Fieste de Sense te Plêf Mari di S. Pieri

“Cristians dal Cjanâl di S. Piêri e di ogni altri sît! Achì dintor de nestre antighe Plêf di S. Pieri, o vignìn ogni an preant daûr des nestris crôs, par rinfrescjâ la memorie di tancj secui passâts, cuant che cheste e jere la glesie di dutis lis glesis dal Cjanâl, cuant che i vons a cjapavin achì la aghe sante dal lôr Batisim e a tornavin ducj achì a polsâ par simpri dopo muarts. Cjatâsi achì, sot chist cjampanili, al vûl dî ricuardâsi che o sin ancjemò fradis, ducj unîts te religion, te storie, tal lavôr e tal sudôr. Al è come cuant che i fîs di chel stes pari di famee, cressût e deventâts ancje lôr paris di tantis altris fameis, si cjatin intune dì di fieste daprûf dal lôr prin fogolâr e si cjalin tai voi, par no dismenteâsi di sei nassûts di chel stes çoc, di sei obleâts a volêsi bon e a judâsi in dutis lis lôr dibisugnis. Chest nol è – come che al jere une volte, par antîc – un at di dipendence, al è un at di fraternitât e di afiet tra di nô, un at di venerazion viers dai nestris vieris, dai nestris defonts che a son stâts soterâts achì ator e che a àn fat nassi cheste costumance di vignî ca sù, un viaç ad an dutis lis vilis dal Cjanâl”.
La vôs de storie e clame e di secui la int de Cjargne si cjate la dì da Sense inte Plêf di S. Pieri di Zui: l’apontament al è aes 10 inte glesie de Madonute dulà che si dan dongje lis crôs. Al sun dai campanei e scomence la procession vie pal troi che al puarte tal Plan da Vincule dulà che lis crôs si metin in cercli devant dal altâr e finidis lis litaniis des Rogazions il cjaluni Diacun di Dimplan seont la usance al cjante il Vanzeli. Lant daûr dal vecjo cerimoniâl il Prevost al cjape in man la crôs de Plêf Mari di S. Piêri e, spacant la arie tes cuatri parts dal mont, al da la benedizion sui prâts, sui boscs, su lis stradis, su lis fabrichis…
Al ven il moment de clamade; si scomence cu lis glesiis par vecjo obleadis partint di Tamau e jù fint a S. Roc di Fielis, duncje chês des vot antighis Plêfs de Cjargne, po chês des Plêfs dai cuatri cjalunis di S. Piêri (S. Scjefin di Dimplan, S. Danêl di Paluce, Ducj i Sants di Sudri Priule e Neariis e S. Martin di Rualp e Val), par finî cun chês altris crôs des glesiis no obleadis partint de Cjargne e po jù cun chês dal Friûl.
Chest al è il moment plui significatîf: cui che al puarte la crôs al rispuint “I sei achì” e si svicine a bussâ la crôs da Plêf Mari di S. Pieri: i flocs di ogni colôr si niçulin tal vint cuasi a volê strenzi, cun chê bussade, dute la int di îr e di vuê di ogni singule comunitât.
Il cerimoniâl al va indavant cu la messe solene sot i volts de vecje Plêf Mari de Cjargne.
“Cui che al ven te fieste de Sense – al dîs pre Gjordano Cracina il Prevost – al capìs che al cjamine ogni dì viers la Mont di Diu e lant daûr des crôs al rivarà sigûr, dopo vê fate plui juste e biele cheste tiere, tai prâts sflurîts dal Paradîs, là che nus spietin i nestris vons, cul Signôr lât sù vuê. La religjon e je par dânus coragjo e fânus contents, e nus judarà a preâ e a cjantâ in sante ligrie, in cheste dì che il Paradîs al è plui dongje.”
L’apontamanet par chest an al è te prime domenie di Jugn par cjantâ insieme ‘chi su la mont che i secui a rivuarde scune di fede colme di sperance, si da dongje tenare e si busse dute la Cjargne’.
Il sium di viodi unidis in cheste ocasion dutis lis crôs de Cjargne par pandi “la union te fede, te religjon, tal lavor” come che al bramave il vecjo prevost pre Pieri che al zontave “cuant che si è dividûts cui gjoldial? Chei che a son parsore: i falcuts, i grifons, i ors, i lôfs… a son chei che a vegnin a mangjânus. E alore e je la uniche ocasion là che la Cjargne e pues cjatâsi unide! Ancje se no si è ducj achì almancul che a sedin lis Crôs e ducj i Cjargnei che a son ator pai paîs de Cjargne a sepin che in chê dì o sin ducj a S. Pieri. Parcè che al è achì che nô o vin vude la nestre fede, la nestre civiltât, la nestre culture; o vin vût segnât in muse e tal cûr chel timbro che ancjemò nissun nus à gjavât, o sperin che mai al vadi a distudâsi”. ❚
Marta Vezzi