Europeada 2024: balon ma no dome…

La acuile furlane tal cûr de Europe ancje tal balon. A son ancjemò fuartis lis emozions tai zuiadôrs, tai alenadôrs, tai dirigjents, tai doi de “Curve Nord” cul sborfadôr/tambûr de Associazion Sportive Furlane (ASF) che a àn inmaneade la imprese. Ma ancje tai tifôs rivâts in fuarce tal aeropuart di Roncjis di Monfalcon par saludâ i protagoniscj. Une partecipazion che no si visavin dai timps di “O Zico o Austria”.
◆ Vinci il torneu ae prime partecipazion nol è di ducj!
◆ La Europeada, il campionât european di fotbal par diletants fra lis nazions cence Stât, organizât ogni cuatri agns dal FUEN (Federal Union of European Nationalities) si è tignût chest an tal Schleswig, in Gjermanie ai confins cu la Danimarcje. Sîs partidis intune setemane.
◆ La nazionâl furlane e je une selezion di frutats residents tai 175 comuns de minorance furlanofone ai sens de leç 482/1999 che a zuin in ecelence e promozion, ducj diletants, e che a àn cjapât feriis pûr di partecipâ a chest torneu.
◆ A àn dimostrât determinazion, fuarce di volontât, capacitâts tecnichis, voie di fâ, sgrimie, sacrificis ma no molâ, sens di identitât e braùre tal rapresentâ il Friûl cun tant di acuile su lis maiutis. E i risultâts ju vin viodûts. Vinçudis dutis sîs lis partidis, dominât il campionât in Gjermanie e puartade la cope in Friûl.
Facil e impietôs il confront cu la scuadre taliane che ta chei stes dîs e zuiave, simpri in Gjermanie, pal campionât european dai professioniscj: stufadiçs, cence grinte, pocje voie di fâ ben, zuiâ cun suficience, cence balis, in fin dai fats une manie di massepassûts e, cun di plui, paiâts un voli dal cjâf.
◆ Ancje intal câs de Europeada la RAI si è fate cognossi. E à mandât in Gjermanie dome l’inviât di lenghe slovene e di fat, tal TGR, la prime partide, il derby Friûl-Žile, al à vût bon spazi. Fûr i slovens nuie plui notiziis. Un comunicât pai furlans dome a vitorie otignude. No vevino gjornaliscj che a savessin il furlan di mandâ intal Schleswig? No ise ore passade di vê ancje nô une RAI furlane, come che le àn i nestris fradis slovens che a son une vore mancul di nô e che a àn ancje pierdût il derby?
◆ Bodifate che Telefriuli si è impegnade e e à fat lis telecronichis in direte e in lenghe furlane. Bravone Francesca Spangaro che, tal so furlan dimpecin, nus à descrit cun atenzion e tiermins tecnics precîs ducj i matchs e nus à ancje informâts cun bondance di particolârs su lis etniis, lis minorancis, lis lenghis des comunitâts. Dutis notiziis, magari cussì no, no scontadis. Vive Telefriuli! Cumò si spietìn però che ancje Alfonso Di Leva, che nol è “tipicamente friulano” al impari la nestre marilenghe cussì che al podedi controlânus miôr. I conseìn un cors li di Catine la lucane.
In plui dai events sportîfs, la ASF e à metût sù un stand cu lis ecelencis enogastronomichis furlanis dai sponsors che a vevin sostignude la mission. Esposizion une vore preseade, a dimostrazion che sport e lenghe furlane a puedin jessi un veicul di marketing une vore valit pai prodots nostrans.
◆ Cumò o volìn viodi altris iniziativis. Parcè di no, par esempli, meti adun une Cope “Altra Italia” cu lis rapresentativis des 12 minorancis linguistichis dal stivâl? O parcè no une partide in amicizie cu la Udinese tal Friuli Arena?
E, di là de partide, nus sta a cûr che il team di Pozzo al deventedi pal Friûl alc di ce che al è il Barça pe Catalogne: “Més que un Club”, ven a stâi no dome une scuadre di balon ma un simbul identitari di dute la Comunitât catalane. ❚