A vore in Gjermanie e a “mateâ” in Friûl | L’impegn cuotidian par une culture des diferencis

La passion pal teatri di Anna Gubiani,
e il mistîr misteriôs di “dramaturg”
Di mistîr e fâs la “dramaturg”, une profession che in Italie no esist, scuvierte tai siei agns di formazion, tra Milan e la Gjermanie. Anna Gubiani, 43 agns, di Glemone, vuê e lavore tal teatri stabil di Esslingen, ma il so leam cul Friûl – di indulà che e mancje di scuasi 14 agns – al è simpri stât fuart, tant di volê fâ alc pe sô tiere di origjin metint a pro lis competencis acuisidis tal forest. E cussì, tal 2012, cun Alessandro Di Pauli, e imbastìs MateâriuM, un laboratori permanent di dramaturgjie, sfrutant la cognossince maduride – jê in Gjermanie, lui a Barcelone – e lis esperiencis leadis ae scriture teatrâl metudis adun fin ta chel moment.
◆ Anna e sperimente la fuarce dal teatri fin dai agns dal liceu cuant che, a 15 agns, e je in Slovenie par une esperience di studi linguistic internazionâl de lenghe todescje. «Nus vevin dividûts in grups tematics, o jeri finide ta chel de gjinastiche, che no mi interessave gran – e ricuarde –. La ultime dì de setemane, ogni grup al veve di misurâsi tune sene teatrâl. Jo, che no vierzevi mai bocje, intant che chei altris a presentavin i lôr esercizis acrobatics, o ai mimât me stesse e il gno rapuart cu la gjinastiche. Il public si è metût a ridi di no podê tignîsi, e di chel moment ducj mi cognossevin e a volevin fevelâ cun me. Il teatri mi à regalât la comunicazion che no vevi te vite normâl. Mi à dât un puest dulà stâ».
Il svicinament ae scriture dramaturgjiche al rive cu la esperience tai Rototrans, un grup di trampolîrs e mangjefûc di Glemone, vuidât di Adriano Venchiarutti. «Par lâ in sene, e coventave une storie. o ’nd ai scrite jo une; e fevelave di striis e di striaments». Cui Rototrans la passion pal teatri e sclope fûr. «O volevi deventâ atore. Pe disperazion di gno pari Gianni (za diretôr da “La Patrie dal Friûl”, ndr), a 20 agns, dopo 6 mês che o jeri iscrite a Matematiche te Universitât dal Friûl, o ai molât dut e o ai fat trê provins in ancjetantis scuelis di teatri talianis: a Rome, a Gjenue e a Milan. Te Scuele di art dramatiche “Paolo Grassi” di Milan, cuant che si son inacuarts che o vevi scrit un test teatrâl mi àn proponût di fâ ancje il provin pe scriture teatrâl. No mi varessin fat paiâ la cuote di partecipazion. O ai fat la selezion e le ai passade: o stevi jentrant tal mont professionâl dal teatri. Di Milan a Glemone o ai fat dut il viaç in tren cul cjâf fûr dal fignestrin. O ai cjapât la bronchite, ma al è stât il plui biel viaç de mê vite».
◆ Dopo dal diplome in scriture teatrâl ae “Grassi”, Anna e va indevant cui siei studis al Dams di Bologne. A Milan e scuvierç che e esist une figure no cognossude in Italie: il “dramaturg”. E alore e decît di imbastî la tesi di lauree ator di cheste profession che e je chê di «un consulent teatrâl ae direzion artistiche e aes singulis produzions» e si trasferìs par 4 mês in Gjermanie, a Mannheim, cuntune borse di studi te sachete, par fâ un praticantât in dramaturgjie tal Nationaltheater de citât.
◆ Tornade in Italie, e colabore cul Teatro di San Lazzaro di Savena (Bo) e il Teatro della Tosse di Gjenue, ma cence nissune prospetive pal futûr. «Al jere impussibil rivâ a vivi di scriture teatrâl – e conte –. O vevi di decidi se cambiâ mistîr o meti a pro la esperience fate in Gjermanie». Anna e scrîf a di une trentine di teatris todescs, trê i rispuindin. E tache cussì un praticantât retribuît di 4 mês tal teatri di Erlangen. Dal 2015 e lavore al Württembergische Landesbühne Esslingen, ven a stâi al Teatri stabil regjonâl dal Württemberg a Esslingen, tal Sud Ovest de Gjermanie. E chel mistîr misteriôs, che i veve dedicât la tesi di lauree, al devente il so: tant apassionant che impegnatîf, massime pe conciliazion cu la vite privade. «Dopo vê ideât cu lis coleghis e i coleghis il program de stagjon, o compagni dut il procès che al puarte ae scree di un spetacul. Par ogni stagjon – e sclarìs – o seguìs la nassite di plui o mancul 5 spetacui e o doi consulence esterne par altris 15: di chei par fruts ai spetacui di prose, ancje cun caratar musicâl. I miei compits a van de gjestion dai rapuarts cu lis cjasis editoris teatrâls ae leture e sielte dai tescj teatrâi di fâ meti in sene, il lôr adatament, la selezion di atoris e atôrs, la sielte des regjistis e regjiscj, la consulence ae regjie e, se al covente, a dute la scuadre de produzion, l’acompagnament dal public traviers introduzions al spetacul, redazion dal libret di sale e, par finî, il supuart al ufici stampe».
◆ In Gjermanie al è un sisteme sovenzionât dal Stât che al cjape dentri plui di 140 teatris stabii, e pant la “dramaturg” furlane che e je in vore sul gnûf spetacul “Chi ha paura di Virginia Woolf?” di Edward Albee e, in paralêl, cu la definizion dal program pal prossim an academic di MateâriuM, cun tancj incuintris gratuits in rêt di scriture teatrâl e  apontaments dal vîf. «MateâriuM e je une des robis plui bielis che mi sedin capitadis. O sperimentìn tecnichis di lavôr e pinsîrs ae avanvuardie, parcè che o sin dal dut indipendents. O vin tacât cheste esperience in doi, jo e Alessandro Di Pauli, e si son zontadis tai agns Giulia Tollis e Stefania Ursella. Ognidune e ognidun di nô al puarte ta chest progjet la sô storie, lis sôs capacitâts, il so pont di viste; ju metìn a disposizion dal Friûl, dai nestris corsiscj – fin cumò o ‘nt vin vûts cualchi centenâr – e spetatôrs». Une direzion artistiche condividude, di stamp european, buine di coinvolzi plui gjenerazions, che Anna Gubiani e varès volût viodi ancje a cjâf dal cetant zovin Teatri stabil furlan: «une realtât impuartante e necessarie, cun grandis potenzialitâts, ma che no si è vierte al confront cui tancj sogjets impegnâts tal setôr sul teritori fasint reonâ lis esperiencis e lis competencis esistentis. In Friûl a son realtâts culturâls maraveosis, che a puartin indevant propuestis inovativis tal cjamp dal teatri, ancje par fruts, de danze, de musiche, fin fûr dai confins de Patrie. A van cjapadis dentri par meti in pîts une rêt che e darès linfe al Teatri stabil furlan. Si à di zuiâ fûr dai schemis, e rompiju; si à di pensâ al doman cu la libertât di podê jessi dut ce che si pues imagjinâ. Bisugne sburtâ i artiscj visionaris a sperimentâ un viaç te lenghe furlane, alore sì che tu le judis a no murî».
◆ Il teatri «al è vision, se no nol covente a nuie. Par jessi vision, al à di jessi riflession sul presint». Al Teatri stabil furlan «i coventin visions, storiis che a puedin scandaiâ une identitât, che a rapresentin la societât furlane di vuê, che a judin a capîle, che a dan vôs e cuarp, par esempli, ancje aes secondis gjenerazions, aes fiis e ai fîs di forescj, cence par chest rinunziâ a lis lôr lenghis, culturis, peculiaritâts». Anna no à dubis: «Plui une storie e à une apartignince clare, plui chê storie, se scrite ben, e sarà universâl. L’universâl si cjate tal particolâr. A son lis lenghis minorizadis che a contin il mont». ❚
……………………………………………………………………………………
L’impegn cuotidian par une culture des diferencis
«L’arbul al cres miôr e plui adalt se al à lidrîs fuartis». Anna Gubiani la braùre di jessi furlane e l’amôr pe sô lenghe mari no lis à mai pierdudis, tant che la fuarce di scombati par chel che i crôt («trat tipic dal caratar furlan»). Te vite di ogni dì e je impegnade a promovi une culture des diferencis e dal rispiet de persone cuintri di ogni forme di discriminazion. «In Italie o soi stade une vore penalizade pal fat di jessi une femine, vitime di une culture li che a son pal plui i oms a ocupâ lis posizions decisionâls. Lu ai capît cuant o soi rivade in Gjermanie». Ma stant che il probleme al esist ancje li, cundut che al è ben plui contignût, Anna e partecipe a dibatits publics su lis cuistions di gjenar e raziâls. Temis che e fronte cun determinazion ancje sul lûc di vore, a teatri. «Cuant che o preparìn il program de stagjon, o cîr storiis gnovis, cun protagonistis feminîls o tipologjiis di oms che par solit no cjatin spazi, li che i rapuarts di gjenar e tra culturis a sedin plui ecuilibrâts o inovatîfs. E je une ricercje une vore dificile – e spieghe -. Par inviâ un cambiament impuartant, tu âs di vê la responsabilitât di cjapâ decisions. Chest al è il gno prossim obietîf: direzi un teatri o un festival par podê determinâ sieltis necessariis e justis».
◆ Ognidun di nô al pues fâ la sô part, tacant des peraulis dopradis, che a costruissin la nestre realtât e che a trasmetin la nestre vision dal mont. L’om al è stât il parametri che intor di lui si è costruît l’univiers linguistic. «Cambiâ lis peraulis, tal rispiet di un mont che nol è dome masculin, al è un pas fondamentâl ancje par cambiâ il nestri imagjinari tal non de civiltât e de paritât». E la lenghe furlane, in chest, e je plui “indevant” di tantis altris, stant che e rispiete la paritât di gjenar, om femine. ❚
…………………………………………………………………………………
IL PROFÎL
Anna Gubiani e je nassude tal 1977 a S. Denêl e cressude a Glemone. Si diplome in Scriture dramaturgjiche te Scuele di art dramatiche “Paolo Grassi” di Milan e si lauree a plens vôts al Dams – Dissiplinis des arts, de musiche e dal spetacul di Bologne. Dopo cualchi esperience tant che autore teatrâl in Italie, tal 2007 si trasferìs in Gjermanie, dulà che di in chê volte e lavore tant che “dramaturg” tai teatris stabii di Erlangen (2007-2010), Stocarde (2010-2012) e Esslingen (dal 2015).
◆ Tal 2012 e fonde MateâriuM, insiemi cun Alessandro Di Pauli: un progjet in stîl european pe difusion e pe cressite de dramaturgjie in Friûl, di indulà che al è nassût ancje un manuâl di scriture teatrâl, par furlan e talian.
◆ Dal 2014 al 2015 e je stade docente universitarie di cors di scriture teatrâl e dal 2009 al 2010 assistente ae regjie di 7 produzions e ancjetancj regjiscj. ❚