“Di ben che us uej jo us visi chiars fantaz, / nò stait nanchie a chiala pì les polzettes, / che se chiades d’amor jn taj lor laz / vò provarees passions ben maladettes // Nò stajt a credi pluj aj zuramenz, / ne al fint amor c’al par, che par vo vevin, / che son malizios jngjanamenz / par sol chiapaus te ret, semaj a puedin”.
◆ Pôc si saveve di chest poete di Cjampfuarmit (1766 – 1841) prime che il professôr D’Aronco lu tiràs fûr de dismentie. Cjaliâr di mistîr, al staronzave la musine lant ator, parie cun so fradi, par fiestis, sagris, gnocis a puartâ ligrie e a declamâ lis sôs composizions, cjantantlis e compagnantlis cul mandulin. (Quant che sul mandulin jo voj tocchiant / lizer les quardes cun dolce armunie, / cul compagnales ben pulit al chiant / fas gioldi duchg cun une gran ligrie). Al veve ancje lui une sorte di ‘estri mat in poesie’, propit come chel di Zorut che – plui zovin di lui – i à robade la sene, cul so sucès e cu la sô grande popolaritât. Lis tematichis di Mariuzza a son chês tipichis de poesie vernacolâr: contrascj jenfri morôs, conseis mo a pro mo cuintri dal matrimoni, storiutis di nemâi, penis di amôr, predicjis, invetivis cuintri lis feminis, satiris, scherçs, polemichis cuintri i siôrs che, però, si risolvin intun nuie, e v.i. Il poete al sa distrigâsi ben, in chestis cuarantecuatri composizions, cu la metriche: cuartinis, sestinis e otavis di endecasilabis, sunets e sunets cu la code, cuartinis di otonaris e di setenaris, cun falilele o cence.
◆ Il libri al à plui di cuatricent pagjinis e lis ultimis cent e passe a son dedicadis ae traduzion par talian des poesiis. Tantis des peraulis di Mariuzza no son plui in vore e no simpri al è facil capîlis: pettoloz, pladenoz, litun, cibirriti, camore, derot, tulugn, jubâl, vreâs e v.i. Si ven ancje a savê che za in chê volte si doprave il tiermin papà, invezit di pai o di tate.
◆ Poesie lizere e facile chê di Mariuzza. No si trate di une opare mestre, ma nus da ancje tantis testemoneancis di ce maniere che si viveve za fa doi secui inte campagne furlane: lis voris par semenâ e po par cjapâ sù il sorturc, lis filis inte stale dilunc dal Invier, i fas di jerbe di meti sul cjâf, il ‘suf, la polente, lis panolis rustidis. E, naturalmentri, il vin. ❚