Emergjence ambientâl te drete Tiliment

Degrât ambientâl o degrât culturâl?
Daûr di un studi fât jenfri la Comunitât Europeane, il stât talian al è ultin par chel che al rivuarde la atenzion pai problemis di caratar ambientâl; ma se o sin ultins a livel european come stât, no si fasin mancjâ nuie nancje a livel regjonâl cuntune schirie di ritarts e risiervis culturâls che nus lassin une prospetive une vore preocupant.
IN CODE COME DUTE ITALIE_ La situazion te drete Tiliment e je perfetementri in linie cun chê nazionâl e i motîfs par stâ cu lis orelis tiradis e son tancj; da lis gjavis che nus lassin feridis grandononis ta lis monts (Manià, Lestans, Cjanive e vie indevant) ai cementificis che a mandin nanopolvars e fums di lavorazion da pardut cu lis ciminieris, da lis cassis di espansion tal Tiliment puartadis a le atenzion de comunitât Europeane ai flums doprâs come trois par cori cu lis machinis o piês par depositâ materiâi incuinants, da lis discjariis di scovacis a progjets di svilup che a rivuardin zonis tuteladis come chês dai Magredis o dal Plancjaval dulà che par pocâ il turisim invernâl si riscje di disboscâ un bosc (chel dal Cansili) antigon di secui.
INDIFERENCE_ Il dubi che no si trati dome di degrât ambientâl ma che si trati di degrât culturâl al nas cuant che, cjartis a la man, si viôt che cuasi ducj i sîts interessats e an un valôr storic-afetîf pe int e chi in cualchi câs lis situazions a àn cjatât teren facil ta lis nestri tieris, par gracie di aministrazions vuarbis e sordis, e daspò jessi stadis blocadis tal forest dulà che a son nassudis. Su tancj insediaments industriâi e zonis di produzion, tai agns di aur dal “boom” economic (70/80) si son dispès sierâts no un ma ducj doi i voi su lis cuistions leadis al incuinament par pocâ une economie che e leve in plene, e che no tignive cont di pucis e aghis sporcjis mitint però la fonde par situazions boomerang “chel che si bute vie vuê si lu cjate doman…”. A son tancj i sîts incuinâts in spiete di bonifiche.
Flums impuartants come la Ciline e la Midune a son tal stes timp un valôr pal teritori e un catalic di problematichis e casistichis di degrât; tal jet si cjatin discjariis, gjavis di claps, zonis militârs e zonis dulà che agns in daûr e son stâts lassâts materiâi une vore periculôs.
Flums martoriâts e flums pronts par jessi martoriâts come il Tiliment che cu la cuistion da lis cassis di espansion a movin ancje l’interès di studiôs forescj interessâts plui dai furlans a tutelâ l’ultin flum european cuntun un cors mai mudât dal om; in chest câs la bataie de int e je rinfuarçide di sindics e istituzions che si dan fuarce insiemit.
I COMITÂTS_ Par difindi il teritori a son nassûts un pôc dapardut comitâts spontanis di citadins che si tirin sù lis maniis e che cun firmis, manifestazions, blogs e cetantis altris formis di scjas a cirin di meti un fren a cheste ande, simpri plui caraterizade di cjartis boladis, ritarts tecnics (…o tatics), procediments cidins, responsabilitâts ribaltadis jenfri i diviers ents e disinformazion calcolade. Par dâ une man dispès a vegnin clamadis chês associazions che par statût o par mission a àn il dificil compit di difindi l’ambient (Greenpeace, WWF, Bielis Arts, Mountain Wilderness, Legambiente e cetancj altris ents) e che cun personaçs une vore famôs e testimonials che i metin la muse e l’impegn a cirin di dâ une man, cence però rivâ a fâ nuie, ma in cualchi câs cence nancje vê rispuestis in merit. I volontaris però cu la lôr ativitât nus dan un grant insegnament: la bataie pe atenzion ambientâl no à di sei ni di drete ni di çampe, no à di sei un motîf par berlâ di politiche ma e à di sei dome une bataie di dute la int.
La cuestion dal Sant Lurinç
Tai agns 70 a cjaval dai comuns di Manià, Fane e Frisanc, intune zone clamade “rûc stuart”, une dite di provignince padovane e à scomençât a comprâ terens par implantâ (daûr des vôs che a ziravin…) une ativitât pe lavorazion di prodots agricui e in particolâr par produsi marmeladis (Fane e je cognossude par une cualitât antighe di miluçârs…). La flabe però e dure pôc e la veretât e ven fûr subite. I padovans (cementîrs…) a vevin individuât te pedemontane dal pordenonês un sît ecelent, un lûc perfet dulà sgjavâ “marne e calcâr” par fâ peton. A tachin cussì agns di lotis tra comitâts e cementîrs, a Manià, Fane, Frisanc e Lestans (dulà che e je une altre gjave), ma il scjas fat dai citadins nol puarte di nissune bande e lis aministrazions locâls a continuin a permeti di sgjavâ fevelant di puescj di vore e gnovis oportunitâts. La gjave prest si slargje e e scomence a rimpinâsi su pal Sannt Lurinç, une mont di alt valôr storic, culturâl e afetîf pe int di Manià. Ator de mont a son stadis cjatadis li tracis di insediaments tra i plui antîcs dal Friûl e sutun flanc de mont, si slungje un troi di clap di epoche pre-romane doprât fint ai prins dal 900 come colegament e vie principâl in direzion de Austrie. Al valôr storic si zonte chel artistic tant che sul cret si cjate un dai lûcs di cult plui vecjos dal Friûl (nomenât su documents dal secul XI) vuardât e mantignût pal passât di fraris eremitis ma che al riscje cumò di mudâsi in confin alt di escavazion. Lis ativitâts di estrazion a àn puartât un aument dal traffic pesant, un grant incuinament acustic, segns indelebii tal teritori e un incuinament ambientâl 10 voltis plui consistent di chel de zone industriâl (une des plui grandis dal Friûl…). Plui voltis a son stadis prometudis oparis di rimboscament che però stant lis pendencis de gjave a sunin plui come “contentin” che come soluzion. In zonte ae za pesant situazion, tai agns 90 e rive la pegre ma inesorabil tindince dai cementificis a mudâsi in incinisadôrs di scovacis dulà che la farine di nemâi, i paltans industriâi, i vuei e i cuviertons di machine a vegnin doprâts come “combustibii alternatîfs”. La int par man dai comitâts e domande plui atenzion e une maniere di escavazion plui compatibile cun la bieleça dal teritori ma soredut mancul incuinant.
Il “megaincinisadôr”
Biel rivant in machine de basse viers Manià, subit daspò vê passât Vivâr di lunc di un stradon che al puarte dret tal paîs dai curtis, si cjate un lûc sioron di storie e cuasi magjic: la Cossane. Un teritori particolarmentri grant e tutelât (Area di Rilevante Interesse Ambientale A.R.I.A) che al confine cui Magredis, cu la Ciline e cu lis tiaris dai templârs, che al è stât cuntindût di ducj chei che nus àn concuistât, e che tai ultins agns al à vût un pôc di problemis. Jenfri il teritori si cjatin plantis raris tipichis da la Puzda ungjarese puartadis cun dute probabilitât dal passaç di popolazions forestis, insediaments antîcs, cjamps di forment e pomârs, dulà che dongje, prest e vignarà fate la plui grande discjarie di scovacis umidis dal Nord Est. Un megaimplant pe lavorazion dal compost di 250.000 toneladis par an, par une utence di 3 milions di abitants (in Friûl o sin plui o mancul la metât…) e un trafic costant di TIR. L’implant cu lis scovacis al varès di produsi biogas e duncje eletricitât a bas impat ambientâl. Tocje dî “al varès di” parcè che nassût e aprovât cuasi sot vie si fâs ancjemò une vore di fadie a savê alc di plui su cemût che al funzionarà e su ce vantaçs che nus darà. Chest implant si zonte a une za esistent discjarie di scovacis che si cjate a 300 metris di chê gnove e e à un teren bonificât ma doprât par tant timp come poligon militâr. Di resint la regjon e à ridusût la aree sot tutele par permeti ai contadins di vê une zone di lavorazion e tipologjiis di coltivazion plui grandis. Daûr de vôs de int il gnûf implant al stone une vore soredut parcè che al nas tal mieç di un teritori par tradizion cjâr a ducj e sot tutele europeane pe unicitât morfologjiche e pe particolâr varietât di plantis presints.