mieze maratone di Verone, cul timp di une ore, 25 minuts e 11 seconts, che al è ancje il gno personâl. Intant, ae fin di Fevrâr o soi stade a cori une gare a Recanati, metude sù de mê societât, il Grottini Team. E jere une “30KM”, intune manifestazion indulà che si à corût ancje sui 50 e sui 100 chilometris: jo o ai fat i trente chilometris, juste in preparazion de prossime. Intal mês di Març, ai 19, o larai a Barcelone a cori une maratone. In Avrîl o sarai a Milan e ae Sîs Oris a Vignesie. E daspò, altris ocasions par vê simpri la possibiliât di alenâmi”. ❚
………………………………………………………………………………..
Jevâ ogni dì adore par alenâsi: une costance di no crodi
Tropis oris di alenament ogni dì, par Elena Fabiani?
“Fasint un cont ae svelte, almancul dîs, dodis oris par setemane. Forsit ancje di plui. E si scuen zontâ lis oris di gare, intal fin di setemane”.
_
La curiositât e je chê di capî cuant che tu cjatis il timp, tra il lavôr in farmacie, il timp par tô fie e par polsâ.
“Ducj mi menin pal boro par chest: mi svei ogni dì une vore adore. Aes cuatri e mieze o aes cinc di matine o soi bielzà pronte par lâ a alenâmi. Tantis voltis, cuant che i miei amîs mi domandin di lâ fûr a cene, jo o rispuint simpri che al va ben, dome se o rivi a tornâ a cjase svelte”.
_
E pensâ di fâ alc altri? Un triathlon, par dî une?
“No, parcè che o varès bisugne di ancjemò plui timp par alenâmi. La idee di fâ plui di une dissipline, par cumò, le lassi stâ. Forsit, cuant che, plui inlà in tal timp, a rivaran mancul sodisfazions inte corse, cuissà?, o fasarai ancje alc di diviers”.. ❚
