Dialic cun Stefania Carlotta Del Bianco,
regjiste de prime produzion
dal Teatri stabil furlan
Ce i covential al teatri furlan? Pe atore e regjiste furlane Stefania Carlotta Del Bianco – che il teatri lu mastie di frute – al à bisugne di «fiducie e gnovis colaborazions», di vierzisi e di «contaminâsi cun esperiencis in altris lenghis minorizadis – lidrîs di amôr e culture, di simpri – e di gjavâsi vie i stereotips che lu àn, a tuart, cristalizât». Il teatri furlan dal doman «al à di sporcjâsi e respirâ a fuart dapardut, nol à di vê pôre di confrontâsi», di cjalcjâ palcs “forescj”, parcè che «la lenghe dal teatri e je universâl e limitâsi o scunîsi par une dimension di scjale presumude, magari peade al ûs di une fevele mancul pandude di altris, al è alc di lassâ indaûr: se e je cualitât, cheste e ven fûr in cualsisei lenghe». Baste vê cure di jê. «Se no tu i stâs daûr ae tiere, nol madrès nuie», e spieghe Del Bianco. Cussì, «se il furlan tu lu âs a cûr, tu lu cognossis, tu lu studiis, tu ti fasis stiçâ, al fâs madressi pomis bielis e sauridis».
◆ L’atrat pal teatri di Stefania Carlotta Del Bianco si mostre za in tierce elementâr, cuant che e scrîf un toc, a ‘nt fâs la regjie e lu interprete, ma e je une professore dal so liceu, che le sburte a frecuentâ il laboratori teatrâl “La Meglio Gioventù” – «progjet maraveôs promovût dal CSS di Udin» –, a lei ta chê studentesse di disevot agns une passion – malmadure, ma za profonde – che e jere ancje dibisugne. «E veve capît che o cirivi un puest par esprimi dut chel mont che no savevi dâi forme ni vôs».
◆ E dal teatri – fale une parentesi curte – Carlotta no si è plui slontanade. A ’nt fevele fasint bocje di ridi e cui voi che a slusin. Diviersis lis esperiencis fûr dal Friûl, ancje «crudis, ma veris», che i àn insegnât «un grant rispiet pal lavôr e pes personis, une grande atenzion ae scolte, a lâ insot te essence des robis, de realtât, dulà che la storie e pues nassi, tant che la azion seniche». E diviers a son stâts i mestris che a àn lassât une olme tal so percors personâl e professionâl: di Francesco Accomando, che le à compagnade i prins agns dal laboratori dal CSS, a Sandra Cosatto e Giuliana Musso, atoris di «potence e profonditât autentichis». «Fortunât e profont» l’incuintri cun Mamadou Dioume, atôr storic di Peter Brook, e tenar il ricuart di Rick Cluchey, che al à vût lavorât cun Beckett. «Il so percors di atôr dal penitenziari San Quentin in Californie al jere stât un tassel de mê tesi, centrade sul teatri in preson», prime esperience di teatri sociâl pe atore e regjiste furlane.
◆ «Te preson di Tumieç o ai cognossût un grup di oms de sezion Alte sigurece, vuidâts dal regjist Sandro Carpini. No jeri li par judicâ, ma par capî. O ai cjatât personis deventadis fragjilis, che, fasint teatri, a volevin fâsi notâ par alc di diferent dal motîf che si cjatavin li, che a crodevin a fuart intune pussibilitât di rieducazion e di reinseriment inte societât, ancje midiant dal teatri, de istruzion, dal lavôr, ativitâts che par altri a son (o a varessin di jessi!) previodudis dal ordenament penitenziari dal 1975».
◆ Po, a vignaran lis esperiencis dal teatri cui rifugjâts, cu la disabilitât e la salût mentâl. La plui resinte e je cul “Cantiere dei desideri”, laboratori di espressivitât teatrâl a Flumisel, animât di «un grup maraveôs che mi à adotade e al è daûr a insegnâmi la pazience e la bielece, formât di une ventine di personis, dai 25 ai 80 agns, massime feminis, cun “abilitâts diviersis”, tal sens che ducj o sin abii in cualchi robe e in alc altri no!».
◆ Un teatri, chel sociâl e di comunitât, di fâ plui che di viodi. Che al fâs ben aes personis. Une pratiche teatrâl trasversâl dulà che «ducj – dai artiscj ai professioniscj de promozion dal benstâ fin ai citadins, che cualchi volte a fasin part di cualchi fragjilitât o margjinalitât sociâl – a realizin percors teatrâi, progjets che i lôr fins a son varis: civîi, artistics, culturâi e di benstâ psicosociâl. O crôt a fuart intal teatri di fâ. A varessin di provâ ducj! Provâ a stâ intun grup, metisi ae prove, passâ limits, che no simpri a son chei fisics. Il teatri – e conte Stefania Carlotta Del Bianco – al ative relazions tra lis personis che in altris contescj no saressin, e nus met ducj sul stes nivel. Ducj intun, ducj cu la storie che o volìn contâ. No crôt ai protagonisims, facii e za viodûts, o crôt ae semplicitât dal incuintri e ae poesie che pardabon ognidun di nô al à e al sa comunicâ, in cualsisedi maniere».
Cressude cu lis storiis di Pinin Carpi, Mario Lodi, Altan e cui colôrs su la taule, de mame – mestre montessoriane – Carlotta e à ereditât il gust di lavorâ cui fruts: «une gjonde, di là di une cjarie di energjie; zero compromès e un mont di ridadis». «Cuntun grup di coleghis o vin costituît une associazion culturâl che si clame “Spazio a colori” e o realizìn laboratoris didatics, no dome in regjon, intes scuelis, bibliotechis e dilunc di events artistics».
◆ Un percors lunc, diversificât, mot di passion, curiositât e studi continui, nudrît di sensibilitât e ricercje de bielece, chel di Stefania Carlotta Del Bianco, che le viôt, in ultin, impegnade tal cetant zovin Teatri stabil furlan, e in particolâr te sô prime produzion – “La cjase. Lagrimis di aiar e soreli” -, che e cure la regjie, gjavade di “La casa” dal scritôr, poete e dramaturc cjargnel Siro Angeli, che e fonde lis lidrîs te Cjargne di passe 80 agns za fa. «La prime volte che o ai let il test, in gracie di une propueste une vore biele di Paolo Patui, mi à colpît la sô aderence cul vuê. Personaçs fragjii intun mont che dispès ur è strent, che lis sôs convenzions a son modons che si sfruçonin e a disledrosin un destin ciert. O sin nô in conflit cuntun presint simpri plui dificil di disberdeâ, o sin nô ae ricercje di une gjeografie emotive e sessuâl stabile, o sin nô a cidinâ i impuls che cualchi volte nus podaressin salvâ, nô che o colìn, o amìn, o çavariìn, o scjampìn e cualchi volte par fortune o savìn tornâ ae nestre anime. E mi à colpide l’ûs savint de lenghe che, ancje se par talian, di là di jessi di une modernitât di no crodi, e sune tant che la lenghe furlane e a ‘nd à ancje il costrut».
Ator dal progjet, tante atenzion e curiositât. «Mi auguri pardabon che l’interès al sedi grant tant che il lavôr e la dedizion di dut il grup di atôrs, ma ancje de direzion artistiche, de segretarie dal Teatri stabil furlan, che a stan daûr a chest progjet cun cure amorevule. Savê che a son spietis sul Teatri stabil furlan al è stimolant e al gratifiche, e nus da, a ducj nô, une responsabilitât felice». ❚
