Interviste cun Stefano Ferigo, ciclist e organizadôr dal tour «Inchino al Friuli»
Stefano Ferigo, di Dartigne, 33 agns, maridât e cuntun fi di 3 agns, di mistîr al fâs il manutentôr di assensôrs, ma al è ancje un grant sportîf. La sô passion al è il ciclisim, ma in plui di praticâlu al à ancje ideât «Inchino al Friuli», un tour di 3 dîs in bici origjinâl come il so titul.
_
Cuant ti ise nassude la passion pe biciclete?
La bici mi è simpri plasude, di piçul mi visi che o cjalavi lis tapis dal Zîr di Italie cun gno pari, ma no ai fat mai ciclisim parcè che no vevi amîs che lu fasevin. Mi soi dedicât al volley che o ai zuiât par plui di 10 agns, e o ai scomençât a lâ cun serietât in bici a 20 agns, fasint mountain bike. Dopo cualchi an al è sucedût che o ai pierdût gno pari, e o ai cjatât inte bici une specie di “riscat” viers de vite impegnantmi in alenaments e garis. Mi soi gjavât ancje bielis sodisfazions, tant che vinci la Lussari Mtb di Tarvis, une cronoscjalade classiche. A un ciert pont o ai vût cualchi fastidi fisic: al jere il gno cuarp che mi diseve che fra famee, lavôr e agonisim no podevi lâ indenant cussì, e duncje o ai scomençât a cuietâmi e a gjoldimi lis pedaladis cun plui trancuilitât.
_
Tu sês cetant leât aes tôs lidrîs furlanis. Ce isal par te il Friûl e il to paîs, Dartigne?
Par me Dartigne e il Friûl a son cjase, dulà che “cjase” e je la peraule plui biele dal mont. Cuant che o voi vie pes feriis o ancje dome in trasfierte par 2 dîs e dopo o torni e o viôt la culine di Sant Martin mi si vierç il cûr. Al è cussì ancje se o jentri intun ambient in Friûl e o dîs “mandi”, cun int che e rispuint par furlan: mi sint a cjase ancje se no cognòs nissun. Di fat, il furlan al è une lenghe che o cîr di lassâ ancje a gno fi che al à 3 agns.
_
Zontant insiemi la passion pe bici e pal Friûl, ti è vignude la idee di «Inchino al Friuli», un non cetant evocatîf. Di dulà vegnial?
Il non lu ai inventât une sere sul divan, fevelant cu la mê femine. Un inchin che al è omaç sedi al gno Friûl, sedi al ciclisim, parcè che cuant che si cor di rive sù il to cjâf al è bas tant che un inchin su la ruede denant. La mê idee e jere di fâ un percors in biciclete di doi dîs cence fermâmi, ator pal nestri teritori. Un percors personâl. Però doi dîs di bessôl pes stradis no jerin messe sigûrs, e duncje o ai proponût a doi amîs che mi vignissin daûr par documentâ la imprese. Dopo mi è vignude la idee di fâ tapis che a tocjassin ancje ativitâts artesanâls o economichis. Cussì a son vignûts dongje i prins sponsors, e duncje e je deventade une robe di doi dîs par mostrâ il nestri Friûl di plui ponts di viste. Cheste e je stade la prime edizion intal 2020, che e à vût tant sucès e rispueste. Dopo, intune cu la societât sportive Capodivento Mtb di Dartigne, e je vignude la idee di vierzi il percors a cui che al volès partecipâ. Intal 2021 la edizion e je saltade pal Covid, che però o vin fat dopo intal 2022, e chest an in Jugn.
_
E cumò cemût funzionial, l’Inchino?
Nô o dissegnìn doi percors a tapis, un di 300 e un di 500 km che un al pues completâ cuant che al vûl intal arc di 3 dîs. I percors a son miscliçâts fra strade asfaltade e tiere, di fâ cu la bici “gravel”. I partecipants i van daûr sul lôr GPS e a puedin partî e rivâ cuant che a vuelin, daûr des lôr esigjencis e capacitâts: al è cualchidun che al esaurìs il percors ancje dome intune dì. Nus comunichin i oraris di partence e rivade e duncje nô o viodìn di lôr di consecuence, ancje dilunc des tapis dal percors dulà che a cjatin assistence e ancje regâi. Chest an, un dai doi percors si clamave il borghesano parcè che al previodeve di passâ pai borcs plui biei di Italie che a son in provincie di Pordenon: Top, Pofavri, Polcenic e Voleson.
_
Te comunicazion o pontais tant sui social, ise vere?
Sì, invezit di fâ volantins o spindi bêçs par cualchi balon sglonfabil publicitari o vin simpri pontât sui social, Instagram e Facebook, e sul passeperaule. Anzit o disarès che o sin nassûts cussì: social.
_
Ce disino i partecipants dal nestri teritori? Jerial cualchidun che no lu cognosseve?
A son stâts ducj entusiascj e tancj di chei che no cognossevin il teritori… a jerin furlans! Cun chê che o vin fat un percors cun tantis stradis no asfaltadis, o vin fat scuvierzi robis particolârs. I forescj si maravein che un teritori tant biel al sedi cussì pôc praticât, cuant che invezit di altris bandis lûcs di cheste fate a saressin mete di turisim intensîf. Duncje par cumò il Friûl pal ciclist al è l’ideâl: percors biel e sigûr.
_
Sintint ancje i partecipants, esistino altris iniziativis cussì ator pe Italie?
Sì, jo stes mi soi ispirât a “Veneto Gravel” che o ai ancje partecipât, ma la particolaritât de nestre al è l’acet. Il ciclist si sint simpri seguît, a ogni tape al è simpri cualchidun presint. In altris manifestazions vie pal percors tu ti sintis bessôl.
_
Cjalant il cicloturisim in Regjon, cemût sino metûts?
Il nestri teritori al varès potenzialitâts grandis. Met di fâ un percors di Tumieç a Udin: in 70 chilometris tu varessis mont, lât, cuei e tu rivis in citât. Une varietât che tu cjatis di pocjis bandis e che e je un motôr emozionâl pal cicloturist. Però a mancjin percors cussì, ben definîts e segnâts. O vin tante strade di fâ, si pues propit dî!
__
Ce si podaressial fâ di miôr, secont te?
Une rêt serie e coordenade cence interuzions di ciclabilis che a sedin fûr de viabilitât normâl. Ancje chês che a son cumò a àn masse interuzions. Par esempli, o soi stât in feriis in Trentin e là vie se tu cjapis une ciclabile tu sâs che tu fasarâs dute la valade cence cjatâ une machine: la sigurece cumò pal ciclist e je fondamentâl. La nestre situazion, cun toc sì biei, ma no colegâts ben, e riscje di puartâ vie i turiscj in bici, che se no si sintin sigûrs no tornaran plui, e no fasaran une biele publicitât intun setôr li che il passeperaule al conte tant. ❚
………………………………………………………
FOCUS. I numars dal cicloturisim
Il cicloturisim al è simpri plui impuartant pe valorizazion in clâf turistiche dal teritori: in Italie l’impat economic di chest setôr al è stât di passe 4 miliarts di euros, daûr dal rapuart «Viaggiare con la bici 2023», fat di Isnart. La ricercje e à fat une fotografie di cui che a son i cicloturiscj che a frecuentin lis nestris stradis.
◆ La etât medie e je tra i 28 e i 57 agns, cuntune cuote interessante di personis tra i 58 e i 72 agns (il 17,3%), che a àn une capacitât di spese plui grande di chei plui zovins. I forescj a spindin di plui dai talians.
◆ Pal lozament si preferissin i albiercs (pal 28%), po dopo i agriturisims (11%) e i camping (7%).
◆ Il 22% al à il paisaç tant che motivazion principâl di sielte de destinazion. Il 16,5% al sielç su la base de ufierte artistiche e culturâl e un 15,2% pe ufierte enogastronomiche.
◆ Il 44% dai cicloturiscj al è influençât des informazions racueltis in rêt prime di partî (plui dal turist medi in Italie, 32,7%). Il 65% (cuintri il 36,8% dal turist medi) al dopre il social par condividi impressions di viaç, foto e recensions di lûcs e servizis. Chest ultin dât al fâs capî cetant che a sedin impuartantis iniziativis che a pontin sui social tant che «Inchino al Friuli» di Ferigo. ❚
…………………………………………………….
LINK & LEAMS
Si pues viodi lis fotos e informâsi sul «Inchino al Friuli» lant a viodi lis pagjinis uficiâls dal tour su Facebook www.facebook.com/InchinoAlFriuli e Instagram www.instagram.com/inchinoalfriuli ❚
