L’innomenât mestri furlan al fo sburtât di Nicolau di Este a meti jù il so savê intal tratât Flos Duellatorum
Ferare, Avost dal 1408. “Une stocade di man drete e dôs di man ledrose! Dai svelt, Benedet! E tu, Firmin, ten alte la vuardie e pare! Rispuint daurman, cumò! Sù po! Indenant di ponte. Brâf!!… Vonde, par cumò.” I doi schermidôrs a saludin cu la spade il vieli mestri di scrime Flôr dai Libars che al clame dongje Firmin. “Alore, saressistu rivât dal Friûl par fâ scuele di scrime cun me? Di dulà?” “Di Glemone, siôr mestri. O soi inamorât de spade e vô o sês il mestri plui innomenât. Gno pari al è un marcjadant siôr e us paiarai!” “Par chel si cumbine, fantat. Ti ai stimât te prove cuintri di gno fi Benedet. Tu mi someis masse zovin: no tu âs nancje barbe!” “Le ai taiade juste cumò denant – si pare Firmin – e dopo al è che o soi biont. O ai za 19 agns!” “Ben. Tu sês crût te tecniche e di comedâ, ma elegant tai moviments e tu âs passion che mai. E dopo tu sês furlan e o ai gust di fevelâ furlan cun te come cun gno fi. O soi vie di Premariâs che a son agns. Ti cjol. Doman si scomence. Dulà sêstu lozât?” “Gracionis, mestri! O soi te Ostarie dal Cuc, achì dongje.”
◆ Trê mês dopo. Flôr al clame so fi. “Benedet, tu sês il gno prin fi e tu puartis il non di gno pari. O soi vieli e strac, cjamât di lavôr cun ducj chei siôrs che a vegnin a scuele aculì di me. Cumò mi à rivade une vore gnove.” “Disêtmi, siôr pari.” “Nicolau di Este, siôr di Ferare e nestri protetôr, mi à scrit. Scolte: «Considerando che tu Fiore de’ Liberi in quest’arte pochi al mondo sen trovano magistri uguali e vogliando che di te sia fatta memoria, farai un libro in tuta l’arte e de tutte le chose le quale tu sai e di ferri, armi, e d’altre chose … e dopo … cum tuto lo tuo saver sopra uno libro isturiado de figure depento, sopra le qualle andarano le rubriche» ” Al vûl che o scrivi un libri cu lis figuris pituradis de mê scrime, cu lis spiegazions figure par figure, parcè che, dopo muart, e resti la mê art.” “Benon!” al dîs Benedet. “Benon la pote!! – Al sclope Flôr – O soi om di spade jo, no di plume! E cui piturial lis figuris?” “Siôr pari, Nicolau al à reson: o sês il miôr mestri di scrime: no si pues pierdi il vuestri savê. O cognòs jo un bon pitôr pes figuris. Al baste che vô o metedis in pose me e Firmin, e lui a fasarà il dissen, cul non de azion che vô o disarês. O sês avonde bon di scrivi, scrivêt come che us ven e dopo o fasarìn corezi di un gramatic.” “Dîstu? Tu mi âs cuietât. Cussì forsit o rivarai a distrigâmi ta cheste gnove vore. Sù mo, doman o tachìn. Dimi une altre robe: ce pensistu di Firmin?” “Al è deventât une vore brâf – i rispuint Benedet – I mancje ancjemò fuarce ma al è svelt e scaltri. Cualchi volte mi à za batût.” “No ti domandi di cemût che al messede la spade. Chel lu viôt jo miôr di te! Ti domandi pal rest. Cemût si compuartial?” “Ah, beh, par chel al è avonde stramp!” “Cemût?” “Fin che si scombat, dut ben. Fûr di chi no sai ce pensâ. Lu ai invidât une vore di voltis. Anìn a bevi cun me e i amîs: no. Vegnistu a nadâ tal flum? No. Mai a une fieste, mai che al provi a fevelâ cuntune fantate, mai e poi mai cuntune sdrondine…” “E tu invezit tu sês un sbrenât, no mo?” “Siôr pari, o soi zovin… E dopo, Firmin al è masse in glesie… che al vedi di lâ predi? Un predi che al tire di spade cussì ben?! No, par cont gno al è strani, che al sedi diviers?” “Bon, fi, lu tignarai di voli. Doman puartimi il pitôr. Ah, va ancje te ostarie di Jacum furlan a viodi se i à rivât il refosc gnûf, che o ‘nd ai une buine sglonfe di chest vinut de badie di Pompose.”
◆ Jugn dal 1409. “Firmin, o ai di fevelâti di une cuistion impuartante.” “Disêtmi, siôr mestri. In cont de brute stocade falade?” “No. Par cont de scrime tu sês il miôr arlêf de mê vite. Nissun nol à mai doprât tant ben i miei insegnaments. In nancje un an tu âs capît che la scrime e je une art di prudence e di snait, che cu la spade si à di rivâ al nemì cence fâsi sbusâ di lui. E che il cjâf al vâl plui de fuarce. Ti ai tignût cjalât ancje cemût che tu vivis. Di là di jessi un brâf schermidôr, tu sês inteligjent, svelt, religjôs, seri. Un om che si pues fidâsi”. “Graciis, siôr mestri.” “Par chest o varès gust che tu jentrassis te mê famee.” “Ce?? No capìs!” al salte sù Firmin. “Mê fie Clare, che tu cognossis ben, e à metût i voi intor di te e mal à confidât. A mi la robe mi va ben e se tu tu le domandis, jo o benedirès lis gnocis.” “Siôr mestri – al tartaie Firmin – no mi spietavi… no sai ce… ma jo… No pues acetâ!” “Cemût no tu puedis? Jo o met 300 ducâts di dote. Clare e je biele e ti vûl ben. No ti plasie? Âstu une altre imprometude?” “No, Clare e je biele e o soi libar.” “E alore, parcè no? Âstu di lâ predi?” “No, ma no pues! Mandi siôr mestri.” Il vieli Flôr, cuntun salt di gjat, al ponte la spade tal gargat di Firmin: “Tu no tu vâs vie vîf di ca cence rispuindimi! Parcè no puedistu cjoli mê fie, diaul boie! Sêstu par câs diviers?” Firmin, dut ros in muse si rassegne a disvuedâ il sac. “Us disarai la veretât. Us ringraciii par dut ce che mi vês insegnât. Mai lu varessis fat se mi fos presentât par chel che o soi. Par imparâ a trai di spade, la mê passion, mi soi travistude. No soi Firmin, no soi un om ma une femine, mi clami Marie!” “Mi cjolistu vie, stâstu scherçant?” “No, o soi Marie di Jacum Londar di Glemone. Mi soi vistude di om, taiade i cjavei e platât il pet par lâ a scuele di spade. Mai e mai altri vô o varessis fat scuele a di une femine, no mo, mestri?” A Flôr i colin i braçs, i ven un inzirli e si sdrume jù tal so cjadreon.
◆ Al passe un an e Flôr al à finît il so libri, Flos Duellatorum, une vere novitât, cun grande sodisfazion di Nicolau III di Este che lu scree cuntune fiestone. Te fieste a son ancje i doi nuviçs. Cuâi? Ma Benedet e Marie, che cussì e je jentrade, di femine schermidore, te famee di Flôr dai Libars. ❚
::::::::::::::::::::::::::::::::::::::::::::::::::::::::::::::::::::::::::::::::::::::::::::::::::
Al fo a servizi di une vore di siôrs ator pes corts dal Nord de Italie
Flôr dai Libars, fi di Benedet, al nas tor dal 1345 a Premariâs o a Cividât e al mûr tor dal 1420. Chel pôc che o savìn de sô vite si gjave fûr di ce che lui al scrîf tal so tratât, Flos Duellatorum, dulà che al fevele di se e di cemût che e je nassude la opare. Za di zovin al è puartât a combati e a doprâ dutis lis dissiplinis dal combatiment che al impare di mestris talians e todesc, in particolâr di Zuan Sveno di Metz. Par 50 agns al è mestri si spade, lance, lote a pît e a cjaval di une vore di siôrs ator pes citâts dal Nord de Italie. Al insegne la art de scrime (la scherme antighe) a Nicolò III di Este, ai cavalîrs Pietro del Verde, Galeazzo delli Capitani di Grumello di Mantue, Lancillotto di Beccaria di Pavie, Giovanni de Baio di Milan, Uguccione De Contrari di Ferare e Azzone de Castelbarco. E a tancj todescs.
◆ Tal 1483 al torne in Friûl, incaricât di Udin di meti in sest lis armis de citât che e je cuintri dal patriarcje Filip d’Alençon. In chest câs, Flôr si met cuintri la sô Cividât che, invezit, e je aleade dal patriarcje imponût dal pape che, ae fin, al rinunziarà ae incarghe.
◆ Tai prins dal ’400 al è a Ferare, mestri di scherme dal marchês Nicolau III di Este. Al è lui che i fâs scrivi il Flos Duellatorum, il prin tratât che al fevele de art dal combatiment. Tal titul latin e je platade une corispondence tra “Flôr di duei” e “Flôr” autôr. Il manuâl al à une schirie grande di figuris semplicis e precisis des azions, spiegadis di une didascalie in viers, par jessi tignude iniment. Al è clâr che Flôr si à fat judâ, sedi tes figuris, sedi tai scrits, ma lui al reste il pari e autôr indiscutibil dal libri che al à vût un sucès straordenari fin in dì di vuê.
◆ Flôr dai Libars al è tignût tant che un dai plui grancj mestris di scherme de Europe ma nol à mai dismenteât il so jessi furlan, ancje fûr de Patrie. Cuant che al fevele di se al zonte al so non la definizion di ‘furlan’. Par esempli:
Quello per chi ello è fatto
sempre sia apresiado
ché de nobiltà e vertù non se trova lo parechio.
Fior furlan a voy si recomanda, povero vechio. ❚
