In Galizie la uniche alternative pussibile e crodibile ae diestre dal Partido Popular (PP) e je chê dai nazionalitaris e progressiscj dal Bloque Nacionalista Galego (BNG). Al è ce che al è saltât fûr a clâr des urnis in ocasion des elezions “autonomichis” che si son davueltis in chê “regjon” dal Stât spagnûl domenie ai 18 di Fevrâr stâts. Di fat, cul 31,57% dai vôts e cun vincjecinc puescj tal parlament regjonâl, il BNG, che al fâs part de Aleance Libare Europeane (ALE-EFA), al à vût il risultât eletorâl miôr de sô storie e si à confermât il secont partît de Galizie, cuntune incressite di consens e cuntun slargjament de sô rapresentance parlamentâr, che tal 2020 e jere di disenûf deputâts e tal 2016 fintremai di dome sîs di lôr.
◆ Lis elezions a àn confermât ancje la posizion egjemoniche dal PP, che al manten il guvier regjonâl par vie che tal gnûf parlament galizian al varà ancjemò la maiorance assolude, ancje se dome cun cuarante seçs su setantecinc, intant che inte legjislature stade a jerin cuarantedoi. La Galizie e je calcolade tant che une sorte di scune dal PP, no dome par vie de rilevance dai consens ma ancje parcè che a son (e a jerin) galizians diviers dai esponents plui impuartants dal partît a nivel statâl, tant che il leader di cumò, Alberto Nuñez Feijòo, za president di chê Comunitât autonome, o l’ex prin ministri Mariano Rajoy, o ben il vecjo “pari e paron de Galizie”, Manuel Fraga Iribarne, za ministri ai timps de ditature di Francisco Franco e po tra i protagoniscj de transizion dal franchisim al postfranchisim e duncje de creazion dal stes PP, cence dismenteâ che ancje il stes Franco al jere nassût di chestis bandis, a Ferrol, inte provincie di A Coruña.
◆ Intun contest di cheste fate al è dificil cjatâ spazis a diestre dal PP e par chel, al contrari che inaltrò tal Stât spagnûl, nancje in cheste ocasion i neofranchiscj di Vox a àn rivât a cjapâ avonde vôts par esprimi almancul un lôr rapresentant tal Parlament di Santiago de Compostela, fermantsi al 2,19% dai consens.
◆ Intun teritori che in tiermins politics al è segnât in cheste maniere, al è pardabon complicât ancje jessi di çampe e soredut fâ indenant une vision alternative de Galizie, tant a dî chê di «une Galizie diferente», plui juste, plui solidarie, plui disvilupade e plui galiziane. Propit cheste e je la propueste politiche disvilupade de bande dal BNG, che massime intai ultins dîs agns e à infuartît la sô organizazion e la sô presince inte societât, intes bataiis pe difese dai dirits, dal ambient, dal lavôr e pe promozion de lenghe, dal teritori e de economie sostignibile,
◆ I risultâts dai 18 di Fevrâr stâts e la tindince positive inviade tal 2016 a son il prodot di une azion di cheste fate, che tal teritori e tes istituzions e ten dongje radicalitât e concretece, militance e comunicazion e che e ven rapresentade de personalitât di Ana Pontón, puartevôs dal partît e candidade pe presidence autonomiche. A nivel regjonâl, par ce che al tocje vôts e rapresentance istituzionâl, il Bloque al veve passât il PsdG – la sezion galiziane dal PSOE, il partît dal premier spagnûl Pedro Sanchez – tant che prime fuarce de çampe za tal 2020. Intes ultimis autonomichis al à infuartît ancjemò di plui cheste posizion, puartant vie vôts e seçs ai socialiscj, che a passin di cutuardis a nûf deputâts, e lassant in bande Sumar – l’aleât principâl dal PSOE a nivel statâl – e Podemos, che une plui chê altre no rivin al 2% e a continuin a restâ fûr dal parlament de Galizie, dulà che impen al concuiste un seç la liste Democracia Ourensana, formazion vuidade dal sindic di Ourense, Gonzalo Pérez Jácome, protagonist di une campagne eletorâl cuntun tai populist. ❚
Elezions “autonomichis” in Galizie, il BNG al è la uniche alternative al PP
Marco Stolfo![](https://www.lapatriedalfriul.org/wp-content/uploads/2024/05/bng-PPgalego.jpg)