Dai 7 ai 16 di Lui: vincj e passe apontaments
cun musiche, visitis e escursions
La int dal lûc si incuintre cui forescj, chei che a vegnin di ogni puest par cognossi i aspiets plui gjenuins e salvadis de Cjargne, par incuintris a braç cu la musiche. SI clamin “concierts partecipâts”, indulà che apont al sucêt che sedi la int dai borcs, i artiscj dal paîs, sedi i ospits, i turiscj, i vilegjants, i musiciscj clamâts di fûr, a fasin alc di biel insiemi. Si visitin i cjantons plui carateristics di cualchi frazion, si scambiin cognossincis su tradizions, usancis, abitudins, si gjolt de musiche di ogni fate, de classiche ae popolâr. Al torne cussì, pe sô tierce edizion, Festival DARTE, che si davuelzarà par doi fins di setemane, tacant dai 7 fin ai 16 di Lui, e che al tocjarà localitâts di sîs comuns cun a cjâf chel di Darte. Par chel il festival si clame cussì, cuntun zûc di peraulis tra “Art” e “Darte”. In plui dal lûc tant amât di Giosue Carducci (cul non cence l’acent su la “e”, propit cemût che al voleve il poete dal “Comune Rustico”), a partecipin ae iniziative i comuns di Çurçuvint, Paulâr, Verzegnis, Zui e Tumieç. Une biele rêt par ben 21 apontaments tra escursions, visitis vuidadis e concierts.
◆ La diretore artistiche – la flautiste di nomee internazionâl Luisa Sello, che di pôc e à vût il titul di Cavalîr de Republiche taliane – e à inmaneât chest progjet, e fin de prime edizion e à cjapât a cûr il teme de “aghe che e conte”, cjatant tai flums tant che la Bût, il Cjarsò e il Tiliment, il pont di union, plui che di division, des vals cjargnelis. «Lis aghis a traspuartin storiis e culturis, i sunôrs di lenghis e lis bielecis dai lûcs. La int di Festival DARTE si integre in cheste condivision. I concierts difondûts, insiemi cu lis escursions, a ufrissin la pussibilitât di scuvierzi lûcs unics midiant de art. Une residence par zovins musiciscj e je proviodude insiemi cui interpretis internazionâi di cheste fieste slargjade».
◆ Çurçuvint te Cjase de Int, Luviee inte Glesie di Sant Andree, Palaç Savoia di Darte, la plêf di Sant Pieri a Zui, La Mozartina 2 e Palaç Calice a Paulâr, la glesie dal Santissim Spirt di Chiusini, chê di Sant Nicolau a Alzeri, la glesie arcipretâl di Dimplan, Cjase Morocutti di Treli, il Museu Cjargnel di Tumieç, il Centri Sociâl Simonetti di Cjabie e l’Art Park di Verzegnis. Chescj i lûcs dentri tal calendari, cun events musicâi anticipâts dispès di visitis, cun cjaminadis pai trois o dilunc dai flums, o ae cognossince dal patrimoni artistic dai museus o des esposizions spontaniis che i abitants dai lûcs a preparin biel di pueste pai events. Par esempli, a Treli, la int dal paîs e à tant gust di mostrâ ai ospits, tal viert des borgadis, sui prâts, tai stalis, tai cjantons sflorîts, lis maraveis dal lôr artesanât: scarpets, lavôrs di tiessidure, furniments, zeis, craçulis, dute robe fate a man, in plui dai prodots alimentârs de gastronomie locâl. E po dopo al ven il conciert, cu la partecipazion ancje di musiciscj locâi. In chest câs e torne la partecipazion di Ezio Teon, armonicist folk tant preseât che al à sunât ancje cul Trio Pakai, sostituint Amato Matiz cuant che al jere malât. Dopo di lui si esibirà, sabide ai 15 di Lui, tacant des 10, il Trio Tempestoso, cun clarin, violoncel e armoniche. Cheste e je la filosofie di une programazion slargjade in sîs comuns.
◆ Tal spazi culì disponibil si rive a contâ dome il prin fin di setemane, ma dute la programazion si le cjate sul sît amicimusica.ud.it e su la pagjine Facebook “Festival DARTE – Concerti diffusi in Carnia”. La scree e sarà vinars ai 7 di Lui te Cjase de Int di Çurçuvint, tacant des 5 dopomisdì, cuntune escursion cun incuntri li des scuelis, par lâ dilunc dal flum a scuvierzi lis sôs bielecis; po dopo, si podarà gjoldi dal conciert de violiniste austriache talentuose Katharina Auer e dal so program incentrât su Bach. La dì dopo a son doi apontaments: aes 17 a Luviee al sarà il ghitarist de Bosgne Erzegovine Saša Dejanović cuntun conciert che al tocjarà variis culturis, e aes 21 a Darte si esibirà l’insiemi vocâl “The glorius vocal quartet”. Domenie invezit ben trê: aes 11 a Rualp gnûf conciert dal ghitarist Dejanović, aes 15.30 a Zui la visite ae plêf, e daspò il conciert cul “Trio Estroverso” tra flauts e microteatri; infin, aes 20, visite ae cjase museu La Mozartina 2 tal Borc di Sant Antoni di Paulâr, e daspò conciert cun “Estroverso Consort”, componût di piano e flâts, cun coreografiis teatrâls. Come dit, e je ancje une seconde setemane biele intense e curiose, dai 14 ai 16 di Lui, cun ben altris 12 events. Par citâ la partecipazion di une altre realtât musicâl locâl, ai 16 di Lui in sieradure di rassegne, tal Palaç Savoie di Darte, prime dal cognossût “Quartetto Reverie”, al sarà il “Coro Peresson” – direzût di Mario De Colle – che al inmagarà il public cui cjants de nestre tradizion.
◆ Fuarte e je la rêt des colaborazions par podê meti adun dut chest. In plui de Regjon Friûl-Vignesie Julie a intervegnin il Consorzi Bim dal Tiliment, Carnia greeters, il Consorzi Turistic di Darte, Silent Alps, i Amîs de Musiche di Udin e lis realtâts internazionâls Boesendorfer Wien e Imago Sloveniae Foundation. ❚
