Agheponiche, la inovazion pe agriculture dal avignî. Il mont vert di Stefania Sarnataro

A Ziline di S. Zorç di Noiâr
si coltivin verduris arlevant pes, in mût sostignibil
Tal 2050 su la Tiere a vivaran 9,8 miliarts di personis, par rivâ, cul ritmi di cressite atuâl, a 11,2 miliarts tal 2100. Lu disin lis Nazions Unidis. Chest al vûl dî che se no si cjataran altris mûts di vivi, coltivâ e consumâ, nol sarà avonde di mangjâ par ducj. Ce fâ? Une rispueste, une vore interessante, e ven de pratiche de agheponiche, une forme sostignibile di produzion alimentâr che la agriculture dal avignî e podarès doprâ ancje par slizerî i impats dal om sul ambient. Di chest e je convinte Stefania Sarnataro, 30 agns, di S. Zorç di Noiâr, che cul fradi Edi e à metût in pîts “MontVert”, la prime e uniche aziende dal Friûl-Vignesie Julie che e dopre chest metodi inovatîf.
◆ Mari furlane e pari napoletan, Stefania e Edi a cressin inte tradizion e intal amôr pe buine mangjative, intal ristorant pizarie di famee, che e propon une cusine fate cun prodots frescs e di stagjon. Par ufrî il miôr ai lôr clients e par fâ dal ben pal ambient, i doi fradis a decidin di coltivâ un teren salvadi di proprietât cuntune gnove tecniche: la agheponiche, li che pes e plantis a lavorin insiemi, intun sisteme che al disfrute la risorse preziose de aghe in mût ecuilibrât e cence doprâ pesticidis o sostancis chimichis, parcè che nissune culture e ven plantade inte tiere.
◆ In pratiche, cheste forme di agriculture integrade e cumbine dôs tecnichis: la culture fûr de tiere (idroponiche) e l’arlevament di organisims acuatics (agheculture), intun unic sisteme a cicli sierât e a ricircul continui. I protagoniscj di cheste realtât a son trê: i pes, i bateris e lis plantis. Pes e plantis a vivin in maniere simbiotiche: i pes a gjenerin il nudriment pes plantis, intant che chestis a purifichin la aghe, “contaminade” dai refûts metabolics dai pes. La aghe, netade, e ven tornade a puartâ ai pes par tornâ a scomençâ il cicli.
◆ Pôc cognossude e doprade in Italie, la agheponiche e je stade adotade in tantis bandis dal mont cun risultâts une vore bogns. Stefania e Edi le scuvierzin midiant di un cognossint. A scomencin a studiâ un manuâl de Organizazion des Nazions Unidis pe alimentazion e pe agriculture, nassût dentri dal program di formazion de FAO tant che rispueste ae sfide de fam zero tal mont, e altris libris forescj sul teme; si metin in contat cun esperts dal setôr in Australie e in Texas. In Italie a cjatin une poie formative e di confront in “Aquaponic Design” di Bologne. A chel pont, a progjetin une sidrere automatizade di 660 metris cuadris di teren, a domandin e a otegnin un prestit (ma nissun contribût public, in pratiche inesistent par chest particolâr setôr, ancjemò pôc cognossût): e nas cussì, a Ziline di S. Zorç di Noiâr, la societât agricule “MontVert – Acquaponica FVG”. E je dal dut “green”, par vie che no dopre sostancis chimichis ni pe agheculture e nancje pe culture fûr dal teren. Eventuâi parassits a vegnin contrastâts cui insets antagoniscj e cun vuelis essenziâi. Par chest, ma ancje pal sparagn idric e eletric, la aziende di Stefania, no cate che e sedi stade inviade di pôc, si è adiudicade l’Oscar Green 2020 pe sostignibilitât, di Coldiretti giovani impresa.
I doi fradis a sielzin un non furlan pe lôr creature, «par ricuardâ di dulà che o vignìn, par marcâ il leam fuart cu la nestre tiere, la Patrie dal Friûl – e spieghe Stefania –, e ancje par evidenziâ la nestre mission cun “MontVert”: chê di tornâ un mont plui green, plui vert, aes gjenerazions che a vignaran».
◆ Dilunc de cuarantene, «o vin fat tantis provis di produzion cun grande sodisfazion”, che a àn permetût di doprâ intai plats dal ristorant di famee latuie, lidric, vuaìnis, selino, basili, fenoi, coçuts, pomodoros, cudumars, blede, pevaroncins. In curt, lis verduris produsudis a saran disponibilis ancje pe vendite al public.
La sperimentazion no si ferme, anzit, e va indevant cun simpri plui entusiasim e determinazion de bande dai doi zovins, cul jutori de none Marisa,  che di orts a ‘nd à svangjâts tancj tal cors de vite e che si è svicinade ae agheponiche cun grande curiositât. Tant che «ancje jê e fâs provis – e dîs Stefania -: chest Istât e à plantât 10 semencis di cudumar par vie che tal so ort lis plantis no i fasevin nuie. Par un mês o vin cjapât sù une desene di cudumars in dì. E ce bogns!», e marche la zovine. «A jerin saurîts, sugôs, digjeribii ancje par cui che no ju mangje parcè che par solit i son pesants».
◆ Cu la coltivazion protete in sere e il nudriment just («La tiere e je simpri plui aride, par vie che je cetant sfrutade»), si puedin vê verduris plui sanis, eliminant i metai pesants che lis plantis a assorbissin de tiere e a puedin gjenerâ alergjiis, tant che il nichel, e che si ingrumin tal organisim. «O rivìn a produsi verduris di cualitât, sanis e gjenuinis, sauridis e sioris di proprietâts nutrizionâls», cence dismenteâ che lis plantis a cressin plui di corse e, duncje, la rese e je plui alte di chê de agriculture tradizionâl.
◆ Cui che al jentre te sere a Ziline di S. Zorç di Noiâr (la visite, gratuite, si prenote su la pagjine Facebook de aziende) al reste a bocje vierte devant di un spetacul vert maraveôs, cun colôrs impiâts e profums che a imbarlumissin. «Cuant che i visitadôrs a cercin lis nestris verduris – e conte Stefania – a restin maraveâts de sioretât dai savôrs: plui intens e cjariâts di chei che a son usâts».
◆ Te sidrere dai fradis Sarnataro si cjatisi devant di cuatri modui produtîfs compagns, ma separâts tra di lôr, ognidun componût di vascje pal arlevament dai pes, filtri, jet di cressite cun materiâl inert e vascje li che si coltivin lis plantis in panei che a stan sorevie su la aghe.
I vantaçs pal ambient di chest sisteme a son pardabon tancj. «Prin di dut al è un sparagn idric, parcè che la agheponiche, in gracie dal cicli sierât e dal ricircul continui, e dopre sù par jù il 90 par cent di aghe di mancul in confront di chê utilizade te agriculture tradizionâl. O fasìn dome riontis in funzion de evaporazion, dal assorbiment e de traspirazion des plantis. No son refudums dal arlevament dai pes par vie dal cicli sierât. No doprìn colts ni chimichis, ni pesticidis e fitofarmacs, ma vuelis essenziâi, bateris o insets antagoniscj par contrastâ i parassits su lis culturis, e vuelis essenziâi par rinfuarcî il sisteme imunitari dai pes e par prevignînt la comparse di parassits. O vin un consum contignût di energjie eletriche par alimentâ lis pompis (che a son za a bas consum energjetic) e pal ricicli de aghe, e o doprìn pôc la iluminazion, che, dut câs, e je a led a bas consum».
◆ Ta cheste maniere, si capìs ben che lis plantis a vivin, a cressin e si svilupin lant daûr dal cicli naturâl de zornade. E de stagjon, par sielte dai zovins titulârs de “MontVert”. «Ancje par cheste reson no vin implants di riscjaldament ni di rinfrescjament dal aiar par tignî une cundizion plui dongje pussibile al esterni».
◆ Il lavôr al è tant, nol cognòs polse («I pes a mangjin ogni dì…») e si fâs dut a man.
◆ Cuâi i prossims obietîfs? «Chel di promovi la agheponiche par rivâ a une agriculture biologjiche cence doprâ prodots nocîfs, fasint dal ben al ambient e miorant la cualitât de vite cuntune alimentazion plui sane, e par “liberâ” tiere di lassâ a prâts stabii o di rimboschî – e rispuint Stefania –. E, par chel che al tocje la nestre aziende, continuâ a sperimentâ gnovis produzions, tant che il zafaran». ❚