Elezions te Comunitât autonome basche, EH Bildu al contint il titul di prin partît al EAJ/PNV

Lis elezions pal parlament de Comunitât Autonome Basche, che si son davueltis ai 21 di Avrîl stâts, a confermin la rilevance fondamentâl des fuarcis nazionalitariis cun cualchi element ulteriôr di interès e di complessitât, che a meretin cjalâts sedi cun riferiment ae situazion specifiche, sedi intune prospetive plui largje, tra Ream di Spagne e dimension europeane.
◆ Il confront eletorâl tra i autonomiscj centriscj dal Partît Nazionalist Basc (EAJ/PNV) e la coalizion indipendentiste di çampe EH Bildu si podarès definîlu, a sportive vie, tant che un derby che ancjemò plui che intal passat al è stât une vore scombatût e ecuilibrât. Ae fin, cuntune afluence complessive aes urnis dal 62,5%, l’EAJ/PNV al à rivât a confermâsi tant che il prin partît de Comunitât autonome cul 35,2% dai vôts. Però, in confront cul 2020, cuant che al veve cjapât sù par jù il 39%, vuadagnant trenteun sentis tal Parlament, la formazion autonomiste che dal 1980 e je la clâf dal sisteme politic e di guvier de regjon, e à pierdût consens e parlamentârs, intant che a son cressûts i consens a pro di EH Bildu, passât dal 27,6% di cuatri agns indaûr al 32,5%, e cumò si cjate a vê il stes numar di seçs dal EAJ/PNV (vincjesiet par om).
◆ La campagne eletorâl e je stade une vore dinamiche e cjalde. Par fâi cuintri ae pussibilitât di sorpàs de bande di EH Bildu, ancje il partît dal president in cjarie dal 2012, Iñigo Urkullu, al à doprât cuntune cierte fuarce la argomentazion dal «leam storic cui teroriscj di ETA», in particolâr cun riferiment ae fuarce politiche de çampe radicâl Sortu, che e je la componente principâl de aleance progressiste. In cheste ocasion, chei dal EAJ/PNV a àn zuiât ancje chê cjarte che par solit e ven zuiade, no dome inte Comunitât Autonome ma ancje a nivel statâl, de bande dai partîts spagnûi e in particolâr de bande dal Partido Popular (PP) e di Vox. Nol è però cussì clâr trop che i vedi zovât pardabon.
◆ Cun di fat, si pues dî che il prin vincidôr des elezions al è propit EH Bildu, stant che la sô liste e je stade la prime intes provinciis di Gipuzkoa e Araba e e à vuadagnât vôts ancje in Bizkaia, là che chei dal EAJ/PNV a àn rivât a tignî bot mantignint il prin puest. Al è par chel che il candidât “lehendakari” (president de Comunitât) di EH Bildu, Pello Otxandiano, al à declarât che «e je daûr a inviâsi une ete gnove». Il sucès relatîf de aleance progressiste nazionalitarie al è il risultât di une campagne eletorâl che e je rivade a tirâ dongje i plui zovins e là che la atenzion e je stade pontade su cuistions concretis tant che lis politichis sociâls, il dirit ae cjase e la sanitât publiche.
◆ Cundut achel, i nazionaliscj moderâts a restaran al comant de Comunitât autonome, cuntun gnûf president, Imanol Pradales, stant che al è une vore probabil che la maiorance di guvier e restarà chê che e je in vore cumò: la coalizion cul Partît Socialist di Euskadi EE/PSE, la sezion regjonâl dal PSOE.
◆ Ai socialiscj ur à lade par sigûr miôr che in Galizie: cun dodis puescj di deputât, dopo vê cjapât il 14,2%, si confermin la tierce fuarce tal parlament autonomic. La diestre spagnoliste e à cjapât sù par jù l’11% dai consens: il PP il 9,23% (cun siet deputâts) e Vox il 2,01% (cuntun seç). La ultime sente des setantecinc a disposizion le à cjapade cul 3,3% la liste di Sumar, che a nivel statâl al è il prin aleât dal PSOE.
◆ Dopo de Galizie e de Comunitât Autonome Basche, ai 12 di Mai si vote ancje in Catalogne, intun clime segnât in part dai rapuarts che a son in vore tra lis diviersis fuarcis in cjamp, il guvier, il parlament di Madrid e in part de ereditât dal procès indipendentist che nol è lât indenant e de complessitât de situazion economiche e sociâl dai ultins timps. Si viodarà ce che al nas. ❚